2017年9月20日
呢一個四國之旅真係plan得好rush， 今次主要係想放鬆下。
5日主要行程：
Day1：香川縣高松 ➝ 丸龜町商店街、中央商店街、南新町 ➝ 入住瓦町酒店
Day2：香川縣栗林公園 ➝ 直島 ➝ 宇野港(入住民宿)
Day3：岡山縣宇野港 ➝ 倉敷Outlet ➝ 倉敷美觀地區 ➝ 德島縣琴平溫泉旅館
Day4：德島縣琴平 ➝ 阿波池田(祖谷半日觀光團) ➝ 宇多津(香川)
Day5：宇多津(香川) ➝ 高松機場
今次仲要挑戰下自己可以拎絕少行李， 隨身帶備咗一個細喼6.1 kg喺機場秤過唔超重(7kg)，我就揸住呢個喼上機喇。裏面已經有齊曬我啲化妝品護膚品嗰啲液體野～用左一個20cm x 20cm嘅保鮮袋入晒100ml內嘅液體，比起平時成個30吋大喼咁拎去真係進步咗好多。
呢班機係喺十一點嘅由香港飛去高松，大概四點幾就到。其實個時間就真係幾差下。不過大家都知得Hong Kong express先有咁平嘅直航，就唔好嫌棄咁多。況且今次仲係特價嗰陣搶番嚟，來回7百幾蚊姐（今次只係拎手提行李），如果連埋行李就要千頭。
有倉敷三井Outlet嘅Coupon派，正好今次都會去。
一睇呢個格局就知係細機場。
由機場出返市中人得一種交通工具姐，就係巴士，唔洗confuse，係information center嘅左邊就係買飛上車嘅自動售票機，都係入錢，揀地方，好簡單。
巴士主要分為２大方向，分別是：
1. 機場至JR高松駅
2. 機場至琴平
係2號巴士站就可以上車喇，要留意返，因為好多時一部車根本就車唔晒咁多人。個巴左時間表雖然係根據航班時間而定，但其實佢地會加開班次，總之唔一定要跟住個時間出發，最好早少少去巴士站度睇下有冇車先。
今日唔知點解班機出奇地多人， 去到高松機場又唔洗等行李，可以搭早一班車走，(個機場有勁細冇咩食)，即刻諗都唔諗衝上巴士到出市區。 原來先係瀨嘢嘅開始， 喺車到當然係搞張上網卡啦點知搞搞下嘅時候就發現佢真係有啲問題，唯有憑自己記憶行去酒店。
Check in時叫reception姐姐幫我睇下附近有冇上網卡賣，好好彩地遇到一個外國留過學嘅，英文極流利，但佢都話呢度係咩都冇，仲幫我搵咗幾間呢鋪頭都係話冇，雖然最後都搵唔到，但已經加晒分。
其實平時我係喺klook嗰度買架， 今次去開深水埗唱錢就順便買埋上網卡點知就奶嘢。我懷疑嗰張係假卡黎， 因為我用咗幾次呢隻卡都冇問題，仔細睇之後發現佢印刷係比較矇㗎，絕對有理由相信佢做假，只怪自己唔細心。 呢個絕對唔係廣告文。但要都要提提大家唔好好似我咁柒， 我係有諗過返機場買返相上網卡但係之後嗰幾日我都唔會喺高松市中心，再返返機場又好唔順路所以最後都係放棄咗。
今次住嘅酒店係さぬきの湯 ドーミーイン高松（Dormy Inn)。喺正日本最長商店街隔離，我諗大概行半分鐘左右就到㗎。 商店街有平有貴又有名店嘅有啲cheap嘢， 甚至老人家衫呀、日用品呀都有，咁當然唔少得藥妝店呀，超市呀，時裝店等等。商店街有好幾條，由南新町直去就係高松丸龜町商店街，再右轉就係高松中央商店街，可以話係高松必去景點之一。
一落去就轉左係南新町尾段，南新町D野係比較平民化。
有一間Daiso，近住萬聖節，勁多Decoration，見到係同類型係香港賣幾百蚊嘅decoration，係呢度百幾蚊姐。
好多得意野，睇到唔捨得走。大時大節買返去做小禮物都唔錯架。
呢個抵玩，同類型香港一定唔係呢個價。
附近係好多野食，我影嘅只係冰山一角，酒店左右兩邊都有大量餐廳，而且好多都開到11、12點，唔洗擔心，可以行夠先去搵食。
話明係烏冬縣,最多當然係烏冬店。我都有過research，最好食嘅都唔係商店街內。
如果貪方便嘅話，呢間都幾多人食嘅。
好早已經收左嚕。
由呢度開始先係高松丸龜町商店街，佢係全日本第一長，總長度為470米，接連高松中央商店街。呢度嘅裝飾靚好多架，晚上都會見到好多上班族。
入面真係有loft，有連鎖時裝店，有Franc Franc等等，靚係靚，但D野真係唔係好入到手。
感覺係爭好遠，啲嘢始終都係少啲同埋冇咁潮。如果想Shopping建議唔好去呢度，直接去Youme Town啦。我原本呢晚都plan左行完呢度去Youme Town，貪佢開到1０點，比商店街好行好多（呢度8點就閂晒架喇），可惜最後搞上網嘅野搞耐左最後去唔到。
雖然話就係商店街但其實佢都連接咗幾個商場嘅，而且真係佈置得好靚，求其影一影都已經幾有feel個環境。
行行下見到有芝士撻食呀，今晚諗住去Youme Town果度間Pablo mini芝士撻。個心都係好想好想食芝士甜品，忍唔住喺度嘆咗個芝士撻同飲茶，同Pablo當然冇得比啦，但係總算滿足我嘅口癮。
入面有少少座位，少人，都幾好坐。
做法唔同，口感唔同，呢個粉好多。價錢同Pablo真係差唔多。
嘆埋杯茶已經好爽，算叫醫左少少肚架喇。
越夜越熱鬧，原來除左主大街，附近好多小巷都有大量餐館。
同埋發現呢度有個特色都幾多鋪頭賣結婚戒指呀，婚紗個類。
有藥妝店，但呢間好細。近係瓦町車站附近都有幾間藥妝的，感覺上大D。
橄欖牛都係呢度美食之一，佢嘅產量係堅少，價錢唔算平，有機會一定要試下食橄欖牛。
佈置得好靚！明顯呢邊Ｄ鋪係Grand好多
呢間係專賣皮革嘅袋呀、銀包等等，算係幾入得手，不過佢就唔俾影相。
呢一個係呢店嘅名物之一，叫KAMADO，據聞因為個樣好得意所以大受歡迎，我個人對佢興趣不大，一睇就知係咬到好粉感嘅野黎。有送俾朋友食嘅，不過冇feedback話好食。
好彩都叫有ABC-MART姐。呢次四國之旅我發現有個買野好去處，之後會再介紹。
高松不愧為香港人嘅新景點，去到邊都會見到香港人。呢日行商店街已經係撞都好多對香港人。 同埋呢度又幾多韓國嘅旅客，你會見到啲鋪頭係話有中文店員啦同埋有韓國嘅嘢食嘅鋪頭嘅。
呢個就係高松商店街最最最Signature嘅位喇，透明圓頂！打卡打卡。好似有Ｄ似曾相識—咁似廣島原爆圓頂館嘅‥‥‥
行到呢個位左訪係冇咩野係，行右邊就可以見到名店，右邊呢條打橫嘅就係高松中央商店街喇。
三越百貨，可惜太早收喇，行唔切，普通店鋪都係收7至8點。
再行前少少就係一Ｄ比較Local嘅老店，向呢個方向會見到好多巷仔，入面有大量餐廳！
去香川縣之前我同大家都一樣都覺係咪得烏冬呀，我上網search幾乎99.99%嘅文章都係烏冬， 我個人就唔好烏冬嘅。但原來就有好多選擇，骨付鳥都係呢度嘅名物， 咩係骨付鳥呢？其實就連骨烤雞髀。
講起骨付鳥呢度係有超多間嘅咁最出名莫過於係「一鶴」。但係我行到去等位呢就發現佢真係好多人排隊， 起碼有十幾個 。門面係好靚嘅即係似專做遊客生意嗰啲呢，唔想排隊點算呀？咁難得嚟到梗係試下local D嘅餐廳啦，另外一間人氣之選叫做蘭丸。
要同大家補充返，一鶴個位置係好近Dormy Inn嘅，係丸龜町商店街第二個街口嘅左轉行過兩條小巷就係喇。
蘭丸就係丸龜町商店街中段近美術館通り右轉，行過1個巷口就到。亦都可係沿住Dormy Inn嘅右手邊，去ライオン通直行，入面有大量大量餐廳，唔想等位都有好多其他選擇。
呢個就係ライオン通，入面好多餐廳架！
蘭丸都要等位但只係需要等幾個。 好快就可以入去坐啦。門面係非常之懷舊，裏面都好溫馨。
門口有得坐住等，可以睇定食咩先。
睇相已經流晒口水。
吧檯位
呢日入面大概有九成半都係日本人，淨返嗰一成就係我同入面有一圍香港人喇。
可能真係多咗好多香港人嚟， 一坐低就問我係咪chinese， 之後就搵咗個中國侍應招呼我。原來佢都係青島人，我發現都幾多青島人嚟日本， 之前係其他城市已經遇過幾個來自青島嘅侍應。
黎到日本梗要食我心愛嘅刺身啦， 呢個刺身set有海膽我覺得值返嘅，1600yen左右。骨付鳥就好平嘅大概880 yen。好多人都會點一個骨付鳥再搭一個小菜。 佢會問你要軟定係要硬定軟，軟嗰隻呢就多汁啲嘅同埋多肉啲嘅，我唔知硬果隻係點呀，佢佢冇好詳細咁講，我就叫咗軟嗰隻。
第一次見到呢個雞髀真係唔知點樣食用， 平時都係包住個個拎起就咁咬。
呢度要用埋較剪，原來佢係要將啲雞肉剪碎。 會送一碟菜 畀你包住食，有啲仲會有飯添。
完全唔知點落手 ，之後侍應見到我咁confuse就幫我處理咗，三兩下手勢就已經將個雞脾剪碎晒。
佢話食到肉味之餘，仲要感受下雞油嘅油香。骨付鳥正確食法就係要葉包住成舊肉再浸油再放入口中。
雖然咁食法真係好唔健康，但又真係幾香幾好食而且佢似係用咗大量嘅胡椒同埋調味料整，係好香㗎，對我嚟講有少少辣，係我未食過嘅料理嘅味道，的確唔錯，呢隻味應該係其他地方搵唔返。
上一次令我有驚喜嘅就係名古屋嘅手羽先，佢就有嗰種感覺，係估唔到嘅味道。
食完嘢就諗住行去 琴電嗰度睇下有冇得搭去Youme Town，發現原來走左班車，之後再過去嘅話夾埋都唔夠一個鐘行，唔去喇所以， 反正之後都行Outlet。
返去酒店休息 之後就可以浸溫泉喇。 要講一講嘅係呢一間房嘅設計其實係冇浴室嘅， 所以價錢亦都平啲。因為Dormy in出名係有溫泉浸，所以我會去浴場嗰度沖涼浸溫泉洗頭，之後再返返房。其實沖涼都係沖得嗰一至兩次，對我黎講真係可有可無。咁當然如果係好著重私隱嘅人係另計啦。
洗手盆係出面又真係幾少見，變相多D位嘅。
同正常大城市嘅商務酒店仔差唔多。
趁間房有wifi，決定之後係有WIFI嘅地方CAP定Google map出黎。唔好同我講好多地方有Wifi，四國簡直係另一個世界咁。就算download左日本旅行wifi connect app，其實最後去左咁多日都係得一兩日有地方收到。
其實唔買sim卡都好嘅，係衰在睇唔到地圖啫，但係就可以令個人更加去感受個環境，唔使成日掛住同whatsapp呀打卡咁。
呢個就係浴場入口：
其實個裝飾都好新淨同幾靚幾舒服。我最鐘意就係出面果個半露天風呂，有Ｄ樹又涼涼地咁幾舒服。
（以下圖片轉自網絡）
出面有成三四部自動售賣機，都好多野飲揀，包括我至愛嘅牛奶！
飲完之後可以去旁邊有一個休息室又有電視睇。
同埋呢度晚上係會有免費拉麵提供㗎，7590yen就已經包埋早餐同宵夜， 又有溫泉浸，地點又好，真係好唔錯，好滿意呢一晚嘅住宿。
今次呢個行程真係超出我預期。冇得上網用Google map原來係咁痛苦！
之後我就Download左個app叫做 Japan Wifi，Login左一次之後就可以自己幫你搵晒所有有wifi嘅地方，自動登錄埋。使用方法同Download可以按此了解。
參考資料：
丸龜町商店街
地址：香川県高松市丸龜町13-2
電話：+81 87-823-0001
交通：從JR高松站乘環線巴士5分可達。或從車站步行15分鐘。 或乘坐高松琴平電器鐵道，在片原町站下車，徒步5分鐘。
南新町商店街
地址：香川県高松市亀井町8-1統知ビル6F
電話：+81 87-834-3805
交通：高松琴平電器鐵道，瓦町駅徒歩10分
高松中央商店街
地址：香川県高松市丸亀町13-2
電話：+81 87-821-1651
交通：
-
片原町(香川県)駅出口徒歩約7分
-
高松築港駅出口徒歩約10分
-
瓦町駅西出口徒歩約11分
骨付鳥 蘭丸
地址：香川県高松市大工町7-4
電話：+81 87-821-8405
營業時間：18：00-01：00
交通：琴電琴平線片原町駅歩行5分
さぬきの湯 ドーミーイン高松
地址：香川県高松市瓦町1-10-10
電話：+81 87-832-5489
交通：琴電琴平線片原町駅歩行5分
是次住宿費用參考：7590yen連稅
(Visited 687 times, 1 visits today)