2017年6月12日
行完水木茂大道就出發去由志園, 佢位於位於島根嘅大根島, 由境港車站出發只係16分鐘姐，入場費800 yen。
由志園一年四季都有花睇, 之所以點都要去呢度, 係因為俾一張相嘅景色吸引左。係咩相就要繼續睇落去。
 呢個入口真係好似普通民宅, 相當唔起眼。
 真係唔似一般日式庭園入口…..
通常呢D要額外俾錢入場嘅景點, 如果上一個景點行太耐我都會Skip左佢, 好彩今次行水木茂同我預期嘅差唔多時間, 真係幾慶幸有黎呢度睇。
入口附近已經見到好多特產品‥‥‥
買完飛我地就準備入場喇。
一打開門真係嘩左出黎, 張相係代表唔到果種感覺。果種整齊, 經過高度修飾同好嚴謹去維持嘅感覺真係一打開門就湧出黎。
 沿路有好多唔同時令嘅花草。以下D相我真係求其影架咋, 好隨意已經可以搵到好靚嘅角度。
 雖然我地6月去, 但大根島感覺係涼涼地, 而呢度更加會為植物準備好多水氣, 所以會FEEL到涼涼地。
紅葉?你冇睇錯, 我係去左京都之後先知, 原來有D品種嘅紅葉係一年四季都係紅色。
 小橋流水, 如果著住和服黎影相就更靚。地方唔算大, 佔地約一萬三千坪嘅日式庭園造景，但已經有齊枯山水園、白砂青松、苔園等等六個唔同主題。
 行到中段會見到牡丹館。小小2km嘅小島大根島原來係日本第一嘅牡丹花產地。
 牡丹其實我興趣唔大, 但係見到佢地真係開得好靚。
 鐘意影植物嘅朋友應該可以影到好多靚花
我最鐘意呢兩朵。
 
 牡丹館唔大, 但勝在一年四季都有得睇, 如果大家春天黎, 仲可以睇到三萬棵牡丹嘅「池泉牡丹」, 大概四~五月期間先有。
 (圖片源自互聯網)
(圖片源自互聯網)
 (圖片源自互聯網)
可惜我地黎果時已經係初夏, 冇得睇到咁多牡丹花。
 呢度有個小菖蒲園，景色都一樣好靚架～
 呢個小小嘅菖蒲園真係好靚~
 再遠小小仲有個小瀑布(冇影)
去左咁多個日本庭園都發現唔係好多個都打理得好好, 好多時有蚊呀‥‥‥昆蟲呀(我對昆蟲好敏感~)‥‥好多流水位去水並唔係太好, 好多時D「池」細心睇都唔太乾淨, 又或者一D細池真係完全冇人理。唔知關唔關size事, 但呢度感覺係好用心打理, 所有野都做到好細緻, 我覺得呢個地方, 咁苦心去經營, 值得更加多人可以觀賞到。
行到盡頭會有一個展覽人蔘嘅地方, 唔算太特別, 冇咩點影俾大家。
 仲可以試下人蔘雪糕!
 行完有時間嘅不妨黎食個tea, 因為呢度有間茶室真心靚景, 我就係為左呢個景而黎。
有去開日本果D庭園嘅朋友應該都會感受到日本攝影師影相嘅威力, 明明嗰個地方只係得某個角度, 又或者某D位先靚, 影出黎好似仙景咁‥‥‥好多時有名過其實嘅感覺, 而呢個庭園真係冇得輸。
 Menu都有介紹, 冬天個景一樣咁正。
 呢度地方又夠大又少人, D櫈又坐得幾舒服, 行左成個上午梗係坐多陣，食埋個TEA先走。
 有好多加左人蔘製作嘅茶點, 仲有自家烘焙嘅咖啡豆製作嘅咖啡。
 我就點左「御抹茶」600yen, 包左一個高麗蔘羊羹~
 味道係幾特別嘅, 羊羹蔘味濃, 有回甘, 不錯。
如果想食野嘅話其實果度仲有兩間餐廳, 主要都係食高級料理, 都可以睇到靚靚庭園景架。
到出口之前有個專賣大根島特產店（冇影到），亦都有呢Ｄ高麗人蔘Counter。特產店嘅野食係可以試架，好多都係由花或者人蔘製成，味道都唔錯架，少有會買呢Ｄ手信嘅我都有買到。
 由志園一年四季都有唔同花，秋天亦都係賞楓好地方。呢個咁靚嘅庭園，係由松江去境港必經嘅地方，好值得大家黎睇下。
 行左成日腳仔都軟晒真係好想返去抖下‥‥‥我地首先搭返去境港，中途再次經過江島大橋，　來來回回今日已經４次喇！！！哈哈，冇辦法啦，魚市場一晏左就冇好野食架喇，所以先咁樣安排。
酒店方面‥‥‥去境港嘅遊客應該都知境港站附近有一間叫「天然温泉境港夕凪の湯御宿野乃」，絕對係境港住宿嘅首選，又平又抵，係Trip Adviser幾乎一面倒都係正評。我地原本係book左呢間，淡季時佢都係７千幾yen一晚，真係好難搵到。亦都有一泊二食，晚餐有大大隻原隻紅楚蟹蟹宴，宵夜又有免費soba，早餐都係由境港魚市場直送嘅海鮮，以平均一萬yen黎計簡直係超值。
只可惜，因為我地之後一晚已經要去鳥取嘅關係，我地一定要入任米子嘅酒店，只有米子先有特急去到鳥取（１個鐘就到）。雖然境港同米子唔算遠，但都要成45分鐘，D班次又疏又難夾：由境港出發要2個鐘。我地又BOOK左時間去鳥取砂丘玩滑翔傘，最後都放棄左呢間溫泉旅館。
米子站都有好多鬼怪，如果好彩，由米子－境港係可以搭到妖怪列車イラスト列車（時間表按此），好多遊客都會特登揀返妖怪列車黎搭去境港架～
 米子站出面北口就係我地間酒店Hotel Harvest同日九高速巴士嘅車站。
附近好多車搭，我地聽日個溫泉旅館都係係呢個大巴士站度搭車架。
 今次又要同大家推介pass（呢個行程係我用得最多pass嘅一次），呢個pass又係勁抵。
 呢一個係巴士pass，我地後日就會版米子返去廣島，所以買定車飛先。一畑巴士係冇經營米子－廣島線，只有日本交通巴士先有。
搭JR由米子去廣島，係要８千６百幾yen，搭足3個鐘。
但係呢個外國人限定優惠，搭日本交通嘅高速巴士由米子去廣島只係需要1950yen，搭３個半鐘就到廣島站～幾大都揀搭日之丸啦～除左平，又唔洗轉線又唔洗搬黎搬去～
廣島站同米子站都可以買到呢個pass。
巴士時間表(按此)
套票詳情（按此）
咁大家都應該估到啦，日本交通巴士係有營運好多鳥取縣內嘅巴士公司黎。
作為遊客一定要填左問卷佢，呢個咁大嘅discount真係希望佢一直延續落去。
 終於買完飛，返返酒店抖下先。
酒店咁近JR站嘅感覺真係好好。附近仲有間Aeon Mall，勁大間，一陣再去作戰先～
今次我地都算窮遊喇，住嘅酒店間間都係平價酒店。而Hotel Harvest除左好近JR站之外，只係¥6480一晚（二人），已經包左早餐，除返開都係二百幾蚊晚‥‥‥
會唔會好似之前果間咁樣？唔會！！呢一間係我好比心機睇晒Comment先搵嘅！睇相啦~
酒店lobby
 地方比起一般apa酒店大，起碼都放到兩個喼又唔算太逼。
 廁所係乾淨嘅！放心！
 仲可以睇到夕陽同AEON MALL!!!!
 抖左一陣就衝落去喇，呢個城市真係幾靜下，所以話點解咁平，真係有好有唔好。
 唔好處就係米子本身冇咩景點，AEON MALL算係唯一一個景點，附近都有Ｄ溫泉，好似我地聽日會去果個皆生溫泉就係米子，不過都有少少距離，要搭車。
我地係呢間AEON MALL磨左好耐‥‥‥
 都有衫有袋買，咁當然個款冇得同東京果Ｄ比啦。
Aeon Mall都有mister donut， mister donut佢嗰啲包都越出越特別，勝在夠平，要黎頂肚一流～
 好肚餓呀，我已經頂唔順喇，食左個包先～
 附近都有幾間餐廳，都已經差唔多到晚餐時間都冇咩人。
 勁勁勁勁勁大間DAISO呀！買到傻左！
 呢一個咖啡飯點解可以咁平？如果我當年Working Holiday時京都果邊都有咁平，咁我就唔洗日日都食得咁慘‥‥‥
 最低層嘅超市係必去嘅，大量烏取特產俾你買返去～
 估唔到鳥取原來都係盛產喉黑架。對上一次見到喉黑嘅特產品係金澤‥‥‥
 呢個超市近收銀果度仲有一間土產店，好多野都有discount！呢支梨汁都好好飲架～
 仲有旅遊書推介必買嘅梨酒‥‥‥飲完之後覺得一般般姐。
 最搞笑係，收銀阿姐叫我拎passport俾佢睇。佢話我似中學生，睇完passport嚇一跳～～～呵呵～
其實呢個AEON MALL又冇咩人真係幾好行架，地方又大，野食又多。但係行左成日真係好攰， 要快Ｄ去居酒屋醫肚先。
居酒屋道有個好處嘅就係通常都有好多當地特產嘅嘢食， 又有酒飲，去旅行訓唔慣張床，飲完酒就會好好瞓喇～。
我哋今次去嘅居酒屋係位於明治町， 即係米子站對出嗰一條大直路。 原來係有非常多餐廳居酒屋，拉麵，咖哩，cafe，乜都有。 千祈千祈唔好誤會乜都有嘅意思， 唔係講緊好似大阪咁旺。 條街晚上非常冷清，始終都係剛剛開始開發嘅旅遊區。
呢間居酒屋叫做旬門， 係當地比較大間，較出名同埋有質素保證嘅居酒屋，所有淤鮮都係由境港直送架～有Blogger話有lunch set只需要1000yen，我地就３食晚餐，應該都唔平。
一入到去已經見到同外面冷冷清清嘅街道截然唔同嘅氣氛，佢哋嘅座位係一個好細嘅窿， 最多夠四個人坐， 唔算話坐得太過舒服。 我哋看圖識字咁點樣幾樣嘢食啦(呢度係唔會有中英文Menu，令到我呢個只係識五十音嘅遊客好崩潰)。
點咗金目鯛同埋真調刺身， 佢哋話係今日嘅推介黎， 當然仲都有好多其他款嘅，可以再去睇menu度睇下揀邊啲當日新鮮魚嘅做sashimi呀。
刺身終於到啦，金目鯛同真鯛係我嘅最愛之一， 呢度食一樣係非常之高質素， 大家可以試下呢兩隻魚包有驚喜。
亦都嗌咗漬魷魚， 都幾好食～
 呢杯巨峰味野飲都ok好飲。
另外點左一個串燒盛合， 正常居酒屋水準。
點左一個叫做大淺蜊嘅巨蜆， 係用清酒煮嘅， 非常香同埋juicy，只係略嫌蜆肉少少over cook。
雖然食左幾樣嘢呀但係邊會咁易飽丫，我哋想食少少飯底嘅嘢就點做一個叫いただき嘅野食。 話就話係鄉土料理，名物， 但味道就十足十係由腐皮包住一啲調過味嘅飯再放上香葉道上蒸， 十足十一個巨型嘅腐皮壽司。
食完呢個腐皮壽司同埋仲食咗個炸豆腐， 已經太飽下冇心機影相～
俾個心理準備大家，呢間野都唔算平架，但OVERALL整體野食都OK，海鮮尤其出色～值得推介。返去嘅沿路都仲有大量居酒屋，大家仲可以慢慢揀嘅。
食晚飯就返酒店瞓覺， 之前係AEON MALL買咗一啲蜜瓜同埋二十世紀梨嘅嘢飲今晚可以喺酒店度慢慢歎。
初夏限定神秘景點推介
睇晒成篇遊記嘅朋友，其實係６月份我仲有一個神秘活動推介俾大家。只係因為今次行程所限去唔到。就係賞螢！流螢只係係空氣水質少光害等等較好嘅地方生長，大城市幾乎唔可能見到，鳥取縣環境唔會太過度開發，好多時離市中心遠少少嘅地方已經有流螢睇！
以下呢幅圖就係鳥取有流螢出沒嘅地方，一般都係６月上旬至７月上旬時間出現。
以米子為例，最近嘅賞螢地點就係八幡橋（近八幡神社附近）,可以搭日本交通嘅水浜線.米子駅~遠藤方向，係附近落車再步行去八幡橋。
鳥取咁多個賞螢地方又以樗谷公園（近鳥取砂丘）最為有名，由鳥取巴士站0號站搭100yen循環巴士くる梨バス約15就可以到會場。（據聞2017年最後因為當地螢火蟲數量突然銳減，最後都取消左個鑑賞會。）
都要留意返當地巴士班次唔多，好多都晚上６、７點就已經係最後一班，所以最好都係自己揸車去睇。
每年更新的流螢情報網站：http://tottorihope21.com/
相關照片(源自網絡)
呢晚要早少少瞓聽日要去鳥取砂丘嗰邊玩滑翔傘，去唔到睇流螢喇‥‥‥晚晚都玩到十一點嘅話聽朝一定會係砂丘到暈低。好期待之後一日嘅行程，咁大個都未玩過滑翔傘架我，佢又同其他唔同嘅係，呢個滑翔傘冇咁辛苦～之後晚上會去到山陰屈指可數的名地——皆生溫泉，有向海嘅房間同露天浴場，留意下一篇遊記介紹啦～
參考網站：
由志園
網站：http://www.yuushien.com/yuushien/
地址：島根県松江市八束町波入1260-2
電話：+081 852-76-2255
營業時間：9:00～17:00
入園費：800~1000yen
交通：松江巴士站免費shuttle bus/松江來往境港巴士經由志園站下車，約25分鐘
​
ホテルハーベストイン米子(Hotel Harvest In Yonago)
地址：鳥取県米子市弥生町8-27
電話：+81 859-31-1111
交通：米子駅步行1分鐘
參考住宿費用：6,480yen/2位
​
イオン米子駅前店(Aeon Mall Yonago)
地址：鳥取県米子市末広町311
電話：+81 859-22-2121
營業時間：8:00〜22:00(1樓)8:30〜21:00 (2樓及4樓)
交通：米子駅步行5分鐘
​
和食居酒屋 旬門 米子本店
地址：鳥取県米子市明治町154番1
電話：+81 859-21-7088
營業時間：11：30～13：30（L.O）；17：00～24：00（L.O）
交通：米子駅步行3分鐘
​

 

 

(Visited 283 times, 1 visits today)