2017年9月22日。
呢晚嘅我入住嘅酒店就係位於琴平。金刀比羅宮係琴平最出名嘅景點，可能會問點解去琴平唔去埋金刀比羅呢？ 一個人行咁多級樓梯，邊有意志？我住琴平嘅主要原因係第二日我係需要去一站之隔阿波池田站嗰度參加祖谷嘅local tour。
琴平嗰邊有好多溫泉旅館，我相信最多人揀嘅應該係琴參閣同埋櫻之抄，呢兩間好多團過嚟住，價錢亦比較平，不過我真係好怕嘈。而呢間琴平花壇其實算係呢邊比較高級嘅溫泉旅館， 平均都要千五蚊一晚，亦都係較遠，如果步行係要15分鐘，所以冇揸車最好book定free shuttle bus。
呢晚由JR倉敷站去岡山再轉特急南風號去琴平，19：19就到喇。一到站就已經見到個司機等緊我。
一路揀酒店，都覺得呢間好唔錯，雖然貴少少，但原來佢係有D著數plan，即使我一個人住都好抵。出面好多溫泉旅館都要二人入住，但其實唔係間間溫泉旅館都係咁嘅。

有一啲溫泉旅館係可以提供一人入住嘅plan，例如我之前去熱海下田大和館同今次琴平花壇，佢哋都有一個叫做一人旅嘅plan， 咁當然唔好expect 呢啲plan會畀到好靚嘅房畀你，因為佢哋靚少少嘅房係for family同埋多人入住，係會俾最basic嗰隻房畀你，但係嘢食全部都係一樣。

因為我到達嘅時間係比其他客check in時間遲，我都request咗shuttle bus嘅接送，係免費嘅。 因為由JR站去琴平花壇係要行15而且部份路段係斜路，如果搭車嘅話大概五分鐘就到。
門口有個小型嘅停車場，自駕遊嘅朋友都唔需要擔心。
Check in 完佢哋就帶咗我去我間房，呢一間就係最standard嘅房間，位於翠山閣，翠山閣嘅房間全部都係和室， 景色方面可以見到琴平花壇裏面嘅日式庭園。 呢一隻係佢最基本嘅房間， 呢間溫泉旅館都有啲歷史㗎， 不過可以同大家講個，內籠仍然係好靚而且佢keep得好好。
官網照片對比：

另外有一啲靚啲嘅房間例如位於松月Terrace 嘅和洋式嘅房間，就可以眺望到 鞘橋 同埋讚岐富士。

我非常鐘意上圖下面果隻房，名為富士見台，佢係有和室、和洋室、同埋有露天風呂嘅房間揀， 可以見到讚岐富士、金刀比羅附近嘅象頭山同埋森林等等嘅景色，都幾適合情侶入住㗎。
另外仲有三間 各有特色 嘅獨立屋， 長生殿就有檜木風呂， 延壽閣就係非常傳統的日本建築， 泉亭就有洋式嘅天蓋式大床。

呢度嘅浴衣都幾靚㗎，同埋佢嗰條腰帶唔同平時嗰種好幼身。只係喺我之前去過嘅下田大和館嗰度先見過呢一類型嘅粗身嘅腰帶，有Ｄ似出面浴衣嘅腰帶一樣， 通常係喺高級旅館先會有呢一類型嘅腰帶。
呢間溫泉旅館最正嘅地方，就係可選擇少餸嘅plan。

平時溫泉旅館好多女仔都覺得啲餸菜太多太飽，而佢有一個叫做三餸一湯連甜品嘅plan 就係 只提供一般嘅住宿plan中最好味嗰幾樣高級料理，咁就剛剛好又唔會太飽，又食到好西又浸到溫泉。

晚餐時間就喺lobby上一層，呢個係我嘅晚餐呀。
頭盤有鳴門金時。即係甜薯片，我真係第一次食， 意料之外地好食。一向最怕好粉嘅口感嘅食物，整成一片一片係真係好香又易入口。
另外重頭呢個刺身盤係我非常之推介，裡面係有鯛魚、間八同埋角榮螺， 間八係咩嚟呢？佢係最頂級嘅鰤魚之一， 即係一般嘅紅鰤魚要生到兩米先至可以稱為間八（如錯誤請糾正。
係日本最高級壽司食材之中名列前茅㗎， 最好嘅食用時間就係初秋，亦即係依家呢個季節。
另外一個就係讚岐牛同埋松茸石燒， 有去過小豆島嘅朋友應該都知道小豆島係日本培育和牛最早嘅地方，當時貞叫做讚岐牛。而小豆島嘅特產橄欖，將佢用黎製作成和牛嘅飼料就會變成更高級嘅橄欖牛。
我都唔清楚呢個係橄欖牛定係普通嘅讚崎牛，聽聞讚岐牛當中有八成都係橄欖牛。
題外話， 松茸係我非常之鍾意嘅菇，唔知點解香港冇賣。 今次喺四國見到連超市都有賣，價錢都好平， 如果鍾意食嘅朋友可以考慮下買啲返香港食。
 我亂燒都勁好食。
另外不得不讚嘅就係讚岐米， 呢款米真係又香又軟，真係超級好食。食讚岐牛嘅時候佢亦都會配上呢一個飯麵豉湯同埋一個小前菜。
最後嘅甜品係和三盆卷蛋糕， 和三盆係黑糖嚟， 雖然個蛋糕無味側邊又配咗兩塊奇異果( 咬過先嚟影相)， 但真係太甜相呢個蛋糕我只係食到一半。
食完飯之後其實都已經好飽喇（男士應該會唔夠）， 又未浸得溫泉，之後我就上咗3樓，3樓會有個靚境足湯， 呢個足湯呢可以眺望琴平同埋琴平花壇嘅夜景， 附近放左毛巾畀你抹腳。
一個人望住夜景，吹住涼風，浸住足湯真係好爽呀。
另外三樓仲有一個Lounge可以飲酒架～ 附近都亦有電腦同埋按摩椅。
食完飯之後就返酒店房度休息一陣啦，夜D再出去浸浴，沿途經過呢個日式花園，心曠神怡。
返到去佢已經為我準備好床鋪。
休息完一陣之後就出去浸吉祥之湯。
附近有竹林，又可以眺望琴平景色嘅露天溫泉，裏面亦都有大浴場， 晚上就係女仔浸，日間就係男士浸。
喺呢度浸完真係好relax好舒服。
 官網日景照片：

之後就趁Lounge未閂嘅時候去order一杯Bloody Mary喺度享受一個人嘅浪漫。
成間溫泉旅館我都非常滿意， 唯一不滿嘅係佢哋嘅網絡係幾差下，有部分地方係完全收唔到，對於我呢啲淨係靠wifi嘅人，又冇上網卡係好痛苦嘅一回事。
 按摩埋可以令溫泉效果更加好～
早餐方面冇影相，係一般溫泉旅館都有嘅和式早餐，有燒魚呀、玉子等等，唔算特別，有少少失色。

日歸plan選擇多
好想介紹俾大家嘅係佢嘅日歸Plan（即係即日來回plan）。想即日來回琴平又想hea下的話，呢度係有好多日歸plan選擇：
  • 基本plan係包左lunch同浸溫泉的料金，仲可以用5個鐘（12:00-17:00)，算係好長時間，只係3千幾yen，好平。平時D日歸plan好多都係得3-4個鐘。

  • 有D plan包一間房俾你休息。想食豪D都可以揀會席料理。亦可以揀係獨立屋嘅日式庭園度食Lunch，有D仲包埋60分鐘嘅MASSAGE。

  • 佢仲有好多溫泉旅館都唔會有嘅：０泊２食
    係包晒午餐同晚餐(午餐係附近烏冬店度食，晚餐係會席料理），但係唔Stay overnight，可以由中午12:00去到晚上10:00，stay富士見台房。
咁多款日歸plan嘅溫泉旅館我都係第一次見！如果冇咩budget嘅朋友算係唔錯嘅選擇，當然上述嘅越包得多野越貴啦。

第二日我就要出發去四國嘅秘景——祖谷， 參加 local tour嘅好處就係交通唔方便嘅地方，唔需要再plan任何野就可以遊覽， 唔需要擔心班次嘅問題。
如果有book咗祖谷裡面嘅溫泉旅館嘅話，亦都可以喺完咗local tour嘅時候， 睇下旅遊巴會唔會順道經過你嘅溫泉旅館，順便喺附近落車 ，咁可以節省咗好多交通時間㗎啦。
琴平花壇
地址：香川県仲多度郡琴平町1241-5
電話：+81 877-75-3232
交通：JR琴平站包接送，大約5分鐘車程
​
是次費用：15,120yen包一泊二食（入住山翠閣）
(Visited 371 times, 1 visits today)