2017年6月17日
最後一日留係廣島，下午就要出發到機場，一定要再來到原爆ドーム好好參觀，附近亦都有新開嘅HIROSHIMA ORIZURU TOWER，好靚，好值得一到。
朝早十一點check out之後呢我哋都仲有三個鐘俾我地慢慢行嘅， Hong Kong Express廣島線去程時間係差啲，回程時間都係靚嘅。 我哋lunch就去咗商店街就揀咗一間當地特產嘅居酒叫かき小屋 さかなや道場 広島立町店， 即係好似磯丸水產嗰啲，咩都有得食又有燒肉呀又有燒海鮮啦，其實我地最想食多一次廣島蠔姐。
價錢唔貴，有看圖識字。
晨咁早黎到呢D餐廳真係好唔慣，我地係佢地第一個客。
之前食過Maguro，好好食，臨返香港好想再食，呢度都有但當然質素一般，點都唔夠鳥取果D好食。 師傅係咪未訓醒呀？！好食就好食，但做咩有血架？
仲有唔同口味嘅燒廣島蠔，呢個海鮮拼盤呢就有埋大蜆一齊蒸嘅，但都同琴日嗰啲實在爭太遠喇。
最後亦都叫咗個蟹膏。
又唔可以怪呢間野唔好食，事實上佢就中規中矩，只不過我地之前食果D實在太好食，什麼都比下去。
食飽飽之後就行返去和平記念公園度參觀原爆圓頂館（原爆ドーム）。 呢個遺址原本係當地嘅一個産業獎勵館， 其實佢距離爆心地好近，係1945年8月6日，經歷咗咁嘅浩劫後圓頂同埋部分建築仍然保留咗喺度， 但附近嘅建築物已經全部被夷為平地，造成16萬民眾嘅死亡。係1996年12月5日登錄世界文化遺產。
有人話係呢個遺址中會見到受難者嘅焦影， 原因係人受到咁高溫嘅情況下可能已經同建築物溶為一體。
好老實你問我我見到呢個建築物嘅時候，尤其是咁近去觀察，我係有少少唔舒服同不安嘅，可能呢種就係不寒而慄。
爆心地就唔係公園內，大家有時間可以行去。果度只有一個紀念碑去講呢一段歷史，而現時已經係一間醫院叫島外科内科。
係附近會有可以去埋宮島嘅世界選產航線嘅船，都係係呢一條河度上船。
動員學徒慰靈塔，係紀念因被徵招而受難嘅6000多名學徒靈魂。
大家都知道輻射嘅影響真係好嚴重， 原子彈之子像就係廣島中小學生為咗紀念當年受到輻射嘅污染得到白血病過身嘅佐佐木禎子名被原爆症帶走嘅小朋友而籌款建成。
之所以有咁多隻紙鶴，除咗係渴望和平之外，當時患上原爆症嘅小朋友更相信是舊一千隻紙鶴係可以實現願望，佢哋希望健康咁活下去，可惜即使佢地摺夠一千隻，仍然被病魔帶走。
公園裏面仲有好多唔同嘅紀念碑同埋雕像，好多都好具意義，例如：平和の時計塔係停留係被爆一刻、平和の灯係永遠不滅的燈直至核武在世界消失。同時係公園內都有好多民眾自發性地去慕集要求停止核武嘅簽名， 簽左之後呢會獲發一張紙可以俾你 摺紙鶴 紀念受難者，可以投放到附近的大型收集箱內。 一個都有展示世界各地唔同民眾同日本各地嘅學校送過嚟嘅紙鶴串。
曾經有被爆者被問到會唔會好憎恨美國， 原爆受害者兄長佐佐木雅弘表示，並冇憎恨過投下原子彈嘅國家， 日本人提起廣島，美國人都可能會提起珍珠港事變， 雙方各有理由 ，但被爆者真正希望嘅係世人可以克服過去，共創一個和平嘅未來。
就好似呢個原子彈慰靈碑一樣， 馬鞍型嘅紀念碑係希望犧牲者嘅靈魂不會再受到傷害。而中央放著一副石棺，內裡存放住受難者嘅名冊，上面刻住：「安息吧！我們將不再重複過去的錯誤。」
附近有人拉小提琴，加埋小提琴聲真係好淒涼‥‥‥
和平公園我哋冇參觀到最後，一黎時間唔係好夠，二黎越睇真係越難過。
旁邊有一幢叫做Hiroshima Orizuru Tower(廣島紙鶴景觀塔) 係2016年9月新建成嘅，係綜合左特產、餐廳、會議室、辦公室、展覽館同埋景觀台嘅地方，係廣島最新的觀光設施一。
一入到地面一層呢就已經見到有大量特產，當中呢我最想要嘅熊野筆，心形、花型嘅化妝掃、洗面掃都喺度搵到！！非常之開心！ 仲有好多唔同嘅特產我都唔逐一介紹，總之喺呢可以搵到好多好嘢啦。
呢度新開放嘅景觀台係我最想去嘅地方，入場費都只係1100左右。 搭Lift可以去到12樓，之後行上一層就到。
第一次見呢種景觀台係一個建築嘅中間但係佢係三面都係全開放式，可以呼吸到新鮮空氣亦都可以見到廣島最著名嘅地方， 尤其是旁邊就係和平紀念公園， 行完公園黎呢度真係會零舍心曠神怡。
全木造嘅設計令人覺得特別自然舒服，呢個設計就係基於建築師三分一博志嘅概念係將廣島一邊係山、一邊係海嘅特色同帶嚟嘅冷暖風匯集係呢度。
可以見到廣島東洋鯉魚隊嘅舊廣島市民球場。呢個球場雖然已經拆左，但保留一部份看台俾市民紀念。仲可以睇到廣島城、和平紀念公園等。
附近都有D特別建築，有人話廣島建築越起越古怪，唔知大家又點睇？
雖然三邊都係全開放式嘅觀景空間，但係東面嘅牆亦都貼上咗玻璃，望起上嚟好似呢一層都係全部通空一樣，四面都見到景觀咁， 個人非常之欣賞呢個設計。
由入口字到旁邊個圍欄，都係一個木造嘅斜坡型嘅平台，所以無論喺任何角度都可以輕鬆咁睇到好靚嘅風景，唔會俾前面嘅人遮住。
去完觀景台之後可以沿住「散步坂」嘅斜坡一路行返落去紙鶴廣場。 定期都有唔同著名藝術家設計師嘅作品，仲有有一啲影像嘅互動設施。
個人企係投影機前將郁黎郁去就有唔同圖案，唔係咩新野，但都幾得意。
最特別呢度就係有個叫做紙鶴壁嘅地方。每人會獲派一包顏色紙用黎摺紙鶴，色紙大概有五款，大家都需要親手摺5隻紙鶴出黎。（都有好多款式嘅色紙）
我都好耐冇摺過，點完全唔記得。唔緊要，後面包裝有教你，附近都有IPAD可以望住摺，摺多兩隻就記得架喇。
好靚呀你地～
摺完之後呢就要將你隨身物品放去附近一個暫時存放嘅Locker。 因為要進入一個好窄嘅地方，嗰個地方就叫紙鶴壁喇。 行入紙鶴壁就可以見到 其實我哋係企咗喺 利用建築嘅場面同玻璃去做成一個猶如透明大箱嘅頂端， 頂部就畀我哋可以將我地址摺嘅 紙鶴 放入呢個大箱內。
好高又透明，畏高症朋友表示驚驚。
可以見到入面已經有好多紙鶴喺度嘅， 有時會喺層與層之間停低，亦都有機會飄到最底一層。
放入箱後，紙鶴一路飄落黎，真係好靚。放紙鶴時可以誠心許個願，祝願世界不再有核武。
之後呢我哋就完全散步坂行到落最底一層，順帶一提，散步坂係可以睇到爆心點：
其實都唔算行， 因為我哋發現左呢樣嘢——登登！滑梯！ 層與層之間竟然有滑梯係度，其實睇真D D滑梯唔係畀人玩，好似係要黎走火警嘅時候用，不過我地就貪得意走咗去玩。
最終滑左十幾層之後我終於到咗地下嗰層， 出去睇返個紙鶴壁 ，真係有大量紙鶴喺度，要儲滿成棟大廈都係 紙鶴 相信都要花上相當長嘅時間，就正如要世界廢棄核模一樣，不過我相信總有一日係可以做到嘅。
之後我哋要去sogo上面嘅巴士中心拎行李同埋買車飛，買車飛附近有一個小超市同好多野食，我哋，都可以買少少嘢食同埋水果先去廣島機場。
同早兩日買巴士FUN PASS嘅位置差唔多，之後去巴士中心 2 號巴士站去廣島機場。沿路都有指示牌，唔難搵，不過要行一段路就真嘅，所以建議早少少去巴士中心會穩陣Ｄ。
廣島機場即係好鬼細所以我真係強烈建議要食咗嘢先好去機場，去到都冇咩好選擇，好似我呢間餐廳啲嘢都係好一般。
再見廣島。
參考資料：
かき小屋 さかなや道場 広島立町店
地址：広島県広島市中区立町1-7 新世紀ビル1～3F
電話：+81 50-3542-5629
營業時間：11:30～14:00；16:00～24:00（L.O.23:30）
交通：広電本線 八丁堀駅 歩行2分鐘；立町駅 歩行3分鐘；胡町駅 歩行3分鐘
原爆ドーム（周邊有動員学徒慰霊塔）
地址：広島県広島市中区大手町1-10
電話：+81 82-242-7831
開放時間：24小時
交通：広島電鉄原爆ドーム前步行1分鐘
和平紀念公園
地址：広島市中区中島町１及び大手町１－１０
電話：+81 82-504-2390
開放時間：24小時
交通：広島電鉄原爆ドーム前步行6分鐘
必去－原爆の子の像、平和の時計塔、平和の灯等
爆心地－島外科内科
地址：広島県広島市中区大手町1-5-25
電話：+81 82-249-6161
Hiroshima Orizuru Tower
地址：広島県広島市中区大手町一丁目2番1号
電話：+81 82-569-6803
營業時間：展望台・物産館-10:00-19:00（7月．8月9：00～20：00)｜握手カフェ至21:00
入場費：外國遊客—成人1700yen
交通：広島電鉄原爆ドーム前駅步行1分鐘、紙屋町西駅步行3分鐘
(Visited 179 times, 1 visits today)