我哋呢一晚嘅目的地係橫濱嘅櫻木町，所以我哋要由新宿再轉半個鐘JR再轉線。拎住咁多戰利品真係好唔方便，其實最好係新宿/上野Stay一晚會好D。
我哋落車嘅位置喺JR櫻木町駅，需要喺橫濱站到再轉車。我哋間酒店叫做Hotel Edit Yokohama，位於櫻木町關內同埋馬車到三個站之間，話近唔近話遠唔遠，勝在主要嘅景點都可以步行到。
最後一日我哋要搭六點半嘅航班返香港所以要搭京急嘅夜行巴士，我哋以前check過櫻木町係有夜行巴士嘅站所以先揀附近嘅酒店。咁當然如果住過附近大型少少酒店嘅朋友應該會知道部分酒店
係有夜行巴士站。
我地呢晚真係拎住好多野咁移動，好攰呀 ! 真係冇諗過係輕井澤outlet會買到咁多野~只係短短5分鐘已經覺得好似過左20分鐘咁‥‥‥
由櫻木町行過去酒店中途就可以見到呢呢個靚景~
呢間酒店我哋上網book嘅時候就唔知佢個實際個樣係點，因為當時都算新嘅(其實係自己懶冇check)，佢啲相呢就影到佢嘅standard嘅房都有橫濱夜景睇，間房又屬於中等size嘅。
入到Lobby又幾試正又幾新淨，個格局係新派酒店嘅設計，朝早又有canteen又可以斟免費咖啡飲，總之就好大期望啦。
之前都提過我哋已經買咗好多嘢，基本上每人已經係有一個大喼同埋一個旅行袋已經係全full嘅，入到去間房真係極度失望，細到一個點係你返開個喼都有問題。
兩個人淨係可以靠行上張床去去廁所，我哋仲打算stay 2日2.5晚，即係有一晚半都要係度渡過‥‥‥如果駐點係東京而我哋過嚟呢邊呢兩日一夜，呢間酒店房係絕對冇問題嘅，但依家真係細得太誇張，雖然外觀係幾新淨但係我覺得完全接受唔到。
覺得係畀佢網上張相呃咗。
網上張相是咁的 ! 明明係Semi Double，但依家好似仲細過Single咁‥‥‥一流的攝影技術 !
我就唔清楚其他住客有啲咩嘅感受，我淨係覺得我係畀相呃咗囉。
話雖如此，但佢都係有好處嘅，如果唔係點可以做到橫濱No.7的酒店(by Tripadvisor)？佢嘅潔淨度係非常高，價錢亦都係想像唔到地平，我曾經見過佢最低又可以去到294蚊港幣一晚，係兩位成人，平均每位唔洗150蚊港幣，仲平過住民宿同膠囊。
我哋嗰次book就貴少少大概係每位275蚊，其實以佢呢個絕佳嘅地理位置黎講，真係好抵。至於點解話佢個location咁正呢，睇埋之後兩日行程嘅post就明㗎喇。
今晚我哋就去咗附近嘅一條食街度食嘢，呢條食街係我無意中喺google map嗰度發現，少見旅遊書有提及，冇計橫濱太多嘢食啦，講吸引力可能輪唔到呢條食街，但係呢一條食街的確係平民之選。
有酒店步行5分鐘就可以到野毛區嘅美食街，裏面食肆林立，你想食嘅中華料理，日本料理，西餐，燒肉，串燒，俱樂部，鐵板燒，卡拉ok拉麵，咖哩都有！！！你冇睇錯，呢區就係充斥著大量呢啲唔同類型嘅食店，所以要搵好嘢食啦即係要睇google map嘅。想搵嘢食唔難嘅，通常見到Google map內橙色嘅呢就係餐廳或者shopping嘅地方，如果嗰一區係有大量嘅橙色呢，即係嗰度係最旺嘅地方。
野毛町~
去到呢一區已經見到有好多local同friend喺度聚會嘅傾計食嘢咁樣，反而遊客係真係唔多嘅。途中經過見到呢間毛澤東語錄嘅餐廳都幾搞笑。
我哋想試下嗰度嘅一間餐廳叫做花千庵，都幾出名㗎。佢都出咗名係Tabelog Top5000嘅食肆，亦都係Retty嘅人氣店餐廳之一。估唔到，呢間餐廳呀真係低調咗一個地步我幾乎搵佢唔到，幾乎係冇名牌只係得一個燈籠話係食蕎麥麵而且門面係黑色嘅‥‥‥好可惜嗰日食唔到喇，因為佢一早已經Full咗，好失望呀！
冇辦法，我哋唯有去附近嘅餐廳覓食，黎到一間叫做鳥良嘅居酒屋，一邊好懷舊嘅氣氛吸引咗我衝咗入去。相信大家去過東京可能都識呢間野，佢係出名食手羽先嘅居酒屋嚟嘅。
喺東京其他地方都有分店，尤其是係新宿嗰間好多人都會去食，佢嘅佈置同一般分店唔同，係細好多同埋佈置成好似十幾年前嘅居酒屋嘅味道。
我對馬肉喺情有獨鍾，呢間有得食馬肉。佢哋就冇中英文menu，但唔洗擔心，Menu好多圖可以看圖識字咁點菜嘅。
呢度嘅馬肉大家睇個顏色都可以感覺到佢嘅新鮮。
嚟到鳥良梗係要試下最出名嘅手羽先啦，好好好好好味~
呢一個蝦嘅煎餅就就唔係咩特別野，食落都覺OK。
好少去日本食煎餃但係日本嘅煎餃係真係堅好食嘅。
手羽先係堅好食啦所以我哋就encore多次。
最後我哋都唔夠喉呀都要食啲飯打打底，點左呢個好似味噌牛肉飯，佢加左蛋之後撈埋呢入口係好香好好味，我最欣賞呢個飯！
之後我地就返返酒店喇~ 返酒店之前去左酒店樓下行過一個街口嘅便利店度買甜品~ Hotel Edit 最好係附近有2間便利店，對於鐘意食便利店野食嘅朋友仔黎講簡直係福音。
超方便，每晚臨返酒店之前我哋都可以去便利店嗰度買嘢食。
呢個蛋黃哥雪糕又幾得意~
呢日都幾週車勞頓又要轉幾次車，之後兩日都會喺橫濱市內活動。之前嘅遊記講橫濱嘅野太少啦，今次會去多啲地方可以睇到橫濱嘅另一面。之後一日我地就會去世界第一的早餐店度嘆返個靚早餐！
ホテル エディット 横濱 Hotel Edit Yokohama
地址：神奈川県横浜市中区住吉町6丁目78番地1
電話：+81-045-680-0238
交通：
-
みなとみらい線：⾺⾞道駅 歩行5分鐘
-
京浜東北・根岸線：桜⽊町駅 歩行6分鐘
-
横浜市営地下鉄ブルーライン：桜⽊町駅 歩行6分鐘
鳥良 野毛店
地址：神奈川県横浜市中区野毛町2-71-12 エスター観光ビル 1F
電話：+81-045-242-9822
營業時間：17:00～23:30(L.O23:00)(定休日:星期二)
交通：JR桜木町駅 歩行3分鐘 | 京急日ノ出町駅 歩行5分鐘
(Visited 146 times, 1 visits today)