【山陰山陽8天遊】Day5 鳥取植田正治寫真美術館．廣島Pass．民宿．鐵板燒推介

2017年6月14日

琴晚有充足嘅睡眠，今日十一點就check out喇。今日嘅時間係非常充裕得嚟又好趕嘅，點解呢？其實我哋去植田正治美術館嗰度嘅交通係十分崎嶇。之前我介紹嗰植田正治係當代偉大嘅攝影師之一，都頗為出名，今次呢個美術館其實佢位於大山附近，可以見到大山好靚嘅景色㗎，好多人專程去打卡。

Check out前食左個傳統和式大早餐，唔算係好豐富但都夠飽，食到飽飽中午又唔知食唔食野好…….之後執好野hea一陣。雖然話皆生溫泉係好彩原來最大規模嘅溫泉區但係嗰邊其實好靜，只係有少少舖頭，大部分都係溫泉旅館，最好係可以沿住個海散下步。

由皆生溫泉出發去植田正治美術館要再係米子站轉JR再轉的士。本來係米子站係有車直接去到美術館嘅但係嗰班車只係喺星期六日先運行，我哋喺平日去就要喺JR岸本站度轉的士。日本JR嘅伯備線各停列車少之又少，要係米子度hea一陣先可以過去。

去到米子站周圍行下，米子上係畀我哋想像中少野食。原本以為米子作為鳥取嘅交通樞紐之一，應該都會多嘢睇嘅，但係發現除咗嗰條好多嘢食嘅街同Aeon之外係幾乎冇商場。

如果唔想去食田正治美術館嘅話嘅手另一個選擇係喺附近有間係日吉津AEON MALL。由皆生溫泉搭過去嘅其實只係需要十分鐘左右姐。佢有分東館西館，極大間，好多當地人都會專程搭車去嗰邊掃貨。

（圖片源自網絡）

未夠鐘出發就係米子站行下，米子基本上都係鳥取縣內嘅大站，當然唔係同新宿，名古屋，大阪咁比啦，話雖如此嘅但係就唔好寄望站內有好多嘢可以買，佢嘅鋪頭好少咋。

最主要嘅係有幾間土產店，售賣鬼太郎，20世紀梨，大山牧場等等嘅相關商品，仲有一啲當地嘅土產食品。20世紀梨嘅紀念品，尤其是係食品種類非常之多。

呢一間真係超超超超多手信，除左Aeon，可以係度再掃多轉。

呢Ｄ係大山牧場嘅牛乳製品，係布甸黎，一陣我地都會見到大山。

呢間便當似乎都有D名氣喎‥‥‥

呢度Ｄ便當有日本節目介紹過話好食，上晒電視～有諗過回程時買個鮪魚便當上車食，不過原來一早已經賣晒。

呢度嘅二十世紀梨真係太好食，建議真係黎得合時嘅朋友真係要買返個試下。如果冇得食生果嘅話其實仲有一個比較貼近佢原味嘅嘢食係非常推介嘅，就係雪糕。站內都有一間20世紀梨嘅雪糕。比起我之前食嘅雪糕係更加清甜同埋更加濃味。唔好希望佢係好creamy，話明係用果汁做當然係會比較似沙冰嘅感覺，非常推介。

另外要介紹嘅都唔算係景點但係就可以搵到好多景點嘅資訊，就係呢度嘅觀光中心。觀光中心都有幾多d local tour可以參加，有時仲係期間限定，例如臨近六七月就係螢火蟲繁殖嘅季節，鳥取縣係比較鄉郊嘅地方，好多地方都有得睇流螢，我本身都有plan咗其中一晚係去睇流螢嘅，但係由於搵唔到包車嘅的士同埋嗰晚都已經玩到太夜嘅關係所以最終都冇去，原來除左自駕，觀光中有都有團可以一齊去睇。

有人稱鳥取縣做星取縣架，因為係大山附近可以睇到好靚嘅星空～如果下次再黎我絕對會去觀星。

呢個就係夢港塔附近嘅小型魚市，原來六月底會有鮪魚祭。

行到有啲肚餓就喺車站附近有間拉麵店嗌左個拉麵食。最特別係間鋪頭嘅裝飾係用80年代嘅日本配以埋鐵皮做主題，好懷舊，不錯，想食得有特色D可以考慮下呢一間。

味付玉子有驚喜，有酒味又有醬油味得黎又唔會搶蛋味，一流。湯底都可以，唔算太濃味(我唔鐘意太濃味)。叉燒太多肥油唔夠層次分明，麵都軟硬適中，Overall都算OK。

行到差唔多時間我哋就去JR站搭JR去岸本站。

岸本站附近其實都係鄉郊，冇咩特別嘢行㗎。

附近真係鄉郊到不得了，拍得住之前我去滋賀嘅安土‥‥‥如果唔係去呢個美術館其實真係唔會黎呢到。

呢個Area得呢幅圖可以俾你參考～

我哋出左站之後發現唔對路，班JR又delay左，打黎即刻搵的士啦，但都係搵唔到。

唯有去JR站到問下站內嘅服務人員。佢哋幫我叫咗架的士但係就要等15分鐘同埋車程都要十分鐘，即係比預期時間再遲多15分鐘，我哋原本要就返回程班JR已經係淨返三十分鐘行，依家再少啲。呢個moment梗要講畀佢哋發生緊咩事同埋講俾佢地聽我地冇咩時間行美術館，睇佢幫唔幫到我哋，於是佢哋呢就要返我哋由米子返廣島嘅時間，幫我哋出謀獻策啦！

就係經過呢個窗口，我打算搵佢地幫下手，估唔到車站職員咁落力。

諗過度過之後佢哋叫我哋回程嘅時候就唔好再搭JR，附近有架日之丸交通嘅巴士係可以由「伯備牧場前」直接去到米子站但係就要搭耐少少要差唔多一個鐘。如果搭到JR當然最好啦，因為回程都只係半個鐘，但係更加唔想專程去一個美術館要搞到咗rush ，所以我哋都係接受咗呢個建議。

雖然佢哋只係JR站嘅職員但係佢哋亦都非常熱心，好似觀光中心咁幫我哋搵曬所有路線，呢個就係點解我咁鐘意日本嘅地方，起碼佢地對遊客非常熱心，真係好感謝佢哋。

終於去到植田正治美術館，植田正治美術館主要有三樣野係好值得睇－

1. 植田正治先生嘅攝影作品

2. 安藤忠雄嘅建築

3. 大山的美景

我開頭係唔知道呢一個安藤忠雄嘅建築，但去到嘅時間就發現左點解咁熟口面，好似係‥‥‥除非唔係！清水模！係安藤忠雄帶起亞洲清水模風潮嘅，打造充滿禪意嘅日式建築，呢個亦都唔例外，所有線條都非常利落，一睇就知道佢係著名當代建築師安藤忠雄嘅作品風格（近排去日本真係開始幾迷佢D作品），同埋睇過安藤忠雄建築嘅就會知道，佢擅於係唔同角落打造唔同嘅美，總之就好似走左入一件藝術品當中咁。

陽光折射左少少顏色打落去又真係幾靚。

大山！係幾的式架，但都同富士山有幾分似！

偽文青影相扮有藝術修養。

呢日好好太陽，都幾曬，冇諗過就算初夏都要帶太陽眼鏡（唔係想chok)，如果唔係根本就開唔到眼影相。

之前提過呢個美術館最近做緊嘅展覽，主題係image 。

我覺得佢嘅攝影風格係幾幽默鬼馬之餘又帶點冷，將生活、超現實主義同極簡主義融為一體。

佢就住喺鳥取砂丘附近所以好多時候嘅攝影作品呢都係環繞著到跟住鳥取至島根一帶，植田正治美術館作為我地旅程嘅最後一站，重現返我哋去過嘅景點，而當中鳥取砂丘更加係四十年代非常著名的作品「沙丘系列」嘅攝影舞台，佢亦都係當時開始聞名日本攝影界。前一日先去完鳥取砂丘，今日黎睇呢個展覽覺得相當有熟悉感。

由於唔可以影相，只可以網上搵返砂丘系列嘅相俾大家睇。

其中一個場內嘅打卡位呢就係呢一個位。其實就咗睇相係睇唔出佢前面有塊玻璃，佢哋用呢塊玻璃上面貼咗一張帽型嘅貼紙，你打卡嘅朋友可以重現番佢其中一幅著名作品嘅效果，至於佢嗰幅作品當時點樣製作，你哋入去睇下就知㗎喇。玻璃週邊仲有遮同埋stick 可以畀你做到佢影相，非常有心思。

大山其實對於當地嘅人嚟講的確係一個著名嘅景點，而呢一帶特產都係用大山牧場嘅product製成，我食過非常之香滑嘅大山牧場牛奶雪糕同埋布甸等等，都係好香㗎！所以唔算係非常出色，但係我都覺得真心好食～

我就用咗佢哋嘅道具整影左好多張。喺呢個玻璃前面嘅呢仲有兩張凳嘅可以畀你觀賞大山嘅風景。

呢個美術館仲有好多唔同嘅角度都好好嘅景觀，影相一流。帶頭盔先呀，我地只係遊客形式影唔到好靚好有感覺嘅照片俾大家睇～扮下偽文青呀喺個美術館前行嚟行去呀Selfie下就得。

第二格嘅凹位係純大山，冇Sticker，再次覺得安藤忠雄先生嘅作品真係好正，利用簡單俐落嘅線條同水嘅倒影，就已經將大山嘅靚景作為展品一部份。

場內有一個由植田正治製造全球最大嘅camera相機，有一個觀賞室每一個小時會播放一次佢當時嘅製造過程等等嘅資料。

如果有心嘅朋友可以行到許美術館另外一邊，係一塊農田，行遠少少就可以拍到美術館嘅全境。

題外話啦～都想同大家介紹返鐘意觀星嘅朋友，鳥取縣大山嘅天之川絕對係山陰最靚嘅星空，好似睇到銀河系嘅星光一樣，拍得住長野阿智村，而係植田正治美術館呢個位其實已經可以見到好靚嘅星空。去遠少少嘅大山牧場亦都幾有睇頭。想拍攝靚到爆嘅星空可以係觀光中心度睇下當地嘅tour，又或者留意呢個網站－http://www.daisen.jp/p/kyokai/3/3/

呢個美術館非常適合一啲鍾意藝術啦同攝影嘅朋友嘅，藝術創作需要一定嘅創作力，以當代著名攝影師植田正治先生充分地利用佢身邊嘅素材同埋佢嘅創作力去塑造出非凡嘅攝影作品，真係好佩服佢。

可惜嘅係植田正治先生已經係2000年逝世了。引用植田正治帶出佢嘅態度黎為呢個景點作出總結：

「攝影家和畫家不同，無論在任何時代，在『過去』原地踏步，就等於走向滅亡。只有站在『今天』，展望明天，才是保持『年輕』。無論到幾歲，都需要具備新鮮的感覺，和可以拍出『當下』的青澀。」 ── 植田正治

參觀完呢個美術館我哋就要去返搭日之丸巴士，首先我哋要搭的士去到附近嘅「伯備役場前」，再轉巴士去到米子站。

行咗一陣都差唔多夠鐘上車㗎啦咁上車嘅時間係五點鐘，去到廣島係大概晚上八點搭三個鐘車左右。當日除咗我哋呢兩個遊客之外其實大部分都係日本人嚟嘅，佢哋搭咪好容？單程已經要3900 yen等因為我哋有外國人優惠所以只係1950yen姐。之前有提過係喺米子站附近嘅日之丸巴士中心就可以買到呢個特價嘅pass ，佢都係同樣要你填一份問卷就有呢一個優惠。詳情可以睇返上上篇遊記(按此)。

廣島站同米子站都可以買到呢個pass。

巴士時間表(按此)
套票詳情（按此）

平還平，日之丸巴士明顯係冇一畑巴士咁好㗎，佢係冇廁所同埋冇得叉電，三個鐘咁耐真係要差定電上車吽。

日之丸巴士係營運埋鳥取、米子、倉吉、福知山、廣島、舞鶴嘅高速巴士，佢仲會來回東京、大阪、神戶、福岡、淡路、京都等地，最可惜只係有少部分嘅路線有夜行巴士，但係個價格算係好平所以大家都可以考慮下。

眨下眼就到咗廣島巴士中心，廣島巴士中心其實係位於SOGO嘅三樓連接著ACCES 嘅商場，入面除咗有餐廳之外仲有好多衫賣㗎，係等高速巴士嘅消磨好地方。

一落車就已經八點幾非常肚餓，雖然係咁，但我地一定一定要買左廣島市內3日pass先（如果唔係聽日又要行返過車站買），落左車果一層就有售票處喇。

如果主要遊覽廣島市內＋好似我之前咁搭超平巴士，而唔需要去尾道、岡山果邊的話，非常推介大家買呢隻PASS-Visit Hiroshima Tourist Pass，呢隻PASS唔包JR的，主要針對成日會搭到嘅廣島嘅路面電車、船、巴士同高速巴士，視乎唔同價錢使用嘅Area同交通工具都會有出入：

以下係我嘅分析結果(帶頭盔:只係個人意見黎姐, 都要視乎你行程)：

【1】SMALL Area　(広島市内・宮島エリア)1,000円　3日間有効

呢一隻就係我揀嘅，如果只去宮島就非常抵，只限市內電車，去宮島嘅船程同部份巴士。

【2】WIDE Area 　(広島県内エリア)　3,000円　3日間有効

呢隻就可以係廣島市內+宮島+三段峽，因為去三段峽係絕對唔平架‥‥‥

【3】SMALL Area with Airport Limousine Bus　(広島市内・宮島・呉エリア)　4,000円　5日間有効

如果以5日黎計來回廣島都可以考慮下呢隻，但老實覺得唔多抵，雖然機場巴士都佔左1340X2=2680yen, 剩返1300 yen任搭5日電車，有幾可可以係廣島市內(包括吳)玩足5日。抵唔係唔抵，而係對於香港人咁快嘅旅遊節奏黎講實用性低‥‥‥

【4】WIDE Area with Airport Limousine Bus　(広島県内エリア)　6,000円　5日間有効

相比起同樣包Limousine巴士，但係廣域，可以去到竹原同尾道，仲有三段峽，5日絕對玩到勁多野。不過去得5日同可以去竹原、尾道、福山‥‥‥可能好多朋友都會揀去埋岡山‥‥‥，仲要只限電車‥‥‥（電車又耐過JR咁多），實用過SMALL Area with Airport Limousine Bus少少，全程淨玩廣島就抵。

所以，我最後研究過行程，我地已經包唔到一程機場巴士，最好就買Small Area。