朝早喺溫泉旅館度食埋個早餐就出發喇，早餐就普通啲，都係嘅日式早餐再加啲沙律，味道都ok，唔算特別。
      
呢幾日個天都算係待我哋不薄啦，六月應該係梅雨季但係自從喺輕井澤落咗一日雨之後幾日都係非常好天。
我哋今日嘅行程就係行一石段街再去牧場，下晝就要搭返三點半嘅高速巴士返新宿。
之後就出發去石段街，石段街係伊香保最出名嘅觀光點，據說以前為咗順利將山上嘅泉源引到各間旅館，用石頭堆砌樓梯後喺石梯中間嘅下面建造引溫泉水嘅管道，非常之善用呢一區嘅土地，所以呢度Ｄ旅館密度咁高都係有原因嘅。

行到石段街最頂就係伊香保神社，供奉嘅係醫療同溫泉之神，以祈求安產同求子聞名，求戀愛運都好靈㗎。有幾靈我就唔知但係就見到好多人都嚟呢度參拜。
沿著伊香保神社嘅另一邊落去就可以去到附近嘅河鹿橋，果邊年四季都可以見到唔同靚景。
途中可以見到一間賣溫泉饅頭的店，黎到呢度點可以唔試下最出名嘅溫泉饅頭？

  伊香保係溫泉饅頭嘅發源地，呢度嘅溫泉饅頭係呈現啡啡黃黃嘅顏色，原來喺製作材料之中加入黑糖就製成呢隻茶褐色嘅湯乃花饅頭，係咪好似呢度嘅溫泉顏色呢？
勝月堂嘅溫泉饅頭係非常出名～
本身我對溫泉饅頭呢就真係冇乜好感嘅，因為我一路覺得佢係呃人嘅手信，同溫泉又冇關係又唔靚…等等，不過一場黎到都試一試啦。

加入咗黑糖嘅溫泉饅頭又真係幾好食喎，中間係紅豆餡但係唔會太甜，呢個饅頭係值得買嘅，朋友買左兩盒返去～
仲有我嘅至愛燒魚~可惜一早已經食飽飽‥‥‥
  
再行多一陣就到河鹿橋。附近有唔同嘅樹，春天有櫻花，夏天有綠葉，秋天有紅葉，冬天有飄雪。秋天晚上仲會有點燈活動，我哋六月嚟都當然就淨係可以見到綠葉啦，但係已經吸引左我影好多張相。
折返返去石段街，石段街兩旁亦都開咗越嚟越多嘅商店，賣土產嘅，糖果店，茶店，免費足湯等等乜都有。
之後行返去石段街買手信，呢度嘅賣嘅嘢唔算好特別，去得多旅行就發現日本觀光景點商店嘅通病。同一條街呢大量都係差唔多嘅嘢，伊香保就係即係除咗溫泉饅頭特別啲先嚟就冇乜其他好特別嘅特產可以畀我買返去。
呢一間係賣伊香保燒，亦即係鱆魚燒，去到就見唔到有人食，反而大部份人都買雪糕～可能因為6月天氣都開始熱喇。
 除左勝月堂之外，呢間賣嘅野就靚少少～可能會搵到心水～
 成日覺得呢Ｄ好可愛，佢係超級迷你版～
石段街唔算好多特色野賣，但因為充滿著舊日本嘅復古氣氛加埋啲歐陸式嘅路燈，幾有風情。伏香保石段街唔算長，好快就行完架喇。

 喺石段街中後段會搵到岸權旅館嘅免費足湯，都好多人去浸架。

 

附近都有幾間溫泉旅館，呢一間石段之湯係公共溫泉黎，即日來回嘅朋友除左日歸之外，都可以體驗下公共溫泉～大人只需400yen姐
 行行下我哋見到呢啲一粒粒大大粒好似巨型魚蛋嘅小食，原來呢啲係蒟蒻串！製作蒟蒻串最重要嘅材料係乾淨嘅泉水，群馬縣以甘甜乾淨嘅泉水聞名，所以呢度做出嚟嘅蒟蒻都特別好食。
見到咁多人都買黎食，點可以唔試下～香港人係比較少食蒟蒻，呢個鹹鹹哋，好爽口，都幾特別～好唔好食就見人見智喇～
 行到最後，可以見到左手邊有間唔太起眼嘅土產店，想買手信嘅朋友可以黎睇下，選擇非常多！
行到去石段街個最底就可以搵到個巴士站去到伊香保綠色牧場～～～今次我地嘅行程真係好豐富，篇遊記太太太太太長喇，要分開３篇寫～
觀光資訊：
伊香保石段街交通：涉川站3號巴士站乘「渋川～伊香保温泉線」巴士至伊香保温泉バスターミナル站(約20分鐘)步行六分鐘 / 至石段街口站下車
伊香保石段街及周邊地圖（按此）
伊香保石段街景點：
伊香保神社
地址：群馬県渋川市伊香保町伊香保2
電話：+81 0279-72-3151
河鹿橋
地址：群馬縣澀川市伊香保町伊香保
電話：+81-279-72-3155 （澀川市伊香保綜合分所）
交通：從伊香保巴士總站徒步約15分鐘
紅葉觀賞時期：10月下旬〜11月中旬
勝月堂
地址：群馬県渋川市伊香保町伊香保591-7
電話：+81-0279-72-2121
營業時間：9:00～18:00
民藝山白屋
地址：澀川市伊香保町伊香保12
電話：+81-0279-72-2242
營業時間：9:00-21:00
岸権 辰の湯
地址：+81 279-72-3105
電話：群馬県渋川市伊香保町伊香保甲48
利用時間：8:00～19:00
石段の湯
地址：群馬県渋川市伊香保町伊香保36
電話：+81 279-72-4526
營業時間：星期一至星期日9:00-21:00（定休：每月第2、4個星期二）
費用：400円
石段玉こんにゃく よろづや本舗蔵(伊香保温泉)
地址：群馬県渋川市伊香保町伊香保76-5
電話：+81 0279-26-7234
營業時間：09:3-17:30

 

(Visited 259 times, 1 visits today)