【山陰山陽8天遊】Day6(上) 山口縣岩國半天遊．三大名橋錦帶橋．岩國城．美食推介

2017年6月15日

由6月15日至18日第三日呢我哋都會逗留喺廣島市中心，廣島其實唔算好多嘢行而且有啲景點呢我係唔會行嘅。有留意我嘅Blog嘅都應該知道我係鍾意留番一啲二線景點下次再去嘅，咁所以呢三日呢我哋會將佢分為三大類：

第一日世界遺產 – 宮島同岩國

第二日市中心shopping – 集中本通周邊shopping mall 同藥妝店、本地美食等

第三日文化 – 廣島紀念公園、原爆圓頂館、新景點紙鶴塔等

市內又唔止咁少景點嘅，仲有尾道、三段峽等景點大家都可以考慮，綜合我同朋友兩個人嘅comments之後呢我哋都係揀咗上述嘅景點。

呢日朝早上午十9點半左右我哋求其係便行店買左個簡單早餐就已經出發去岩國。出發前上網做過research其實係可以一日去曬兩個地方嘅，大前提係唔去晒成個宮島同岩國嘅景點。

廣島交通方面主要以JR、電鐵、巴士為主。通常遊客主要只係用到JR同電鐵架姐。電鐵其實就是香港嘅電車係路面行駛咁，冇咩特別。上一集講過我哋呢三日都會用到 visit hiroshima tourist pass 三日券。Pass嘅比較分析同用法可以參考返我上一篇嘅遊記。上車時候只要出示過pass就可以唔需要買飛。

我哋係由十日市町出發去新井口再轉乘JR去岩國站，到咗岩國站仲要轉巴士去其他景點。順帶一提新岩國站同埋岩國站都有巴士去錦帶橋，新岩國站比較適合喺新廣島站出發乘搭山陽新幹線嘅人。呢佢嘅景點主要係咁錦帶橋、岩國城、岩國城纜車等，景點非常集中。

想去晒呢幾個景點都可以喺岩國站到買一個週遊pass，已經包曬巴士車票同交所有入場門券等。我哋原本打算去錦帶橋附近行下同埋食個brunch 所以就冇買到。

一出岩國站基本上就有好大個巴士站（２號）住寫住去錦帶橋。巴士名叫「いわくにバス」，有幾條觀光路線巴士都可以到到，包括係：「おはん」巴士、錦帶橋巴士、いちすけ号

落車就已經見到錦帶橋喇因為巴士站附近就已經係錦川。

對面附近係有Locker嘅。

呢個就係巴士站。

之所以咁想去錦帶橋係因為佢係日本三大奇橋之一，全條橋都係用木製，更係採用一啲好複雜嘅組合式建造方法，冇用過一粒釘。

利用五連式嘅拱橋造型真係好似一條條咁錦帶喺水面一樣，好靚。如果春天黎嘅話，兩岸河堤上嘅櫻花映襯起錦帶橋，更加有風味。

呢一日天氣真係極好。

呢一張比較

可以落去橋下睇下～當然揀冇咩河水嘅時間。

行到橋底可以清晰見到佢嘅結構～

上橋費係300yen，條橋真係好拱，所以都要有少少腳骨力！見到佢係用全木建成真係覺得好鬼宏偉，據聞佢起到咁拱係因為可以俾船經過。

附近真係山明水秀，好靚。

見到幾拱未？三大奇橋真係冇講錯

Ｄ水係清到見底，香港真係搵唔到。

呢Ｄ船係俾遊客坐架，不過當日見唔唔算多人。

六月起至九月其實仲可以睇到係當地有成有三百幾年歷史嘅「鵜飼」表演，係一種叫魚鷹嘅鳥類嘅捕魚表演，大家都可以選擇乘船觀賞。

錦帶橋嘅春夏秋冬(源自Google Search）:

過左錦帶橋，另一邊都好多餐廳，當地最出名嘅野食一定一定係岩國壽司。今次我都係為左岩國壽司而黎。最老字號同最出名嘅就係「三原家」同「平清ひらせい岩國壽司店」，難得黎到，但竟然唔肚餓‥‥‥

附近好多餐廳都有岩國壽司食。仲有一Ｄ專賣手信，但唔算太特別，冇影。

本身都想試呢間，但係好早已經賣晒喇，D人真係好早黎參觀架。

雪糕又食得落喎xD

呢間細細間嘅雪糕店「むさし」已經登上珍百景嘅節目採訪，都有D名氣架，黎到呢度幾乎係人手一支。提供超過一百種以上嘅雪糕口味(依家好似已經多過160種）。除左一般口味之外，仲有納豆、七味味、咖哩、山葵、拉麵等‥‥‥

呢幾隻雪糕個樣好似生腫瘤咁。

我都係食返正常野就夠喇。呢個係薄荷朱古力。

岩國美術館。

為左加快令到自己肚餓唯有上去岩國城。

去岩國城要搭纜車架，MISS左一班都唔算等得耐，十至十五分鐘左右。

早知去就買埋ONE DAY PASS，會平少少。

好少可專程搭纜車去一個景點（除左咩富士山果Ｄ之外），除左久能山東照宮之外。

岩國城係位於山頂上，搭完纜車仲要行一段路,大概十分鐘左右。不過要提提大家其實去埋岩國城係有少少趕時間，最好就快Ｄ行。

呢個天守閣於1962年重建。天守閣遵從桃山風格重建，因為係山頂嘅關係，易守難攻。

入面就唔係好多野睇，有展示一D武士刀，以前嘅生活用品、軍事野等等。

見到呢幅圖都發現原來自己去過幾多奇橋。日本奇橋有幾個版本，不過其中一個版本已經去過喇，包括藤蔓橋、神橋、錦帶橋。

模型一樣都好靚。

都好值得上黎睇下，可以睇到岩國嘅地形同曲流嘅壯觀。呢種地形好似只係係地理書上見過。

拜拜喇岩國城。

呢個角度點影都怪怪地‥‥返黎先知原來最靚嘅角度係另一邊。

落返山之後會經過旁邊一個幾靚嘅吉香公園可以過返錦帶橋。

正值菖蒲嘅季節。

再次經過錦帶橋。

另一邊嘅潺潺流水。

係錦帶橋前面（面向巴士站嘅橋口嘅右手面）都有一D土產店，臨走，當然要買下手信。途中竟然見到係水溝度養錦鯉，之前見果Ｄ都冇咁靚。加埋D花真係嘆為觀止。

我地係藤本商店買到呢一隻係150年老店「錦帯橋たもとひらせい「(平清)嘅岩國壽司，最後都冇坐低食，但係咁樣拎走係巴士站食都叫做了達成呢次嘅目標。

呢一隻係我地係路上見過咁多隻外賣式之中最試正嘅。

一份壽司兩份SHARE，其實佢就唔係咩特別野，只係製法獨特，好似一個巨型押壽司一層一層咁，而上面用料都係熟野，多數都係魚或蝦、雞蛋、冬菇、蓮藕等等食材，可以KEEP耐D。顏色靚之餘，口感豐富，都幾好食嘅。

值得一提嘅係行到巴士站附近有一間土產店出售一種魚板（即係魚蛋），具體邊一間店鋪有我真係唔太SURE，好似係岩國觀光物產館。其實山口縣其中一樣名產就係魚板，係利用新鮮而鮮味而顏色非常白嘅魚，利用間接加熱法烤成嘅魚板，係山口縣獨有嘅技術，又香又有咬口。呢一間就冇賣果隻，但就賣另一種就係利用真空加熱法製作嘅魚板，因為係完全密封,所以係無任何防腐，同樣可以常溫保存60日。