去關西大家多數都會去餵鹿仔，賞櫻會去大阪城‥‥‥但成日去都會悶掛，想去下新景點？咁就啱晒喇！莎朗發掘左大阪狹山市多個景點，包括可以餵松鼠嘅公園「市民ふれあいの里」、豪華嘅錢湯「虹の湯」、賞櫻名所狹山池公園、日本建築大師作品狹山池博物館 同 自家烘焙可愛咖啡拉花圖案Cafe，夠你玩足成日！
同屬大阪府嘅狹山市(狭山市）雖然算係近郊，其實唔係距離大阪市中心好遠架咋，由難波搭去北野田或大阪狭山市只需要23分鐘，來回加埋都唔洗一個鐘，玩完晚上仲可以返心齋橋Shopping。
餵松鼠嘅公園「市民ふれあいの里」
今次呢個推介係有少少私心嘅‥‥‥因為我本身好鐘意松鼠，平時係香港有幾何見到松鼠丫（小編仲停留係細個讀書果時係動植物公園度望上樹上‥‥）。大家都知松鼠跑得又快，根本冇咩可能接觸到‥‥‥市民ふれあいの里內有個松鼠園（リス園）呢個場係任餵唔嬲，見到佢地食咁食食食個嘴翁下翁下真係Q到暈 ~
市民ふれあいの里入口
松鼠園入口
入口可以買到向日葵籽同手套，始終松鼠都有好尖嘅爪，都係用手套好D。
松鼠園中間有D屋仔，圍住都會有木條欄杆俾佢地行黎行去～
 一地都係松鼠呀！
 佢地都見慣人類架喇，有D唔怕醜嘅仲會爬上身，不過如果你摸佢佢都係會驚驚逃走架。
 想佢地湧埋黎最好就係早上去喇，佢地一早就肚仔餓要搵日食架～
 亦都有兔仔區：
除左餵松鼠之外，呢度仲有得BBQ，簡單嘅遊樂設施，賞花呀等等。
豪華錢湯「虹の湯」
去完餵松鼠，狹山市附近都有錢湯可以俾你relax下，錢湯即係公共澡堂，但唔講唔知，原來依家有好多錢湯都裝修到好靚，仲會分埋唔同主題，有Ｄ會以以健康同美容為主題，又有Ｄ附有娛樂設施，一句講晒，More than沖涼。
以堺市為中心嘅大阪南部，可以話係豪華錢湯嘅激戰區，近年重新再豪裝嘅錢湯都唔少，例如呢間由松鼠園步行15分鐘就到嘅「虹の湯 大阪狭山店」已經改建左升格為Spa Resort，展望風呂就可以見到一排蛋形嘅獨立蛋形炭酸泉浴池俾你慢慢浸，呢Ｄ蛋形嘅洛池全部都係日本著明陶燒之一嘅信樂燒黎架，附合人體工學，前面仲有一個，全部都係對住個石景同小瀑布，非常療愈呀！
泉水係採用鹼性天然溫泉泉水，聲稱可以舒緩關節痛、神經痛、肌肉痛、五十肩、慢性消化系統疾病，可以舒緩疲勞，啱晒打工仔。​除左大浴場，仲有促進血液循環嘅岩盤浴、桑拿、美泡湯、採用高級備長炭釋放負離子嘅水風呂、電器風呂等等一共7種。
如果驚太open怕醜嘅都仲有室內浴場同8種唔同嘅私人風呂，而且仲連埋房間俾你休息，時間為60分鐘起，費用由3200円起）。
虹之湯係連鎖式嘅集團，所以經營方面都相當有心思。Resort內設有髮型屋、Massage同餐廳，務求令可以係入面渡過大半日。當中最令人意想唔到嘅係入面嘅餐廳「旬菜 花樁」竟然可以食到米芝蓮推介嘅京都料理旅館 高台寺 よ志のや嘅主廚監督嘅菜餚，真係最嘆嘅享受。
「旬菜 花椿」提供蕎麥麵、魚生飯、丼飯等等嘅料理定食，800-1200円左右。想食好少少，仲有各種會席料理同御膳，由1400~3200円起，其他野食有壽司、洋食、炸物、甜品等，價錢都好合理。
京籠御膳（きょうかごごぜん）　1880円
朱雀御膳（すざくごぜん）　1680円
ねね御膳 2000円
賞櫻名所狹山池公園
如果唔想去浸浴，搭2個站就可以到大阪狭山市站。大阪狭山市站有最古老的水庫式蓄水池「狹山池」，可能大家都有D印象，上年黃色鴨仔就係放係果度，雖然今年冇左，但都狹山池公園本身就係當地嘅賞櫻勝地，非常值得一到。
 入選日本歴史公園100選嘅狹山池公園，堤防兩邊種落好多唔同種類嘅花。狹山池公園係賞櫻名所之一，種植左1400棵櫻花樹。每年3月下旬～4月下旬都係櫻花盛開期(視乎天氣啦)，出奇地唔算太多人，係青綠色嘅草地上野餐都係相當唔錯嘅選擇。
日本一代建築大師作品—狹山池博物館
狹山池公園北邊嘅狹山池博物館（日：狭山池博物館）係日本一代建築大師安藤忠雄嘅作品，免費入場，唔曉建築嘅你，見到狹山池博物館的轉角、樓梯，你都絕對會感受到咩叫藝術。
博物館前面嘅廣場，可以見到兩棟長方形建物倒映係池面。兩邊用絲絲水瀑布製造的牆面，十分利落。
每一個角度都可以呈現出安藤忠雄嘅作品的美感。
 小編就真係唔識建築，館內就有介紹狹山池嘅作用，而且內裡用左唔少建築元素去呈現，例如呢個巨型嘅斷面遺跡，將局部狹山池北區防波堤嘅斷面遺跡搬入館內，充分呈現1400年前日本古代偉大水利工程宏偉及智慧，直到今日仍然係大阪府最大嘅水庫，蓄水量達280萬立方公尺。
 
自家烘焙可愛咖啡拉花圖案Cafe
行完博物館，可以去附近嘅自家焙煎工房Cafe littleisland度High Tea。自家焙煎工房Cafe littleisland外表成間民居咁，要細心睇下先搵到‥‥‥
呢間Cafe特別在佢地嘅咖啡拉花真係超可愛！費用由380円起，但就有10種拉花圖案配合唔同自家焙煎嘅咖啡。
 好靚嘅拉花圖案。亦都有包點、甜品等。

市民ふれあいの里 青少年野外活動広場
地址：大阪府大阪狭山市東野東1-32-2
電話：+81 72-366-1616
營業時間：09:00-17:00
入場費：200yen
交通：南海高野線「狭山駅」轉乘市循環巴士至「ふれあいの里」站
​
天然温泉 虹の湯 大阪狭山店
地址：大阪府大阪狭山市東野西2丁目837
電話：+81 72-365-4126
營業時間：一至五10:00-25:00 | 六、及假期25:00
入浴料金：成人750yen，小童370yen
交通：市民ふれあいの里 青少年野外活動広場步行15分鐘
​
狭山池公園
地址：大阪府大阪狭山市大字岩室
交通：南海電鉄高野線大阪狭山市駅步行8分鐘
​
大阪府立狭山池博物館
地址：大阪府大阪狭山市池尻中2丁目
電話：+81 72-367-8891
營業時間：10:00-17:00(星期二休息)
交通：南海電鉄高野線大阪狭山市駅步行10分鐘
​
自家焙煎工房カフェ littleisland
網址：（Facebook專頁)
地址：大阪府大阪狭山市狭山2-944-1
電話：+81 90-1912-9808
營業時間：平日8:00～18:00｜六、日及假期7:00～18:00
交通：南海電鉄高野線大阪狭山市駅步行3分鐘
Tabelog: https://tabelog.com/osaka/A2708/A270802/27061497/
​
(Visited 684 times, 2 visits today)