【山陰山陽8天遊】Day2(2/2) 迎百神著陸之地－稻佐之濱 • 世界燈塔百選－出雲日御碕燈塔 • 松江紅楚蟹會席料理

2017年6月11日

食完好味嘅割子蕎麥麵，可以順便向海嘅方向行10分鐘左右，就可以黎到呢個唔算特別出名，但係係出雲必到嘅地方－稻佐之濱，唔少呢度嘅宣傳照都係係度影架。

之所以係度影，除左係因為呢度個日落真係好靚之外，又係國讓神話嘅發生地（自己Google，故事太長），更加係因為呢度係百神匯集嘅地方，各路神仙黎出雲都會先嚟到稻佐之濱上陸。

係日本農曆10月10日就可以係呢度見到重要嘅儀式，分別係神幸祭同神迎祭，係海濱點上火苗，將龍蛇神同神篱向住大海擺放，之後就會由神篱引路到出雲大社嘅神樂殿，諸神就會係出雲大社東西十九社進行神議。

呢度好多影相位～呢個弁天島上嘅小神社就係10月10日時嘅通關接待處～有個小小鳥居～好可愛呀！

要留意返，呢度啲巴士都幾麻煩囉，附近個兩個巴士站班次真係好疏，差唔多一個鐘都未必有一班。其實由出雲大社去稻佐之濱係可以步行前往，但都要成18分鐘‥‥‥‥所以建議可以好似我地咁，先行左一段路，約10分鐘，停低食個麵，再行多十分鐘去稻佐之濱。花咗好多時間喺稻佐之濱影相，Miss左去下一個景點－日御碕燈塔班車。

要行返去出雲大社聯絡所‥‥‥仲要係上斜‥‥‥腳仔都痛埋。

搭巴士去日御碕要係【出雲大社連絡所】轉去【日御碕方面行き】嘅巴士，雖然大社・日御碕線亦都有班次去日御碕灯台，但只限早上8時幾，大部份班次都會係出雲大社連絡所度停低。

由出雲大社行過去只需要一分鐘，出雲大社聯絡所站嗰度亦都有餐廳，可以食完野之後就可以搭車去日御碕。

呢日行程好密呀！一日有成四個景點，唯有搭尾二嗰班車去日御碕燈塔。

落車嘅地方，周圍都係停車場，好多自駕遊嘅人都會黎呢度。

日御碕燈塔可能對於大家黎講真係聽到未聽過，但相信係燈塔迷心目中絕對有重量級地位，因為佢係入選左世界燈塔100選以及日本燈塔50選，亦登錄為「国の登録有形文化財」。話佢係全日本最靚嘅燈塔絕不為過－日本最高的全白色石造燈塔。

落車之後向左邊行可以見到一個步道牌，大家千祈唔好學我地差唔多尾二班車先黎，因為時間好趕好趕，得返大半個鐘左右，如果去小店買下野分分鐘會miss最後果班車（如果miss左可以行去日御碕巴士站大概十分鐘）。

沿住步道行先會見到呢個靚景~

位於燈塔西北邊嘅斷崖都好正架，面向海邊，附近又有啲岩石位可以企係度影相，有D情侶會坐係果度享受下二人世界，睇日落。

個景真係好靚架，但真係好大風，瘦D都會俾風吹郁架。

如果識揸車就可以係日落時間黎，個景會仲靚架。

平時可以登上 163 級螺旋樓梯睇晒日本海一帶景色，不過今日我地太遲黎，已經關左。附近有D食肆同小店(主要賣貝殼)，都可以行下。

咁啱遇到香港人幫我地揸機，但太大風，冇一張正常，哈哈～都係回憶黎嘅。

我地搭返尾班車去返出雲大社連絡所再轉返車去出雲站，轉返車去松江站。

其實松江都好旺好多野食架。如果我地唔係訂好酒店先黎改機票做8日，其實可以睇埋宍道湖個日落，搭下遊覽船咁樣。至於點解揀松江？除左佢係一畑巴士嘅一個交匯點，去出雲有得，去鳥取境港又得，同樣可以用到Pass，而且時間係快嘅，今次先去松江再去出雲又返返松江好似好花時間咁，但其實咁樣慳到錢外，仲可以將超長交通時間分2日進行，又唔洗搬行李轉酒店。

返松江時見到的日落，可惜夏天日照時間長，如果可以係燈塔度睇埋就好喇。

行左成日唔慰勞個肚仔下點得，當地有間野專食蟹嘅會席料理，都有D名氣嘅，叫松江和らく，好近JR站，北口步行3分鐘就到。

之所以揀蟹宴係因為島根都好近鳥取，鳥取出名食蟹，所以超近鳥取嘅松江都有好多蟹食～

外觀果然好似好高級咁。

都有唔少選擇，我地就揀左有9樣野食嘅蟹宴—竹。

由於係夏天關係，所以係唔會有松葉蟹食，呢Ｄ應該係紅楚蟹黎。紅楚蟹一年四季，產量多又平～唔知口感係點呢？

先黎一杯蟹酒。蟹酒都有少少蟹香架，朋友話好香蟹味，我又唔多覺有蟹味喎。

第一道菜係烤鴨同炸魷魚，其實魷魚都係特產之一黎。烤鴨又出奇地好食喎，反而魷魚就唔夠爽口喇。

呢一帶嘅特產係松葉蟹同紅楚蟹，唔知大家有冇試過兩隻？其實松葉蟹只係係12月至2月期間供應，我地今次6月，就冇得食，但紅楚蟹係松葉蟹嘅近親，都係長腳蟹黎就係11月至6月都有。我地今次趕到水尾黎食，佢一樣肉多又鮮甜，產量又多，但因為佢一上水蟹腳就易斷，而且又較難保鮮，可能因為咁，價錢就平幾倍……..呢D就叫同蟹唔同命。

我地叫呢個蟹肉刺身，得果幾條…..而且冇乜味wor~究竟係呢隻蟹唔好食定要食新鮮嘅先得？