2017年6月13日
有追開我嘅遊記嘅讀者可能發現點解今次去嘅地方好似來來回回來來回回咁，其實是原本我哋每個區以放射性方式去玩，因為唔想日日都轉酒店，同埋想斬開一Ｄ超長交通時間。
好似我地第二、三日玩根島地區，去左出雲▶大根島，就會以松江做放射點；第三、四日去境港▶鳥取，就以中間點米子做放射點咁樣，第四日晚上就去米子附近嘅皆生溫泉。
溫泉旅館一向都唔平，所以我地只係揀STAY一晚。我地打算去完鳥取玩滑翔傘玩到筋疲力竭時返去溫泉度浸下。大晚行程唔洗帶咁多野啦，所以我哋會先放低行李係Hotel Harvest(米子豐收酒店)。

之前介紹過呢間酒店係包早餐，免費早餐又咁平房價以為好求其，估唔到都幾豐富喎。
我發現點解會有免費早餐呢？原來附近有幾間比較平價嘅酒店都係包早餐而且仲有大大隻字寫咗個喺屋頂Banner上面，Marketing，你懂的。
啲嘢食都唔錯（其實仲有幾多款下，連燒賣），我都食到幾飽先出發，去到鳥取嗰邊應該連Lunch都可以慳返可以唔使食。
我哋搭特急去到鳥取只需一個鐘時間。總好過由境港出發要成２個鐘。

 呢部就係我地要搭嘅列車啦～叫「JR特急スーパーまつかぜ ・鳥取行」去程就已經要2840yen，之前買左山陰岡山4天PASS只係4800 yen，基本上來回一次鳥取已經抵返晒！

PASS介紹按此

JR站都幾大架～過左對面就有商場。
滿心歡喜見到間大丸，佢又開左，但原來冇咩野好行，好多都係婆婆款式嘅野。
題外話，大丸門口呢個公仔好可愛～～
琴日喪行街好攰，搞到遲左出發， 去到嗰時唔夠時間去其他景點，只有一個鐘畀我哋到附近行下同食少少野。 附近都有大丸同埋商店街， 但係就好似停留咗喺幾十年前咁樣，賣舊式嘅嘢多D。
 尤其是呢條商店街，真係比我去過任何一個市中心都舊式。
 沿途都有水果店，我地係６月，而鳥取盛產嘅二十世紀梨係8月下旬至9月上旬先會有～無緣嚕～
咁多間鋪之中，我比較鐘意呢間，差少少少少就想買喇！
原來呢間鋪（ＨＡＫＡＳＥ）係鋼筆界好有名氣架，裡面有全人手造嘅鋼筆，係世界上最頂級嘅鋼筆之一。由1934年開始，依家已經係第三代嘅社長山本龍先生接手喇，無論係日本定國際上都頗有名氣架，佢地亦都接好多海外嘅訂單。真係估唔到可以係鳥取搵到咁有名氣嘅店鋪。
裡面Ｄ鋼筆好高級，睇中左有D款係用純木做外殼～不過咁靚嘅筆價錢亦都唔平，由幾千至幾萬蚊都有。好欣賞呢Ｄ由職人打造嘅藝術品～因為唔方便影相，所以冇影到呀。只可以講，好野就算係偏遠地方都會有人欣賞，真係送禮首選～
圖片源自官網：
仲見到期間限定嘅野食～
 呢間原來就係觀光中心！！大家要記住！裡面
原本出發之前Plan行程打算搭的士遊鳥取，特別係去鳥取港嘅「賀露市場」，可以食到超新鮮嘅即捕海鮮，附近餐廳可以代為烹調，又可以睇到海景，亦都比境港海鮮直賣中心企理Ｄ。但時間唔夠，加上日日食海鮮都唔係辦法，所以最終我地都放棄左呢個景點。可以係烏取５號巴士站搭賀露線偱環巴士去到「かにっこ館前」落車，但班次好疏，要睇清楚，可以參考呢個網站（按此）。
賀露市場同鳥取站係幾有距離架，唔想去咁遠嘅話，鳥取站附近都有D野食嘅，好似「海鮮村上水産仲買人直営店鮮魚部」，都係採用即日新鮮捕獲嘅日本海海鮮，價錢都幾抵，一個刺身拼盤都係1300yen，係當地comment都唔錯架。我原本打算如果早餐冇咩野食可以食呢間架~
畀啲貼士大家，其實鳥取嘅景點比較分散 ，如果去鳥取市內玩嘅話，搭巴士就會等到天荒地老 。而鳥取觀光中心嗰邊依家好積極咁發展緊旅遊業，推出咗一啲的士放題(任搭)plan(上年只不過係一千yen不過今年加咗價 )， 當然啦，真係任搭嘅油錢都蝕埋俾你， 觀光中心提供咗四條大路嘅觀光路線畀遊客任揀，詳情參考：https://www.city.tottori.lg.jp/www/contents/1374222847656/index_k.html
目前官網公佈2000yen的士優惠到2018年3月31日為止。
呢部咁可愛嘅粉紅色的士就係放題的士。觀光中心話可以去到先再book車，唔需要網上book定， 過程只需要十分鐘（就係JR對出嘅觀光中心）。可以去到我之前提過嘅賀露市場／砂丘，仲有好多其他比較少香港人去嘅景點。
我地最後決定今日只係去鳥取砂丘，所以就唔需要呢個服務。
我哋約咗玩滑翔傘間鋪頭「鳥取砂丘パラグライダースクール(砂丘本舗)」嘅職員十二點去鳥取站度等佢車我哋去集合嘅位置 ，因為比較少巴士到達。 原本佢哋係冇呢個server㗎但係佢見我問佢搭的士幾錢，之後我又話咁只好搭巴士啦，佢就話車我哋過嚟喇，好好人呀。哈哈哈， 我要澄清其實我唔係故意架， 哈哈～只係咁啱有一班巴士係可以講到佢集合嘅時間， 佢哋個集合位置為左方便大家換裝備，係有少少了能。要搭日本交通【岩井線】巴士到「子供の国入口」落車再步行10分鐘。又唔近附近嘅砂丘美術館同埋砂丘東口巴士站，所以搭唔到好密班次嘅車。
係Lawson買少少嘢食同野飲就出發。
去到集合地點佢哋竟然叫我著多條褲？
原來我唔應該著短褲， 最正確嘅著法應該係一件過肚臍嘅上衣＋長褲—以免喺降落嘅時候俾沙擦損個膝頭 。波鞋—可以徹底包住隻腳戥腳會唔好受傷，仲有太陽眼鏡係最緊要因為嗰度真係好曬同埋會有些吹入眼。
日本人真係超超超超超甜心，就算你嘅著到成套晚裝+高踭鞋+冇戴太陽眼鏡都冇問題，因為佢係有曬所有需要嘅衫同鞋，眼鏡等等畀你換咗佢， 但一個數字「7」 。好似我咁換到九唔搭八，下身一條短褲再加一對長襪再襯一對loafer鞋， 冇眼睇啦。
車上咁多嘅就係客人嘅滑翔傘～
 好大袋呀！！！
佢哋會安排同一時間參加 活動嘅人一齊出發，喺我哋等緊嘅時候我哋就先食咗我哋嘅午餐同埋畀咗錢先。
今次嘅活動費用係14000yen兩位即係平均每位7000 yen 。 但係我只係畀咗9000yen即係平均每位4500 yen ， 點解可以慳咁多？有留意開呢個blog嘅讀者應該知道日本訂房網站訂嘅話係可以儲分， 除咗儲分之外或者仲會定時推出coupon。今個trip係將Jalan網訂超過咗30000yen嘅住宿，就可以搶限時coupon，喺指定日期裏面訂購唔同累積住宿消費就可以搶唔同同金額嘅coupon，原本我仲可以拎到一萬yen coupon但係已經畀人搶曬，所以唯有拎5000yen coupon。
張coupon係可以係全國所有體驗活動嗰度扣減。 當然只限指定日期嘅體驗活動。 如果大家都對其他體驗活動有興趣，例如出雲佢有一啲勾玉手作班又或者喺廣島宮島神社有D豪華遊，可以係船上食好西等等，都可以喺嗰度扣減。
臨出發之前教練教咗我哋一套動作係點樣控制滑翔傘， 只有五個 非常簡單嘅動作， 係要嚟控制個新嘅張開嘅程度同埋左右。 佢不停咁呢啲直到你記得曬同埋熟曬為止。 正式出發之前會帶大家先去個廁所同埋一定要買一支嘢飲，逗留喺沙丘到兩個幾鐘咁曝曬住佢玩都幾辛苦。 同埋防曬係一定要搽定假如果冇嘅話呢可以佢哋都會有一支隨身帶定嘅防曬畀你查嘅， 但係如果化咗妝嘅女仔嘅話你冇理由就咁達落塊面度？所以最好嗰日喺臨出門之前就已經要搽左防曬。
 呢一日真係又曬又大風，我地就要好似隻駱駝咁孭住咁重嘅滑翔傘落行去砂丘，唔算遠，但真係超重，舉步唯艱呀！
 好快就見到大片大海喇！！面對住個大海，都幾大風架，吹得耐係有少少涼涼地～
 鳥取砂丘係日本最大嘅砂丘，之前有輕輕提過靜岡都有中田島砂丘，比起呢個真係冇得比。我地玩滑翔傘呢邊係比較少人嘅，遊客多數會去另外一邊度睇，貪佢果度有個高谷，影起相黎會靚D架，風紋都會明顯Ｄ。呢邊影相都仲會見到一Ｄ草，冇咁靚。
形成呢個鳥取砂丘，係大自然用左10 萬年創造出黎嘅傑作，由初初千代川嘅泥砂面對日本海的風吹浪沖擊而埋積，到後期機緣下由「大山」火山爆發時吹黎嘅火山灰，就形成呢個咁靚嘅砂丘。
 正當我地瘋狂影相嘅時間，教練們就為我地張開滑翔傘。
 古怪造型登場～～我地今次一共係４個女仔一齊玩，我地互相指片，又有３個故練幫我地影相同拍片～好開心呀！
 到我喇到我喇！！！３個人一齊同我set好晒先起行。
我本身就有少少畏高嘅，不過係呢一間玩真係唔需要擔心，佢係逐次教好高度，頭２次都會用繩控制住你嘅高度，越黎越高，有少少似放風箏，但都要配合指令，教練會係地面大叫你做動作架喇！
 因為係第一次，所以都要俾Ｄ初學者適應下，尤其我地呢邊有海（另一邊就全部都係沙），好容易飛左出去～
第一次玩完完全唔驚，我地幾個女仔每人都玩左兩三次！！！之前睇YOUTUBE都有介紹過其他滑翔傘，但係就教完你由你自己飛，初學者難免會有少少驚。其他果Ｄ玩完果十幾秒之後，仲要孭住個人咁重嘅滑翔傘行返上砂丘，呢一樣先會最崩潰！好多人都表示，就算好好玩都會體力不支唔想再玩。但呢間除左可以睇好壯闊嘅海景之外，佢地仲會幫你孭返個滑翔傘上砂丘！！真係好抵讚！
 玩左幾次單人飛行之後，最後重頭戲就係唔洗綁住，同教練一齊飛～
 好似想飛出個海度咁～
 呢一次真係飛度有Ｄ高。同期間同教練佢地傾計，我之前都知長野縣都有得玩呢Ｄ滑翔傘，佢話佢地都會去長野縣玩架～不過果邊比較啱日本人（因為好多都講日文），而且地形方面，冇沙砂咁好咁適合初學者～
鳥取砂丘冇錯係幾大風，但並唔係成日都適合二人咁一齊飛～如果二人一齊飛係可以飛高好多架～所以教練佢地之前要做左測試先～
前後玩左3個鐘。我地揀左係最曬嘅時間玩呀！所以防曬真係好緊要，返到香港之後Ｄ人都話我做咩黑左～
另外呢度另一樣好靚嘅就係風紋，即係被風吹到Ｄ沙有唔同嘅一行行紋路～真係好靚架！
 拜拜喇！今次係參加左「鳥取砂丘パラグライダースクール(砂丘本舗)」呢個滑翔傘體驗！有興趣嘅朋友都可以上佢地官網又或者JALAN度搵到佢地架！
 我地下午要返返溫泉旅館，冇咩時間去另一邊度影風紋‥‥‥我地聽日嘅行程都關鳥取砂丘事架～所以黎呢度體驗一下附近壯麗嘅景色先！
 走喇～真係好唔捨得呀！
 教練就揸車送返我地出返去「子供の国入口」度等巴士返鳥取JR站
 呢架就係我地架車仔喇，真係估唔到有埋咁好嘅接送服務！呢一間滑翔傘我俾５個LIKE！
 附近有幾荒蕪下‥‥‥
我地一樣搭返特急返米子站，之後我地就轉乘的士去到皆生溫泉。米子站搭的士出發到皆生溫泉只需要十七分鐘就到， 巴士都係差唔多時間不過就要就班次，而且班次幾疏差唔多一個鐘一班。
皆生溫泉係鳥取縣內最大規模嘅溫泉之一， 我哋搭的士去到一間喺海邊嘅溫泉旅館叫做皆生シーサイドホテル海の四季， 齋睇門面嘅都覺得係好似幾高級咁。呢一間唔係裏面最top嘅，但佢就係日本旅遊網Jalan內排名最高嘅溫泉酒店之一，好多人去過comment都好好, 勝在CP值高。
 CHECK IN嘅receptionist係一D上左年紀嘅妯嬸，又諗起之前去一D好偏嘅溫泉都係咁，我反面鐘意呢一種，會覺得好溫馨。佢地唔太識英文，但就好helpful，我上網訂左包裹寄但係呢間收唔到，原來寄左去隔離酒店（好核突呀‥‥‥），之後同佢地講，佢地幫我拎返返黎～真係好體貼！服務一流。
皆生溫泉係一個向海嘅溫泉區裏面大部分嘅溫泉旅館都有海景， 嘢食方面呢主要係台山陰山陽嘅特產為主， 呢度嘅溫泉旅館比起其他嘅溫泉區（例如玉造溫泉）個價錢係平好多。 房間同 晚餐都唔輸蝕。
 旅館大堂望出出面就已經見到海。
 全部房都有海景。尤其東館係2013年改裝過，都好迎淨。我地Book嘅係twin room，間房同官網嘅相冇咩分別，幾乾淨幾新，唔錯。
 係電視細左少少。
間房出面就已經係海呀但係都有條行人都喺度㗎同埋旅館唔算高所以睇下面散步都可以望到上客房。同埋因為有海鷗，所以有個網欄住，呢一樣係我比較失望嘅。
 浴衣款式一般，都係好普通果D款。我講過，溫泉旅館嘅浴衣款式係絕對反映到個質素架，但係呢一間例外。點解咁講，睇埋落去就知。
 一般要用嘅用品都有齊。
房嘅浴室就細少少，不過其實我地都用唔著咁大。最開心嘅係竟然有我最鐘意嘅牌子嘅沐浴露同洗髮水！！！！我記得同一品牌我去過咁多間只係「白浜 浜千鳥の湯 海舟」先有，點解我咁鐘情？因為次次浸完皮膚都會比較乾，加上日本天氣又超乾，而用左呢一隻之後，皮膚會好軟好潤，總之就係我至愛。
因為入口去咗砂丘玩所以返到旅館已經好攰第一時間趁晚飯前浸一浸先。 都提過大家食完嘢先至浸溫泉好容易體會消化不良，之前曾試過瀨嘢，搞到之後成個禮拜都食唔到嘢。
去到其實係平日所以唔算多人， 都係日本遊客為主。
大浴場同埋半露天溫泉嗰度係有嘢欄住，若穩若然現咁望到出面嘅海景。（係一個人都冇我先影相@@）
露天溫泉細細地，但又係包場浸，好爽呀！
朋友係第一次係日本浸溫泉，呢Ｄ冇人嘅場就最啱佢。冇諗過佢話要再浸，睇黎佢已經開始上癮了。
 咁啱日落，天色好靚！
基本上溫泉旅館最基本嘅設備,風筒,洗面奶,保濕嗰啲佢哋都有齊。另外私人風呂佢哋嗰邊先會有個捲髮器，護髮油等等。
浸完休息區有按摩椅呀~又有靚景
浸完之後都夠鐘食晚飯啦。今次我哋喺呢個Plan呢係比較特別嘅，因為佢可以喺五樣嘢裏面再揀其中三樣野，包括 early check in， late check out ，鮑魚陶板燒，精緻小蛋糕，私人風呂同埋浸浴工具。
我的地嘅晚餐係有蟹食架，同埋仲多咗一樣嘢就係鮑魚陶板燒， ¥12210有海景房,又可以食到咁嘅嘢，性價比真係好高。幾乎淨係可以喺呢一區先可以做到呢個價格，如果其他地區嘅話起碼都要萬八九至二萬起。
第一道菜係 蟹同穴子壽司，另外仲有松葉蟹，食完紅楚蟹之後再食松葉蟹，就真係好容易睇到佢哋嘅分別。
另外仲有一個杯仔裝住啲海藻同埋小小蟹肉，呢個都幾特別嘅。
亦都有刺身。
 仲有大山雞，大山係附近嘅名山，當地人話好似富士山（咁當然差得遠啦），上面係有牧場嘅。大山雞就係大山附近出產嘅雞，雞味都算濃。我地下一日嘅行程都會去大山附近。
  
鮑魚陶板燒，佢地利用牛油一齊煮，食落去嘅時候好香不過就有少少overcooked，唔夠軟。
講返呢個鮑魚疏板燒係上述扶過三選一之中，要加幾只百幾yen先食到。比起出面起碼要成千幾yen都算平。
再嚟一個小食就有我心愛嘅蠑螺， 八爪魚沙律， 三文魚籽蒸蛋， 炸魷魚。 魷魚都係呢一度嘅名產，所以有好多相關嘅小食，好多時都會見到佢就係餐廳menu度出現。
 炸天婦羅唔需要多講。
仲有飯同湯同水果，果Ｄ普通野我就冇影喇。嘢食分量比我想像中少但係夠飽，平時一般Ｄ溫泉旅館果D就太過飽，我就唔太鐘意，有時食唔晒又要夾硬食真係唔係咁好。
我地仲揀左LATE CHECK OUT同40分鐘嘅私人露天風呂。我就冇浸，朋友話望見窗外面沙灘打曬燈都幾靚。
 值得提佢哋嘅地下有一層嗰啲小賣店專係賣特產嘅，嗰度有隻雪糕係二十世紀梨同埋牧場嘅牛奶味雪糕（冇影到）。
20世紀梨雪糕好清甜， 仲有啲果肉。牧場雪糕嘅牛奶味就好香好滑，雲呢拿味超好食。
呢一隻梨酒都幾出名架，唔少人都會買黎當手信，係人氣手信之一。
呢一晚就係成個旅程嘅休息站， 因為早兩日都行咗好多路，中途休息下嘅話之後嗰幾日先有氣力再玩。
聽日我哋就check out喇，check out完我哋就會去大山附近嘅植田正治美術館，參觀當代著名嘅攝影大師嘅作品同咁有美感嘅藝術館。之後我哋會喺米子站附近下就會返返去廣島。終於終於之後果幾日可以去廣島Shopping、宮島、同睇原爆遺蹟喇！
鳥取砂丘パラグライダースクール (砂丘本舗)
地址：鳥取市東今在家123-31-103
電話：+81 857-24-6124
費用：半日滑翔傘體驗：￥7,000／位（莎朗洗費￥4,500／位)已包保險。
交通：鳥取站乘鳥取砂丘方向之巴士，於「鳥取砂丘こどもの国」/「こどもの国入り口」站下車步行7分鐘。
​
皆生シーサイドホテル海の四季
網址：http://www.kaike-seaside-hotel.co.jp/
地址：鳥取県米子市皆生温泉3-4-3
電話：+81 859-34-2222
交通：JR站乘的士/往皆生溫泉之巴士約15分鐘
一泊二食費用：莎朗洗費-¥12210(二人一房一泊二食plan價)
​

 

(Visited 314 times, 1 visits today)