【山陰山陽8天遊】Day7 廣島Shopping商場攻略．必買手信．御好村廣島燒！

2017年6月16日

第7日嘅行程幾乎全部以Shopping為主。原本都有打算去三段峡嘅，不過果邊好似行山咁‥‥‥都係留返下次先去啦。

起咗身又未肚餓就去咗廣島最旺嘅地方—本通商店街。有商店街嘅地方通常都係最旺，呢條商店街串連咗大量嘅shopping區，由本通去到銀山町附近，南至袋町方面全部都係商場同埋食肆，呢個area係大到夠你行一日。

野都未食嘅走去shopping第一站就係去Sun Mall，呢邊係近巴士中心對面的街口，都可以去到Sun Mall。

Sun Mall俾我嘅印象算係一間比較二三線啲嘅商場。

藥妝呀買啲咩唔介紹啦，但係我知道碳酸美容喺日本嚟講都幾hit嘅，佢可以令到皮膚有種短暫缺氧從而令佢自己的抖氣，令皮膚識得自己吸多D氧，試過碳酸嘅產品效果都唔錯架，起碼皮膏會剔透左。呢隻面膜我雖然未用過，但係有關碳酸嘅產品大家都可以留意下。

Thank you mart呢D嘅幾百yen店都好好得，大量得意飾物，CP值高，香港唔多。貨品質素就普通，但係都買得過嘅，不過衫褲我就唔太建議。

例如呢啲耳環呀、好得意好特別嘅飾物、頭飾、仲有衫褲鞋襪同埋少見嘅卡通精品都會有賣，可以話係執手信嘅好地方。

呢度都幾多小雲野～好在都係390yen，買左唔鐘意都唔會肉痛。

耳環質素ok，都算多款，依家次次去日本都會睇下Thank you mart嘅耳環。

商場內有一間嘅模型店係幾有趣，可以控制啲車喺度郁，好靚好細緻。

商場仲有大路嘅wego、GU、Uniqlo 等等都有齊。商場賣嘅野quality唔高，當平時粗著就冇問題。

值得一提嘅係Sun Mall旁邊都有港人最愛ABC Mart，我都係呢次先知原來NB有同ABC Mart出crossover‥‥‥

差唔多到中午，我地要食lunch。Lunch方面，我地有兩間係比較Prefer嘅，一間係主要食懷石料理，「料亭久里川」佢嘅套餐係有齊所有廣島名物，以懷石黎講都算係幾抵，Lunch都只係2,700yen起，晚上會貴少少大約6000yen左右，啱晒我呢D貪心嘅人。雖然間餐廳唔係係正市中心，特登去食又唔係幾方便，但勝在有shuttle bus，嘩‥‥‥食飯食到有車接送真係少見。如果讀者黎講，應該幾想我介紹呢間？不過我最後都冇揀到‥‥‥

有追開呢個Blog嘅人應該會發現我真係好鐘意食魚生同馬肉，呢D真係係日本先會搵到好食嘅。所以我地第一站就係去食馬肉。我真心呼籲未試過嘅朋友可以去試下，馬肉呢樣野呢‥‥‥真係好食到會上癮。今次去嘅餐廳名為「CHARCOAL GRILL WAZA」。

佢lunch time都幾多附近嘅OL去食，呢樣野係令我幾意外嘅。（我地坐果個方向係幾多OL，不過費事影人地咁尷尬。）

我就點咗呢個WAZA御膳， lunch可以食到咁多隻嘅馬肉刺身而只係1500yen我覺得係勁抵。開頭有一啲配菜、沙律之後就係馬肉刺身。

每個部位唔同口感呀，唔同味道。霜降和牛肉食得多霜降馬肉真係第一次食。

食完馬肉之後我地就繼續Shopping，一落樓下過一個街口就見到呢一間「熊野筆祥苑」，佢係廣島非常出名，出名在佢嘅化妝掃，幾乎唔同景點都可以見到佢嘅產品，可以話係廣島特產之一。佢係創立於1883年嘅老店，至今已經超過130年，所有化妝掃都係職人手製，亦都因應唔同嘅用法而選擇唔同動物嘅毛，小編試過，真係覺得好柔軟。當中有平有貴，最平都要百幾蚊支，貴嘅要去到二、三千。肉痛肉痛，加上呢一間小編最愛嘅心形胭脂掃同花形洗面掃，所以都係冇係呢間度買到，唔詳細介紹。不過大家可以留意下個牌子，好多唔同地方都有佢嘅掃賣。

夏天黎緊，本通商店街真係超級多野買。由於Shopping個個唔同，所以我今次都係主要介紹下唔同商場有咩分別。

1. Sun Mall：比較Young line同價錢平，又有GU、Uniqlo、Daiso、WEGO、Thank you mart店(390yen店)，係較平民化嘅商場，我就係呢度買左兩對鞋，~2000-3000yen嘅返工鞋同行街鞋，都抵嘅。

2. 紙屋町シャレオ (Shareo)：近住Sun Mall附近有一條地下街，可以通去SOGO果邊，算係幾多小店而且D野唔算貴，重點係有幾多早餐店同快餐店，因為都連接住幾個電車站，所以自然有一定人流。

呢張相真係影得衰左少少，尾段少D人，最旺係中心十字位。

呢間Ｄ Accessories幾靚又幾平。

3. SOGO：Sogo都係比較多大牌子，個人認為性價比太低，所以都係粗略地買左D係藥妝店冇嘅Skin care就走喇。呢支IPSA係唔少youtuber推介，買果時香港仲未有，依家有冇就唔知喇。

4. 本通商店街：本身入面已經多小店，野係多又算幾好行，不過買落款式唔夠潮都係入唔到手主要原因，千祈唔好將佢同心齋橋果D比。

防水皮鞋，返工可能幾啱，但會唔會焗腳呢？唔知。

遊日必食—世界第2好味雪糕蜜瓜麵包，香港都有分店。

5. PARCO：沿住本通行，行到最尾就會見到H&M、PARCO等大商場、連鎖店。PARCO入面好多日本品牌，服裝飾物自然拍得住東京、大阪等。非常都好多層而且款式都非常適合我地呢D廿幾歲嘅上班族，男裝女裝都非常多。今次都有掃到D衫同鞋，但都好後悔留到最後先買，已經冇咩彈藥同體力喇‥‥‥

PARCO不嬲好好行，但係有少少失望嘅係太多連鎖店，好似冇咩特色咁，但老實，係買到野嘅地方。

附近都有D個性小店，有時間可以去行下。

三越就唔Comment，一向都係高檔商場，幾本上行完成個本町+藥妝店就唔會再想去三越。

推薦商店：
1. 長崎屋—必去掃土產。只要去呢一間係可以買晒廣島特產，唔洗周圍搵。就連宮島嘅飯杓、廣島出名嘅檸檬味食品（必買檸檬味魷魚天婦羅）、甚至當地嘅捧球隊（？？？）相關商品都有‥‥‥呢間仲有熊野筆，仲有我千辛萬苦先搵到嘅花花形洗面掃。

終於搵到喇！

左右角的魷魚天婦羅係廣島必買手信之一，鹹鹹酸酸幾得意。

特產係檸檬‥‥‥所以真係好多。

棒球隊商品。

2. 茶之環—講抹茶，大家一定諗起宇治、京都呢Ｄ地方，其實廣島都有名店。「茶之環」由廣島創業50年嘅老舖「お茶の駿河園」經營嘅抹茶甜品專賣店，十分十分有人氣，仲有由日本第一茶葉鑑定師—森田治秀評鑑第一名宇治抹茶所製作嘅甜點，來頭好勁。

近年連香港都有分店，不過難得一場黎到點可以唔去本店？樓下買手信，樓上就可以住低慢慢Order黎食。位處超多人嘅本通電車站附近，係SUN MALL隔離，推薦Shopping完黎休息一下。蕨餅係我至愛，唔止好食，係非常好食。

3. 驚安の殿堂広島八丁堀店—我地去左兩次，但冇影相，一如概往同其他地區嘅驚安都係差唔多，都係有大量零食、日用品、SKIN CARE、化妝品等等，超大間，超好行，最緊要係有Fun pass內有Discount coupon，買完野又可以獲得多一份Coupon。

(官方照片)

雖然我地騰出左一整日，但係都行唔晒整成個廣島市中心嘅商場。但都叫做應該行嘅都行完。我地嘅民宿係本川町附近，自然都係由西行向東至八丁堀。行到東面PARCO附近除左有商場外, 亦都有個性小店。最重要最重要留到最後行嘅原因係八丁堀至銀山町一帶都係有大量餐廳都係美食區。

廣島必食嘅名物就係御好燒，即係類似大阪燒咁，都係係鐵板上加左麵粉做嘅底，上面加上大量配料，去廣島未食過都真係唔好同人講去過廣島。廣島燒主要材料係：椰菜絲、肉、炒麵、荷包蛋、海苔、柴魚片、蔥等，同大阪燒最大分別就係大阪燒係先MIX晒材料再放上鐵板去煎，而廣島燒係一層一層疊上去，重點係要加炒麵同荷包蛋，一句講晒，廣島燒係複雜好多。