2017年09月21日
第二日喇，如果話高松好多嘢玩呢又唔算，但係如果好似我咁畀一日畀佢嘅話又唔夠， 今日嘅行程呀上晝都仲會係高松，下晝就會去直島。
介紹返高松市內最主嘅交通工具就係JR予讚線（至東面）、琴電琴平線（中間垂宜），JR高德線（至西面），去小島就一定要去高松港，其餘地方都係靠巴士同大家隻腳，完全唔複雜。
呢日嘅行程真係十分之趕，因為琴晚深層睡眠晨咁早就起身左，七點幾。以為仲有大把時間點知搞下搞下出門口到已經九點，check 左out 放咗行李喺瓦町站之後就去食個靚烏冬先， 我知道好多香港人都會住喺高松站附近有間叫JR clement 嘅酒店， 但其實嗰度並唔係最旺嘅地方反而瓦町站係最旺嘅，而且無論去返琴日講嘅Youme Town定係去栗林公園都係大約兩個站就到，好近。
擺低行李係瓦町站之後就徒步行去食烏冬，附近有一個建築係好特別嘅， 鍾意睇建築嘅朋友不妨去睇下，就係由日藉建築師師丹下健三打造嘅香川縣廳舍—佢曾經被Casa BRUTUS雜誌評選為「一生一定要參觀一次的世界百大建築」之一。
不過我行到去嘅時候發現原來佢整緊，諗住去睇下有啲咩嘅但係咩都冇得睇。連果個本來靚到暈嘅庭園都整挖到當爛晒。
仍然見到呢種設計真係好難令人聯想到原來係1958年建成，至今差唔多60年，真係潮爆。
裡面其實係有展覽同導覽服務，仲有cafe，不過門口都整修緊，我又好肚餓，食野緊要Ｄ。
附近有一間非常之有名氣嘅手打烏冬店—さか枝，我都見到唔少觀光客走嚟食嘅。雖然去左十幾次日本，但真係未試過係傳統烏冬店度食烏冬。
呢度D烏冬店都係非常自助式，買左個基本款烏冬之後，就可以加埋餸，有天婦羅、炸物,之後就去埋單。因為烏冬基本上淨係得豉油同埋嗰啲料喺度啦，可以根據自己喜好嘅程度就加啲熱湯呀、蔥花咁樣。一般烏冬店早上都十分多人，我建議大家唔好咁早，等9點打後去食避過人潮。
佢地D份量又出奇地大，食完連Lunch都可以唔洗食。
個麵質真係非常彈牙，同我哋香港我諗任何一間嘅烏冬或者出面買又好超市買都好，係完全唔同。仲有重點係平時係煮完係會有陣酸酸地嘅味，我唔知點樣講(唔係過期嗰酸味)，但佢就exactly冇陣酸味， 一有個種酸味我就唔食嘅。
我終於明白點解 日本當地嘅特別好食，因為果種新鮮真係唔係可以話空運媲美到。
由烏冬店行去栗林公園大概十分鐘左右。
入場費大概410 yen。
中途都見到覺非常之搞笑嘅JR站，出口竟然和係一間神社上面咁樣標示，好奇怪。
 個公園真係大到一個點‥‥‥
栗林公園係國家一級名勝 ，都係睇下嗰啲花花草草呀咁樣， 我哋由北門入嚟其實沿途見到嘅人唔多，最正路嘅入口應該係喺東門嘅。
超大嘅荷花池， 同埋人咁高嘅荷葉。
栗林公園係有國家指定名勝之中最大嘅園林，唔知係咪咁所以有大量天皇種植嘅樹，哈哈哈。
北門呢係比較少嘢睇呀，冇咁多靚景嘅， 我採取先苦後甜嘅方法，我由北門行去東門， 睇到嘅景致就會越嚟越靚。
呢間商工獎勵館嘅裏面都有一啲香川縣嘅出產嘅工藝品，烏冬歷史嘅介紹等等。
Ｄ野都真係傳統手工藝品，但絕對唔平。
原來有咁多種烏冬‥‥‥
 呢度仲有得食烏冬架。
 間餐廳都幾靚。
二樓嘅傢俱由中島喬治先生設計，佢被譽為美國20世紀家具設計嘅創新領袖之一同美國工藝運動之父。佢擅長利用木嘅紋理製造出結合和風同美國現代化風格嘅傢俱。
呢set枱櫈對當時嚟講係嶄新嘅設計，出產嘅時候就被受質疑過呢種設計，會唔會好容易損壞，但係事實證明咗其實佢係比起其他嘅枱櫈嘅損耗程度仲低。
有好多唔同形狀嘅松樹， 但係比我想像中嘅栗林係冇咁靚。
行行下真係好熱呀，呢度啲溫差都幾大，我仲笠住件都幾厚嘅短袖。去咗小食亭到買咗啲宇治抹茶嘅沙冰食啦。
北門嗰幾個池D水都係比較污濁㗎，係得最後近東門嗰幾個池D水先比較清澈。
 越行見到越靚嘅園林。
行咗大半，我發現咗一樣嘢， 就係D天皇好鍾意黎呢度種樹。
 嘩嘩嘩，終於見到最經典嘅景色喇！
近住飛來峰嗰邊可以見到有幾多人喺度搭船仔， 都幾趣緻架，佢哋帶住嗰頂帽。
 經過呢條小溪行去飛來峰。記得一定要去飛來峰觀賞最經典嘅栗林公園景色， 嗰度係全個栗林公園最靚嘅景色嘅地方。
雁月橋上的景色都一樣好靚。
終於行完成個栗林公園， 都要成個鐘。 東門嗰邊有一間售賣香川縣特產嘅鋪， 之前都冇乜點買到嘅特產，最後就喺呢度掃咗幾樣嘢。
呢度仲有好多一包包包裝得好靚嘅烏冬，送禮自用皆宜。 對烏冬冇乜興趣嘅我竟然會嚟買烏冬，真係連自己都估唔到。
 仲有上篇講過嘅名物‥‥‥
 烏冬呔真係好搞笑，如果買黎送俾男友佢一定殺左我。
 真係幾大行，雖然我都行得幾足，快行都要成個幾鐘。
原本之後嘅行程係去北濱alley， 再去搭船去直島， 但係我之前喺見到網上見到麵包燈就一見鐘情， 上網check過其實佢只係部份舖頭度有入貨嘅， 係香川只係得一間小店有得賣，所以我要搭返車由栗林公園去太田站。
因為時間真係非常緊迫， 其實我已經放棄咗整個北濱Alley唔行， 但係仲要來來回回，落車仲要行8分鐘路程， 之後仲要返返去瓦町站攞行李， 記住呢度啲車係唔同大城市，佢唔係五分鐘十分鐘一班，佢有啲班次好密有啲班次好疏。
太田站行去casa on style， 要趕到去直島嗰班船12：40我要喺 20分鐘之內完成曬所有嘢，當中包括來回共18分鐘嘅路程行去Casa on style舖頭。
 要喺兩分鐘之內決定自己買邊盞麵包燈真就好困難。麵包燈都係用真麵包再加上樹脂製作，一開咗係好靚嘅，可以睇下個官網相。

好靚，但我真係冇咩時間去欣賞‥‥‥

（官網照片）

我真係低估咗日本sales包野嘅速度，只可以話，佢地真係太細心喇‥‥‥ 行過黎慳咗嗰兩分鐘就咁就冇左…. 唯有跑返去太田站搭電車。
其實心裏面已經打定輸數， 有機會趕唔到12點40分嗰班船，其實再下一班船已經係三點幾我去到直島有D啲博物館已經閂咗。
仲要係瓦町站拎行李，真係10級趕。
瓦町算係大站‥‥‥
就算到左高松築港都唔可以鬆懈，鬼咩‥‥‥我Ｄ時間用得太盡喇。一出左站後向海邊行就到高松港。
呢間酒店我見過之前有好多 youtuber都有介紹過，相信係極多香港人住，係幾近海邊嘅，又靚嘅，附近我仲有幾間大型商場。
過右邊嘅馬路直行就到。
行去碼頭果段路我真係連跑帶跳咁衝過去。
途中見到呢個好出名嘅裝置藝術—Liminal Air core，係大卷伸嗣先生嘅作品。
再直行就到左邊1、2(普通船)同3號(高速船)碼頭，就係去直島嘅碼頭喇。
見到呢個作品就像徵住我的半日藝術之旅嘅開始喇～其實去前冇做過咩特別research，唔知原來佢係度，係有D驚喜嘅。
買完船飛就衝上船去直島～瀨戶內國際藝術祭每三年舉辦一次（上一次係2016年，下一次是2019年)，當中瀨戶內海好多小島上有好多唔同嘅藝術品及裝置，藝術祭完結後島上仍然有好多作品俾大家欣賞，作為一個曾經好熱愛美術嘅人，我覺得點都要去睇下。
但要留意返，如果想玩跳島就唔會有好方便嘅船去個別小島，好多都要經返高松，大家如果上網search島同島之間嘅交通，記得要留意返網站上航運日子。
至於點解揀直島？因為我覺得佢係咁多個島中最最最多野睇嘅，除左藝術品亦有幾間美術館、更有特色cafe同埋超靚錢湯，可惜最終去唔晒，但都係非常難忘嘅～會係下篇遊記介紹直島。
莎朗路線:
瓦町駅-(步行10分鐘)→香川県庁舎-(步行2分鐘)→さか枝-(步行12分鐘)
→栗林公園-(東口步行7分鐘至琴電栗林公園駅琴平線乘2站至太田站)-(步行8分鐘)
→Casa On Style-(步行8分鐘至太田站乘至瓦町站)
→瓦町駅-取行李-(乘丁電琴平線往高松築港方向)→高松築港駅-(步行7分鐘)
→Liminal Air core→高松港直島航線之售票處。
香川県庁舎(香川縣廳舍)
官網：http://www.pref.kagawa.lg.jp/
地址：香川県高松市番町四丁目1番10号
電話：+81 87-831-1111
營業時間：08:30-17:15
交通：琴電瓦町駅徒歩約10分鐘、JR高松駅徒歩約20分鐘
​
さか枝
官網：http://www.sakaedaudon.jp/
地址：香川県高松市番町5-2-23
電話：+81 87-834-6291
營業時間：5:00～15:00
交通：
JR高徳線「栗林公園北口」駅より、徒歩10分
琴電各線「瓦町」駅(西口)より、徒歩15分
Tabelog食評：https://tabelog.com/kagawa/A3701/A370101/37000026/
​
地址：香川県高松市栗林町1-20-16
電話：+81 87-833-7411
營業時間：～7時00分～17時00分；按月份而定，請參考官網
入場費：大人 410円 / 小童 170円
設施：有Locker
交通：
  • JR栗林公園北口站徒步3分鐘
  • 高松琴平電氣鐵道琴平線栗林公園站徒步10分鐘

​

電話：+81 87-869-0261
營業時間：10:30-19:00(星期二&第一個星期三休館)
交通：琴電琴平線太田站步行8分鐘
​
高松港(至直島航線之售票處)．Liminal Air core(步行至高松港中途會經過)
官網：https://www.shikokukisen.com/stand/
地址：香川県高松市サンポート8番22号
電話：+81 87-821-6798
營業時間：出發前40分鐘~19：50
交通：琴電高松築港駅步行7分鐘
​
(Visited 248 times, 1 visits today)