2017年6月15日
去完岩國之後就要出發去宮島喇。我地搭返巴士去岩國站再轉返JR山陽本線・白市行方向，由岩國去宮島口。
講起宮島口，應該大家都會聽過去果度食蠔，附近有兩間其實都好唔錯架。不過講到最最最最受歡迎嘅食蠔餐廳，一定係宮島上面嘅「牡蠣屋」，今次就係專程去呢間食嘅！
由JR站出面沿住大路直行就係JR宮島渡輪碼頭，一般15分鐘都有一班船。唔知點解係廣島係見到特別多外國遊客架喎！驟眼睇，仲多過京都同東京。
好清楚見到JR宮島FERRY碼頭
 我地由岩國去宮島好易都係JR宮島站轉車。不過如果由廣島市中心出發就有好多種方法喇。
廣島市內＜＝＞宮島交通：
JR/電車？其實兩個都係唔需要轉車就直達「JR宮島口駅」（約車費￥410)或「廣電宮島駅」(車費￥260)。但係留意返JR係快一倍時間，只需要半個鐘。
船方面：同樣係「宮島口棧橋」度搭，可以選擇兩間公司營運嘅航線，兩個碼頭係勁近嘅；船費一樣都係￥180，只係分別在於
船程都係差唔多。由於我地由岩國出發，我地冇得揀，搭JR。
如果唔近廣島站可以點算？係市中心搭廣電搭到去横川駅轉JR。
 留意返，兩間船公司買飛地方其實好近，千祈唔好搞錯：
仲有另類選擇就係世界遺產航線，但平均1至2小時一班，由市中心出發，但就比起係「宮島口棧橋」搭嘅貴好多，會經由市內平和記念公園出發，遊覽原爆Dome直去宮島，大約￥2000位。

宮島有冇pass?
以前就有Free pass，依家已經冇得賣喇。如果行程同我地差唔多，可以好似我地咁買Visit Hiroshima tourist pass【SMALL Area 】就夠，會送一本Fun Pass Hiroshima，已經包左廣電同船嘅費用，記得要跟身，好多優惠。
宮島空中纜車有冇得平？
如果去到臨時想上山，可以用Fun Pass Hiroshima內嘅coupon：
宮島纜車　原價 ￥1800→￥1350
千光寺山纜車 (單程 ￥280、來回 ￥450)。
另外廣電同松大汽船都有PASS cross over的pass（成人 ￥840、小童￥420）。
如果唔會去市內就可以考慮，會去嘅話買Visit Hiroshima tourist pass就已經夠。

 

 

呢隻船係可以乘載汽車嘅，比一般船大少少，有三層，上面兩層都係乘客坐嘅。而船程只係大約10分鐘左右，好多乘客都鐘意吹下風而唔入室內坐。
大家要留意呀！想影海上鳥居嘅記得帶長鏡頭同埋霸定欄杆位。越黎越近嚴島神社，遊客們都好興奮個個都會舉機影相架！
呢一日我竟然好失策咁咩都冇晒電T____T所以影到嘅相唔多。
落左船之後向右邊行就係神社方向，沿路已經見到好多鹿仔。佢地真係唔休食，比起奈良果D要食膠袋，我覺得佢地幸福好多。
行行下會見到有少少分叉路，一邊係內街，咁我地就選擇左行外檔，行完先去食野啦！
呢一隻好想入餐廳食野添‥‥‥
 見到呢個石造鳥居代表差唔多到喇 !
 嘩嘩嘩！海上大鳥居真係名不虛傳，真係勁巨大。可惜我地揀錯左時間，呢個時間唔湯唔水，又影唔到紅色大鳥居，又有排都未到日落T_____T 最慘係佢地開始潮退喇‥‥‥
 呢個位係十級多人影嘅，所以影得唔好都冇得再慢慢影。
 佢個樣真係好鬼奸。
 後尾俾我捉到佢係度曬太陽就幫佢影張寫真。
出面呢D小鹿真係又乖又可愛！一隻二隻都係度曬太陽，仲乖乖任摸！
入場費300yen，水退左嘅神社同我想像中好唔同，好失望，今次真係唔夠細心，冇諗到呢一點。
呢度名為鏡池，係潮退左先會見到嘅景像，好似一面好圓嘅鏡。
呢一條迴廊真係好靚。嚴島神社太受歡迎，成日都人頭湧湧。唔好見我張相好似好少人，係捕左好耐先影到‥‥‥。
係就係有少少失望架喇，但呢個已經有成1400年歷史嘅神社都真係幾靚下，仲有少少中國風？原來佢係採用左「寢殿造」，即係仿中國宮殿嘅建築風格，係平安時代嘅作品，其實去得多旅行就會Feel到D神社嘅Style係咩時期起，係咪覺得京都嘅八坂神社同佢又有D似樣呢？
呢度大部份位位置都係取景好地方。
仲有反橋，非常拱，只據聞淨係天皇嘅使者先可以行到‥‥‥但斜成咁，係人類行架咩‥‥‥依家已經封左架喇。
行經祓殿之後會見到高舞台。
 雖然唔係想像中係海水中嘅神社同鳥居，但原來都有另一種美。
 好多人都會行落去影相，一行對鞋就報銷架喇！
 仲有另一個靚景位。
五重塔
 
宮島三景我地只係去左海上大鳥居同五重塔，仲未去千疊閣，附近其實仲有好多有特色嘅地方未能一一盡錄，都係借住朋友部相機求其影多幾張咋。行完之後，其實係好想再趁有海水嘅時候（上午）再黎多次，一定好靚。
食完飯之後就去左表參道度行下喇。其實五點幾Ｄ鋪就開始閂架喇，所以唔夠時間嘅最好行左表參道食左野先。講起宮島最出名嘅之一一定係楓葉饅頭，但係真係唔洗諗都知呢D一定係軟軟地，一咬落去就好鬼甜嘅‥‥‥但係呢度竟然有鋪頭將楓葉饅頭變成新名物，就係炸楓葉饅頭！
呢間叫紅葉堂嘅店其實係已經有成過百年歷史架喇，好多人都會首選呢一間！佢最特別之處係可以堂食炸楓葉饅頭！
好老實，原本只係陪朋友食，一黎唔鐘意食炸野、二黎想像到佢咩味‥‥‥不過係朋友嘅引誘之下試！真係好唔錯，有吉士味同招牌紅豆饀！我地一路食一路係度幻究竟邊個諗出黎呢？
係唔係店主發現賣唔晒，要日日食返，之後頂唔順喇，轉下炸左佢轉下口味而變成呢個食法？
全部機械化，可以睇住佢地一個一個咁做起左，又幾療癒。
至於楓業饅頭起源點黎？其中一個說法係話日本有個首相叫伊藤博文，佢去廣島一間茶屋休息時，稱讚一位女服務員的手好靚好似似楓葉咁，烤一烤一定好好食，之後老闆娘受到啟發‥‥‥真係好難理解，正常人應該唔會話想烤人地食手黎食掛？
以為炸楓葉饅頭係新野？依家仲有朱古力楓葉饅頭同埋楓葉饅頭味嘅酒‥‥‥
講返comment，呢一類型嘅手信其實都係果句，要配返抹茶咁甘先好食，而呢個炸楓葉饅頭的確係幾有驚喜，未至於好似D youtuber講嘅咁驚為天人，但都值得一試嘅。
表參道內仲有一個世界最大嘅飯杓！高7.7米，重2.5噸。之所以有咁大個飯杓，唔講唔知，原來飯杓係宮島出名嘅特產之一，作為一個成功的紀念品，賦予佢有最貼近生活嘅功能係必須。相傳係宮島光明院嘅修行僧誓真，根據當地人信奉嘅弁財天手上揸住嘅住嘅琵琶嘅形狀而製作呢一種飯杓，用黎送俾黎宮島參拜嘅人士。莎朗真係甘拜下風，佢真係一位Marketing大師！
至於後來用黎祈福、明信片等等嘅功用，莎朗就唔講喇，有興趣可以去參觀下。
島上除左有飯杓、楓葉饅頭之外，都有唔少小鹿嘅商品，商品款式感覺同奈良唔係好大分別。
去到宮島一定一定要食蠔，之前講左我地想去食Tabelog Top5000嘅餐廳「牡蠣屋」，點知去左佢已經關左！！點解？！好食嘅餐廳就係咁串‥‥‥已經係繼出雲之後第二間賣晒之後就關門嘅店鋪，真係非常失望‥‥‥
失望還失望，但係我地想食蠔嘅決心係不滅嘅！退而求其次（其實都唔算）揀左附近都幾出名嘅炭燒蠔「みやじま華屋敷」，呢間不嬲都係人氣店，成日大排長龍嘅，店內只有少量座位，最好一個等位一個買燒蠔。
而佢價錢真係唔貴，先300yen一粒，超級大隻。即點即燒更加係賣點，仲有唔同配料同醬汁可以揀，買完之後企係度等已經流晒口水。
我地好似encore左兩次？堅好食。之後好快已經Last order。
如果真係食唔到可以出返去宮島口果邊有一間叫「島田水產」係食放題生蠔，開到晚上７點嘅，15個2750円，20個 3500円 、30個 5000円；而燒蠔放題就係2300円。廣島蠔口感都幾肥美，其實我地每人食左4隻左右已經覺得好夠。
另外有一間上網當地人都話唔錯嘅係「佐久間海産商会」，佢由1673年創業嘅養殖場老店，同樣有放題。不過就睇SIZE同睇數量，驚食唔晒都可以逐隻買嘅。
行行下都差唔多行完喇。其實仲有其他景點，例如可以搭纜車上紅葉谷公園，可惜我地又唔係紅葉季黎，所以打消左念頭。
 再見喇宮島。
傍晚時份我地就搭返船去宮島口返廣島喇！記得我之前嘅Blog有介紹過廣電Pass有一本書仔會送嘅，呢本書仔叫FUN PASS其實有好多coupon介紹廣島名店。例如呢間係宮島口一出左口邊附近，近JR站嘅鰻魚飯「駅弁あなごめし うえの」一樣，佢係Tabelog上同樣Top5000嘅食店，係百年老店，有非常高嘅評價。佢係廣島市嘅三越都有分店，同樣非常受歡迎。
（由於相機真係冇咩電，冇咩點影相，引用返其他人嘅照片俾大家黎返店家同環境。）
圖片來自Google Search
話佢係鰻魚其實唔係好恰當，正確黎講應該係星鰻，即係成日壽司店見到嘅穴子壽司嘅穴子，係鰻魚近親，係海魚黎（鰻魚係河魚）。
佢係冇咁厚肉，但係就相對鮮味好多，口感札實D，油脂相對冇咁多，女士們又多個藉口去食佢喇。一般黎講呢間鋪係要等30分鐘至一個鐘左右，但係我地5點幾來到，又未到晚飯時間，唔多人，唔洗等，幾好彩。
本書仔係有呢一間鋪嘅Coupon，可以用超級特惠價食到呢度嘅招牌穴子飯（大碗版），冇記錯原價係2000yen，依家1000yen就食到，真係超級抵！心水清嘅朋友應該記得張3日pass先係1000yen，食一個穴子飯幾乎就慳晒呢３日嘅交通費。
(右面就係coupon喇)
呢一日就完喇，行左咁多日都係郊區同景點，幾乎冇shopping，點得呀？點都要補補夏天衫啦～之後一日嘅行程係市內Shopping，會介紹返最好買嘅店舖同必買必食嘅野。
其他參考資料：
みやじま華屋敷
地址：広島県廿日市市宮島町531-2
電話：+81 829-44-0180
營業時間：11:30～13:00（我地當日去係開到下午5點左右）
​
紅葉堂
網站：http://www.momijido.com/
地址：広島県廿日市市宮島町448-1
電話：+81 829-44-2241
營業時間：8:30～17:30頃(因應季節有所不同)
交通：嚴島神社步行10分鐘至表参道商店街內
​
あなごめし うえの
網站：http://www.anagomeshi.com/
地址：広島県廿日市市宮島口1-5-11
電話：+81 829-56-0006
營業時間：11:00～15:00；17:00～22:00（定休：星期三及每月第二、三個星期二）
交通：JR宮島口駅下車步行3分鐘
​
(Visited 223 times, 1 visits today)