行到石段街最底就可以搵到個巴士站，十分鐘車程就可以去到伊香保綠色牧場。
牧場對我黎講真係一個又愛又恨嘅地方，自己本身就鍾意同動物接觸，但牧場某程度嘅動物係畀人困喺度。尤其是日本呢一類型嘅觀光牧場更加係要動物做一啲嘢先至可以得到一啲嘢食，就好似呢一個牧養嘅活動就係我哋畀幾百yen就可以買到一啲野食嘅草同埋可以泥地帶隻羊羊出去草地到食草。
入左車之後會見到超級大個嘅入口指示~
入場費係1200yen，裏面有揸牛奶，牧羊，牧羊犬趕羊表演，騎馬等等，有好多同動物互動嘅機會。
所有呢度嘅雪糕都係由用呢個嘅乳牛D奶去製成～
所有想玩嘅活動都要先係呢部機度買飛, 唔識日文工作人員會幫你~陣間我地都會去玩揸牛奶體驗～
我地出發之前已經睇定幾個想玩嘅活動，話晒我地逗留時間唔多，一陣揀揀下miss左返東京架車就大鑊………
一黎到我地就衝去做牧羊人。呢度啲羊羊都算係肥，算幾大隻嘅，好似我哋揀嘅呢一隻咁佢真係脹卜卜個喎。我哋畀咗幾百蚊啦就拖咗佢去草地度牧羊同餵飼料俾佢地食。佢係非常之唔聽話㗎，拖住我哋兩個周圍走，我覺得佢係佢牧緊我哋多過我哋牧緊佢！
呢隻小姐似係俾隻洋帶住佢黎行多D
掛住食食食‥‥‥
完全唔合作，好難同你影相喎靚仔～
我地2個人牧，我地Share一包飼料餵，羊羊表示：乜你地咁姑寒架！
佢地好鐘意食飼料，佢見到會發癲衝向飼料袋‥‥‥
佢真係好可愛好上鏡呀＞/////＜
仲有小山羊都一樣咁可愛~
周圍都有好多次飼料扭蛋機/一杯杯飼料，可以買飼料嚟餵動物。其實真係唔洗擔心咁多，咁多遊客‥‥‥佢地都應該食到肥肥白白‥‥‥
之後我地就出發去揸牛奶喇！
小學嗰時都有揸過牛奶不過都已經好印象模糊。每人都會獲發一個杯仔去揸牛奶，會有專人喺側邊睇住同教你嘅。如果揸得唔好，乳牛係會郁嚟郁去㗎，所以點解要有專人睇住，係驚隻牛郁嘅時候會整親人，要安撫佢哋嘅情緒。
要排隊，平均每2個人5-10分鐘左右，都算快嘅。
牛牛表示：唔好整痛我，整痛我就踢死你～
睇佢咁燦爛嘅笑容就知佢根本好Enjoy～
要好大力先出得果少少，定其實係佢冇奶‥‥‥
呢度仲有馬車坐，同埋定時有唔同嘅表演例如：牧羊犬趕羊，又可以試下騎馬，餵兔仔等等，全部都係你想玩嘅時候就另外加幾百yen咁，係一個幾好做education嘅地方。
Ｄ馬仔咁細隻‥‥‥如果我地大人走去騎會唔會好辛苦？？都係留返俾小朋友玩喇‥‥‥
呢幾隻羊真係好可愛，佢地好想食野所似連個頭都伸埋出黎。
佢個頭唔知係kick住左定點‥‥‥
打理得咁好嘅羊羊隻隻都好靚仔。
呢班係羊BB黎，冇我地放牧果Ｄ咁大隻，Ｄ毛嫩D又得意D。
仲有黑白色嘅乳牛‥‥‥不過呢隻真係有Ｄ瘦‥‥‥
我哋呢一日呢就得返幾個鐘時間真係唔係好夠玩。玩完呢兩樣嘢，睇下動物之後我哋就去咗一間大部份人推介嘅餐廳度食嘢。呢間叫做Family Restaurant Picneo嘅餐廳，比我想像中多嘢食而且啲質素係ok嘅。
買完食券去取餐處拎野食就可以。
剛剛先同動物玩完，轉個頭肚餓又要抑制下想食肉嘅衝動‥‥‥始終都敵不過漢堡扒套餐xD（講一套做一套），冇辦法啦肚餓想食肉呀嘛…….
餐廳隔離係有一間手信店都有出售好多由呢一度嘅動物製作而成嘅野食‥‥‥除咗牛奶製品其他我都唔想買‥‥‥啱先見完啲咁可愛嘅動物轉頭又要食咗佢，成件事真係好殘忍T__T。
嗰度仲有好幾間餐廳，有啲都幾清幽㗎，好似呢間咁呢就附近係好多樹，好清新嘅感覺，好靚～
玩到下晝兩點零左右就要返去伊香保溫泉旅館嗰度拎行李。原來佢哋有自備一架車仔要嚟接載啲客人，等佢哋唔使再行嗰條斜路。臨走之前職員仲幫我哋影相留念添，真心覺得呢度service係唔錯，好貼心。
伊香保石段街最底嘅巴士站就可以搵到JR高速巴士嘅巴士站，搭呢架巴士大概兩個半鐘就可以返到去新宿站南口，佢都會經過草津溫泉。
JR嘅巴士比起其他巴士都唔平，要2730yen。比起搭JR當然冇咁快，但JR就轉2/3程但要成5000幾yen‥‥‥JR巴士班次都叫密嘅，又可以預先上網預訂，慳番買飛嘅時間,。又可以Online payment或者去便利店到俾錢。
冇諗過伊香保都幾多野睇，其實可以再stay耐少少 下一個站我地直飛橫濱，會介紹一條隱世食街同我地住嘅酒店 !
伊香保グリーン牧場 (伊香保綠色牧場)
地址 : 群馬県渋川市金井2844-1
電話 : +81- 0120-81-5335
營業時間 : 9：00～16：00 (最後入場15:00)
入場費 : 大人1200yen 小童600yen
交通 :
ＪＲ上越線 渋川駅乘「伊香保温泉行」巴士約15分於[グリーン牧場前]下車。
由伊香保石段口街乘往「渋川駅」巴士約10分鐘於[グリーン牧場前]下車
相關網站
伊香保新宿高速巴士資料
(Visited 339 times, 1 visits today)