2017年09月21日
好多人去開香川縣去小島的話，小豆島同直島都係首選，都係景點非常豐富嘅小島。直島就細過小豆島好多，但有非常靚嘅藝術品同美術館，所以絕對係我首選，亦都好啱短Trip唔洗stay overnight。
今次行程主要係想由高松去直島，回程唔走回頭路，回程我會去宇野港（岡山）入住民宿，貪佢又平又方便。亦方便我下一日可以一早出發去倉敷玩。
直島話細又唔細，島上面主要有兩個碼頭，分別係宮浦(西面)同本村(東面）。經直島嘅航線真係好多嘅。至於係邊個碼頭上落方面，我都考慮左好耐：
宮浦港嘅碼頭本身又有得買野、又有Coin locker、free wifi、小cafe、碼頭附近都有好多景點、裝置藝術、Cafe同餐廳，本村港相對荒蕪好多。而直島宮浦都有船可以去宇野，最夜一班去到21:15甚至深夜都仲有，非常方便。今次亦因為要放行李係碼頭，所以係同一個點上落會方便好多，亦即係宮浦港。
如果由高松出發一定會搭到四國汽船嘅航線，航線要分為三大類：
  1. 高松<－>直島（宮浦）—普通船50-60分鐘，高速船25分鐘
  2. 宇野<－>直島（宮浦）—普通船20分鐘，旅客船15分鐘
    宇野<－>直島（本村）—旅客船20分鐘
    宇野<－>直島（風戸）—旅客船20分鐘
  3. 直島（宮浦）－豊島（家浦）－犬島—高速旅客船（40~55分)
分別係來回高松、來回宇野、同跳島遊首選嘅豊島、犬島航線。
今次搭嘅普通船，下層係裝車下上層係裝人嘅，要搭成個鐘，都幾耐。要留意返航班時間表（按此），12:40分班船之後，下一班就係成3點，所以Miss左都幾大鑊。
都幾平丫~
船內籠同香港嗰啲真係爭天共地，人哋真係好靚同埋好舒適嘅，50分鐘船程係咁舒服嘅環境下過得好快。
 拜拜喇高松！
話咁快就到咗直島嘅宮浦港，好多人都係由宮浦出發而且仲可以順便遊覽附近嘅裝置藝術，之後再可以去本村睇嗰邊嘅展館。想參觀超過一個藝術館嘅朋友就要留意 巴士時間， 佢哋個巴士時間唔算好密， 真係要計好曬時間先至會趕得切。
 落左船至下一班車開嘅時間13:55仲有20分鐘，可以去附近景點影下相先。
 行過碼頭後面就搵到好多locker，剛好放到我舍細喼，大喼就問水少少。但都唔多人用，可能通常去直島嘅朋友都會stay喺當地嘅民宿 ， 如果好似我咁晚上係會出番去嘅話， 可以係呢度放咗行李先。
介紹返直島景點先：
基本上呢個地圖就已經有齊晒巴士路線、巴士站同著名景點位置。
一落船已經見到右手邊有一個好矚目嘅打卡位，就係草間彌生嘅「赤かぼちゃ」（紅南瓜）。
實在太多人影嘅關係所以要等到冇人先影真係要返D時間。
 原來有得行入去！
依家算係幾少人喇，坐係草皮欣賞下仲正。
影影下miss咗巴士時間呀， 仲要好衰唔衰係miss咗lunch之前嗰班之後司機就去食lunch之後就要搭成個鐘先會有下一班巴士。
唯有喺去左邊睇咗嘢先啦。呢邊其實都有幾個大型嘅藝術裝置同埋小展館， 例如附近嘅直島Pavilion(直島パヴィリオン)，係南瓜行遠一兩分鐘就到。
 夜晚打晒燈應該會好靚嘅。
向返左邊行就會見到呢度都有幾間單車舖，例如 tvc service，Ogiya rent a Cycle ， 值得一提嘅係 tvc service有行李寄存服務可以將啲大件嘅行李寄喺度嘅，要留意番嗰個關門時間係去到六點。
 左邊方向沿大路行會開始目到好多餐廳。主打都係當地漁獲，但其實直島都有出名嘅野食架～
打算去 宮浦キャラリー六區， 點知有裝修緊喎。By the way呢一區area你都仲可以徒步參觀， 如果打算自由去參觀嘅朋友其實可以考慮租單車，原來我都有考慮過，但上網有search過有好多網友都表示其實啲路唔係想像中咁易踩，有啲落車斜同彎位都係幾急同斜嘅，我呢個成日炒車嘅人就完全放棄咗。
呢邊食肆嘅時間真係好飄忽，有幾間search過唔錯嘅餐廳去到都係冇開嘅，食唔到大人氣嘅直島咖哩喇….
好彩直島嘅碼頭都有個cafe，可以買少少嘢食呀，都有烏冬，飯，串燒等等。 點咗個魷魚飯同嘅自己加咗啲串燒做餸， 再加cremia雪糕， 大概一千蚊鬆啲左右 ， 男士可能會唔夠喉。
 份量真係好細‥‥‥如果踩單車一定半個鐘就消化晒。
初夏嚟到直島其實都幾係嘢，仲要踩單車一定成身汗。搭巴士其實都係一個好選擇嚟。
終於有車喇 ，２號巴士站上車去到「農協前」落車，都幾多人排隊㗎，呢度真係十級多外國人。
本村嗰邊就有將張舊房屋、神社改建成為藝術設施，令到本身普通嘅民房可以打造成同日本傳統、當地生活互相呼應嘅美術空間，喺本村地區目前有七間參加呢一個藝術之家計劃嘅建築。
有興趣嘅朋友呢可以喺農協前站落車之後直接去到Honours Lounge & Archive 度購買入場券。
1031yen就可以參觀晒七棟嘅建築。原本想參觀はいしや同角屋， 呢兩間係我上網睇過覺得最靚嘅，不過諗過之後嘅時間可能會唔夠所以決定只係參觀角屋，參觀單棟設施只係需要410yen 姐。
另外，購買入場券嘅時候可以見到好多直島嘅週邊商品， 好得意又好靚，令到未去完成個直島就已經想買曬佢啦。
要留意番呢一個藝術之家計劃嘅藝術設施嘅開放時間大概都係去到4點～4點半左右。
分別係：角屋、南寺、きん、護王神社、石橋、碁会所、はいしゃ　（詳情可以按此）
沿途見到好多民居， 全部都係木做嘅傳統日本房屋，好有小島風情， 呢間擺放咗兩個自製嘅南瓜係門口，好可愛。
首先參觀角屋， 其實內邊就唔俾影相嘅。
可以見到 一個黑色嘅池裏面有好多時間喺度閃動，好似跌入另一個異空間咁。（官網照片）
另外窗邊亦都有用特殊物料製造， 利用模糊同清晰去製造一個好特別既時鐘，呢一個真係好鍾意，完全唔知佢點整，好有型呀！
冇去到嘅はいしや。(官網照片)
參觀完之後會蓋印， 我諗好少人淨係參觀一間， 所以買飛嗰陣時佢哋都好驚呀點解我淨係去一間。 原本都想參觀埋安藤忠雄嘅博物館， 等我之後都去地中博物館所以就冇去到喇， 鍾意建築嘅朋友都可以去參觀下架。
值得一提嘅呢度都幾多外國人同埋台灣人 ， 可能香港人真係會比較少去直島喇，我見到好多都去小豆島。行到本村港都有一個好大型嘅藝術裝置， 佢叫做直島港Terminal ， 裡裡外外都擺滿曬電單車，本身嘅用義意實係一個去電單車場呀定係乜嘢呢？
旁邊嘅呢間Cafe Konichiwa都一樣好受歡迎架~原本打算就係嚟呢度食lunch㗎啦，下次再來直到一定要去呢一間試下。
 好鬼可愛。
 要留意返由宮浦出發嘅巴士只可以到直島海之家つつじ莊，我地再由本村港搭返之前架巴士至つつじ莊。落車之後原地等轉免費shuttle bus去晒幾間美術館。
呢度主要嘅美術館同博物館有三間，包括，搭shuttle bus都會經過Benesse house museum、李禹煥美術館同埋地中美術館。
 Shuttle會經過黃色南瓜，就係剛剛上車站步行2分鐘的位置，回程一定要黎打卡。
Benesse House museum真係好靚 ，其實佢另外一個身份係酒店， 不過其實佢都唔平㗎同埋係幾難book， 架車駛經benesse house嘅時候好多旅客都話好靚呀，咁靚嘅地方一個人住好似嘥咗少少，下次一定要黎住！
 (網上照片)
 (官網照片)
 個天開始轉陰，有少少擔心一陣影南瓜會唔靚
地中美術館營業時間係10:00-17:00，換言之，如果你同一樣三點幾先去到地中美術館嘅話呢其實應該趕唔切去李禹煥美術館㗎啦，因為佢嘅營業時間係直至到五點鐘。但仍然可以去埋Ｂenesse house美術館嘅。
到左地中美術館，回程落到車之後會首先會進行講解，之後就安排我哋購買入場券，大概2060yen。初初我都覺得佢幾貴， 但係最後我發現呢一間美術館真係好值得一到，呢個價錢係絕對值得嘅。
買完飛之後步行一段路就可以進入地中美術館，進入美術館嘅範圍係唔可以影相㗎將我唯有cap網上嘅照片 畀大家 睇下。
喺2004年設立嘅地中美術館係埋藏於地面之下， 設計師安藤忠雄有別於以往喺地面設計嘅建築，改喺地下， 由空中望落去可以見到有唔同形狀， 而身處其中起亦都可以望上上方， 見到唔同形狀嘅空間其實係一個個展示室嘅分區。
 所以要行一小段斜路。
黎之前都冇咩了解過地中美術館有咩大作，估唔到竟然有三幅莫內晚期嘅睡蓮，佢地係鎮館之寶黎。一入去嘅感覺係非常壯觀。地下係由好特別嘅一粒粒方型物料鋪砌而成（唔知咩黎，要除鞋參觀），非常值得細心觀賞。
（網上照片）
 （官網照片）
其實仲有仿照莫內嘅睡蓮池所設計嘅荷花池，但係就唔係好靚‥‥‥
另外由美國藝術家Walter de Maria嘅作品係我最鍾意嘅 ，係一個非常大嘅空間之中有樓梯， 擺放咗油金箔製成嘅裝置再配合埋直徑2.2米嘅球體放置於樓梯中間， 圓拱形嘅天井大入嚟嘅自然光，將周圍嘅木雕裝置同環境投影喺球體中間，唔同嘅時間、天氣、角度可以睇到嘅球體上面嘅有唔同變化。
 好靚，《Time/Timeless/No Time》真係令我非常難忘。大家可以行上行落由唔同角度去觀賞。
另外一個嶄新嘅體驗就係由藝術家James Julia嘅作品帶畀我嘅， 佢有好幾個作品。但呢個作品係透過佢擅長嘅光與影製作一個與別不同嘅空間，參觀人士可以進入呢一個空間嗰度感受好似夢幻迷一樣嘅感覺。就好似走咗入一個夢境一樣，呢個夢境係充滿咗唔同人，佢哋全部都係呢個作品中間，我覺得可以透過觀察佢哋嘅行為動作同埋融入周圍嘅空間，令到佢哋都成為呢件藝術品之一，呢個感覺係非常有趣嘅。
（官方照片）
 其實仲有幾個作品，但以係比較深刻嘅。另外亦都好鐘意呢個美術館嘅設計，我發現我已經不知不覺地愛上安藤忠雄先生嘅風格。
 （網上照片）
行完地中美術館之後仲可以去佢嘅cafe， 座位面對瀨戶內海美景， 佢地有售賣三文治同埋特色飲品。
（網上照片）
我就揀咗呢個鹽味嘅汽水，呢支湛藍色嘅飲品令我精神為之一陣，對住個靚景真係令到個人瞬間被療癒。
亦都可以到外面進食， 落下一層亦都有一個非常之優美嘅環境可以提供畀多人同時喺小花園內享用。
地中美術館不愧被譽為「為藏品而建的博物館」，雖然作品好少，但個個都非常有感染力！鐘意美術．空間設計嘅人一定要黎朝聖。
行完地中美術館之後就搭返車出去shuttle bus嘅上車站「直島ふるさと海の家つつじ荘」，再步行４分鐘就到南瓜喇！
去睇草間彌生嘅另一個南瓜。佢位於一望無際嘅海邊，影相更靚！
 其實右邊再直行就係Benesse House喇。出返去宮浦港嘅巴士接駁時間都有啲距離，有成大半個鐘可以慢慢喺度睇下靚景，亦都可以去行去Benesse House Museum嗰度睇一睇。佢係咁多個館最夜關門，都有少少時間行嘅。
 不過呢個南瓜真係令我好著迷‥‥‥
呢個南瓜真係好大個好靚我都忍唔住喺度影咗好耐相。
 感謝係一個人嘅旅行中有新加坡遊客幫我指照，仲要影得幾好呢～
影完相之後終於等到宮浦港嘅巴士，呢架巴士真係好得意呀，係限定版嚟㗎。唔係架架巴士都係咁嘅樣㗎， 作為旅程完結之前嘅交通工具， 令我好印象深刻。
去到宮浦港， 原本打算食嘅兩間餐廳都散咗不過都可以推介畀大家嘅網上comment都好唔錯，分別係「Con.na.mon」同 有靚景嘅海鮮燒肉燒烤餐廳「海鮮．燒肉へんこつ苑」。 不過呢一晚得番Uogashi7070開咋， 佢都係島上面旅客推介嘅餐廳之一。
點咗個燒魚set ， 味道都ok嘅，價錢就偏貴大概2600yen。
刺身都幾好食。但個環境方面就唔係太舒服，有少少昆蟲係度飛黎飛去。
食完嘢心思思行咗去I love 湯 嗰度望下，如果住喺呢度附近嘅民宿嘅話，的確係一個幾好嘅選擇，可以體驗下日本嘅錢湯文化。
 但晚上都幾多人架，我又要搭船去宇野，所以留返下次先黎玩。
 佢係一間好有特色嘅錢湯，其實想浸都可以浸埋先走，直島呢邊雖然有海風，但初夏都幾熱。（網上照片）
靚過一般錢湯好多呀！（網上照片）
呢個係最靚嘅碼頭，坐一陣就搭船出發到宇野港嘅民宿， 值得一提嘅 係直島上面嘅民宿數量唔多， 好多時都好full ，除非你好早book。 如果唔介意嘅話其實可以喺宇野嗰邊租住民宿， 嗰邊嘅價錢會幾平亦可以經果邊去岡山同倉敷，都幾近架。
去宇野港嘅船班次係非常之多，夜晚九點幾都仲有船嘅而且船程只不過係 20分鐘 ， 可以玩盡啲。到達嘅時間已經係晚上9點，大概行十分鐘左右就到附近嘅民宿。
一落咗船向左沿住個岸邊行8分鐘就到達玉野魚市場， 嗰邊就真係幾靜下，一個女仔係幾驚嘅，伸手不見五指，我趁電話仲有電就開左電筒。另外一個選擇係碼頭對面嘅Uno Port Inn 。
呢座民宿係好大座嘅，叫HYM HOSTEL。我都係第一次住呢D工業風嘅地方， 我之前喺air bnb見佢嘅相完全唔係咁樣嘅（本身係好光猛好靚），無啦啦做咩要加綠色燈呢？好似鬼片呀‥‥‥
因為夜晚嘅關係呢 ， 呢一間民宿又唔算多人住，喺下面望上去啲燈都冇乜點著， 就開始令我產生大量嘅幻想。 你知一個人去旅行呀最怕呢啲㗎嘛，之後佢仲有個介紹好似係話佢原本係一間廢棄嘅房屋改建而成（以我僅有嘅初學者水平自行理解），呢個令人產生更加多嘅幻想。 我都冇好仔細咁影相， 因為嗰個moment我已經係驚到極點。
好彩佢又有wi-fi，咁我都可以打機分散下注意力。 其實呢類型嘅工業風民宿都有分真工業風同偽工業風㗎。 咁我又好衰唔衰佢走去研究人哋個裝修，發現佢係真工業風嚟㗎…..
我間房係四樓，每一層都有廁所嘅但係沖涼就要去2樓，一路行落2樓嘅時候，見到其他房間亦都唔似有人，好似得嗰兩間著燈。同正常民宿一樣，除咗冇牙膏牙刷、拖鞋之外，毛巾、洗頭水、沐浴露、風筒、洗衣機都有嘅， 但係我衰細膽囉，呢晚就係戰戰兢兢之下沖咗個快涼就去瞓啦。
原本日頭係咁嘅：
（自air bnb)
唔好笑我，我真係一個好怕鬼嘅人黎。希望之後一日有豐富嘅行程，會先行倉敷嘅outlet同埋 美觀地區，晚上就會到琴平一間非常之靚嘅溫泉旅館嘆返晚，唔洗再咁驚喇。
莎朗路線:
高松港-(50分鐘船程)→宮浦港-(步行1分)→草間彌生「赤南瓜」-(步行3分)→直島パヴィリオン-(步行6分)→宮浦ギャラリー六区
-(町営バス11分鐘至農協前．步行1分鐘)→本村ラウンジ＆アーカイブ-(農協前步行1分鐘)→家プロジェクト 角屋-(步行3分鐘)→直島港ターミナル-(步行至本港港轉乘町営バス約5分鐘到つつじ荘站轉乘Benesse House Free Shuttle Bus約7分鐘到達)
→地中美術館-(乘Shuttle Busつつじ荘站步行3分鐘)→草間彌生「南瓜」-(步行3分鐘至つつじ荘站轉乘町営バス至宮浦港約12分鐘．步行3分鐘)→Uogashi 7070-(步行1分)→I♥湯-(步行1分)→宮浦港-(20分鐘船程)→宇野港-(步行8分鐘)→民宿
直島觀光資料參考：

宮浦景點：​
草間彌生「赤南瓜」
地址：香川県香川郡直島町宮浦2249−49
交通：宮浦港碼頭步行1分鐘
​
​
直島パヴィリオン
交通：宮浦港碼頭步行3分鐘
宮浦ギャラリー六区
地址：香川県香川郡直島町231077
開放時間：（不定時，須參考官網）
交通：宮浦港碼頭步行6分鐘
​
海鮮・焼肉へんこつ苑
地址：香川県香川郡直島町2249-7
電話：+81 87-840-8266
營業時間：11:30-14:00；17:00-22:00
交通：宮浦港步行1分鐘

​

Uogashi 7070
地址：香川県香川郡直島町宮ノ浦2298-1
電話：+81 90-2544-1124
營業時間：11:30～14:30（定休：星期一）
交通：宮浦港步行３分鐘
​
莎朗沒有到但也很推介的：
直島銭湯「I♥湯」- 地圖|官網

本村景點：
本村ラウンジ＆アーカイブ
網站：http://benesse-artsite.jp/
地址：香川県香川郡直島町850-2
電話：+81 87-840-8273
營業時間：10:00～16:30（星期一休館）
交通：巴士農協前站步行１分鐘
直島港ターミナル
交通：巴士農協前站步行２分鐘
​
家プロジェクト 角屋
網站：http://benesse-artsite.jp/
地址：香川県香川郡直島町792
電話：+81 87-892-3223(Benesse House)
營業時間：10:00～16:30（星期一休館)
交通：巴士農協前站步行1分鐘
​
莎朗沒有到但也很推介的：
Konichiwa Cafe – 地圖|Tabelog  (人氣餐廳之一)
Aisunao 玄米心食 あいすなお – 地圖|官網  (人氣餐廳之一)

Benesse Art Site：
草間彌生「南瓜」
交通：於つつじ荘巴士站步行3分鐘到達
​
地中美術館
地址：香川県香川郡直島町3449-1
電話：+81 87-892-3755
營業時間：
3月1日 ～ 9月30日10:00 ～ 18:00（ 最終入館17:00 ）
10月1日 ～ 2月末日 10:00 ～ 17:00（ 最終入館16:00 ）
(星期一休館)
​
入場費：2,060円；15歲以下免費
交通：於つつじ荘巴士站轉乘Benesse House Shuttle Bus約7分鐘到達
莎朗沒有到但也很推介的：
Benesse House Museum – 地圖|官網
ANDO MUSEUM – 地圖|官網

宇野
民宿：http://bit.ly/uno_airbnb
莎朗住宿費：HKD 422 – 單人大床房
​

 

(Visited 385 times, 1 visits today)