2017年6月11日
朝早9點就由松江出發啦，出雲市景點唔多，基本上一日已經夠玩。今日我地先搭JR返返去出雲市。
 行到去松江站北口對出右手邊呢度入去呢條街，我地要買一條超值PASS～係FOR呢２日嘅行程。
一次過去勻出雲、松江、境港必買超值PASS – 縁結びパーフェクトチケット
之前提過一畑巴士有幾好，原來佢地仲有外國人優惠PASS-結緣三日券「縁結びパーフェクトチケット」，英文係Perfect Ticket。三日內指定Area嘅巴士都可以用呢個PASS，只需要1000yen真係好抵。
指定區間包括:
一畑電車・一畑巴士・松江市營巴士區間
出雲一畑交通、松江一畑交通、日ノ丸ハイヤーの出雲・米子空港連絡巴士
• 出雲縁結び空港 ⇔ 松江駅・松江宍道湖溫泉
• 出雲縁結び空港 ⇔ 出雲市駅
• 玉造温泉 ⇔ 出雲縁結び空港 ⇔ 出雲大社
• 米子鬼太郎空港 ⇔ 松江駅
詳情可以去呢度睇（官網寫3000yen，但外國人出示passport係會有discount)：
不過要留意嘅係高速巴士(即係我地前一日搭果D)同定期觀光巴士同都唔可以用架
除左以上路線，仲有好多個景點係可以享有Discount。
雖然呢個係3DAY PASS, 但因為太平喇，所以就算玩1日已經夠你回本。好似我地呢日個行程咁，以松江為中心出發，先搭JR去出雲大社再轉巴士。
1. 松江->出雲->出雲大杜->日御碕
2. 松江->境港->米子
呢隻PASS係一畑Travel Services Center（松江站北口）可以買到，即係下圖門口有藍色Banner果度。
其他售票嘅地方：
松江：
  • 一畑トラベルサービス松江駅前営業所　（我地係泥度買）
  • 一畑電車松江しんじ湖温泉駅
出雲：
  • 島根県物産観光館（島根ふるさと館）
  • 一畑電車出雲大社前駅
  • 一畑電車電鉄出雲市駅
  • 一畑バス玉造案内所
  • 一畑バス大社連絡所
  • 出雲市文化観光案内所
  • ツインリーブスホテル出雲（JR出雲市駅北口東隣）
境港：
  • 境港市観光案内所（みなとさかい交流館内）
  • 一畑トラベルサービス境港営業所
機場：
  • 出雲縁結び空港総合案内所
  • 米子鬼太郎空港案内カウンター
  • 空港連絡巴士車内
官網有寫松江國際觀光中心都有，不過記住呢度買可以換飛，唔可以買飛。
一畑巴士除左島根之外，鳥取、米子果邊都係冇架！兩日我地已經轉去米子果邊度住，所以買埋Pass會仲慳，。
山陰山陽7天PASS VS 山陰岡山4天PASS
咁到底要買咩PASS呢，上網睇過咁多個PASS，我地主要去8日，主要係去出雲、松江、米子、鳥取，廣島只係市內遊，東邊最多都只係去岩國（山口縣）西邊最多只係到鳥取，所以我就揀左呢隻山陰．岡山4天PASS。呢隻pass好處係可以坐特急列車（只限自由席）來往岡山－鳥取、鳥取－米子、岡山－米子。須知道,好似我地想由米子去鳥取，單程已經2840 yen，來回已經值晒回票價。
 PASS係JR站就買到。

我知道好多人會買山陰山陽PASS，但要留意返，千祈唔好俾山陰山陽PASS個名呃左，係就係包晒我地去嘅地方，但其實佢係駁埋可以去埋大阪同四國，所以7日已經要19000yen，但我地買呢個pass只係4500yen，加埋我上面嘅巴士pass同來回廣島嘅500yen高速巴士，都只不過係7500 yen。

廣島市內交通又係平到極點，呢D後話喇，總之，如果你唔係由大阪/博多出發，其實山陰山陽７日PASS好難用得盡（仲要得7日，真係每個地方純粹打一打卡‥‥‥）。

預先上網訂左4日JR Pass，去到松江站換飛就可以喇。

 去出雲市大概有兩個主要交通工具—一係就搭一畑電車，一係就JR。雖然我地個Perfect ticket已經包左一畑電車（要由松江しんじ湖温泉駅出發，大概一個鐘），JR陰山PASS又包埋去出雲（仲可以搭特急，只係35分鐘)，咁梗係揀個快架啦！
呢部係特急やくも號，佢運行區間係由岡山至出雲市。
沿途真係….冇咩野睇。
搭JR由松江半個鐘就到出雲，好快呀。真係食完個早餐就到，櫈都未坐暖！
出雲站一出閘左右都有個小商場，雖然鳥根唔算多景點，但出雲大社係好重要嘅大社黎，每年都有好多人黎參拜，所以呢邊都有幾多土產賣，有時間嘅可以回程再睇。
 呢隻島根貓都幾可愛～
咁啱呢日仲遇到小型市集。
 佢地都會自己擺檔有唔同飾物、野食、食材等。
呢個炸魷魚真係好香。
出雲站出面有巴士站，可能因為今日係星期日，都幾多日本人去出雲大社，巴士係Full晒。
我地係１號巴士站等車，係搭去出雲大社嘅。一畑巴士嘅日御碕線・大社線（往日御碕線／大社方向）都可以去到出雲大社。
我地去出雲大社之前會先去島根Winery。到島根Winery(島根ワイナリ)個站就落左車(要留意班次真係唔多)，呢度可以參觀釀造嘅過程，仲有得免費試酒，所以唔打定底點得呢？
  
好有歐洲建築風味，門口果個大酒桶同紅酒係必影嘅。
呢個係另一個入口～同樣都有木酒桶同酒樽。成個園區佔地超過四萬八千平方米！
係附近仲有葡萄園。真係冇去島根都唔知，島根係葡萄產區，半世紀前開始葡萄酒釀酒業，有出產紅白酒。
 起緣竟然係因為1950年代時，天氣唔好，成日落大雨，葡萄賣相唔好自然另謀出路～所以話日本人真係好識做生意。
 呢度Ｄ降築全部都係紅瓦白壁，充滿南歐風情，見到呢度咁靚嘅環境，遊客又唔多，真係行得好舒服。
 佔地都幾大架，呢度仲有幾間餐廳，食燒和牛，西餐、SOBA等。下圖就係餐廳嘅area。
另外當然係重點嘅釀酒廠同試酒即賣館「Bacchus」，我地唔係好想去參觀釀酒（睇過好多次），所以直接去左試酒。
 一早就去飲酒好似怪怪地？哈哈，其實因為呢度大概4點半至5點就會閂門，餐廳開到７點半），一陣去完出雲大社，會去稲佐之浜，仲會去睇燈塔，所有應該趕唔切架嘢。如果唔去睇燈塔，應該夠時間先去出雲大社再黎呢度參觀嘅。
一入門口就見到好多好多酒。
試酒區都幾多人
係呢度拎個小膠杯就可以無限試飲喇！
呢度每一個酒桶上面都有一至兩隻酒，總共狼成十幾支任試。佢地上方會標明係甜Ｄ定辛口Ｄ，又會標明度數，試啱呢度當然有得賣，而且真係唔貴。
中間有盆酒放係度冰住大家任斟，酒鬼們唔好放過呀～普遍後黎講都算係偏甜，全部都好易入口。
 呢個女人飲唔停。
我覺得呢支Marie好好飲，係超級甜嘅果香，女士應該會鐘意，我最後都買左一支返香港。
另外想飲貴價野都可以俾錢試下靚野。仲有其他試酒Counter。
呢度D酒千幾yen已經有交易，抵買，又唔算好好飲，不過可以話係好易入口。
場內仲有好多島根名產，好多都有得試食，可以試完再買。
呢隻限定酒味蛋糕係呢度嘅大人氣～用左當地限定葡萄酒「ENMUSUBI」及紅茶酒「TEANA」製作而成蛋糕！
 好多都係酒味嘅野食，又或者包裝到係送酒嘅甜點。
 酒味嘅波波啫喱，口感同食法都幾得意架， 買幾包送分俾同事都幾唔錯～
 呢度都有出雲蕎麥麵賣，不過一陣我地都會去食，試過好唔好食先去返車站買啦～
除左酒，黎呢度嘅另一個目的就係島根和牛。呢度有唔少餐廳，有意菜，有日本菜，仲有燒烤。呢間「Steak House Château 彌山」係的我好想好想黎食嘅，入面有大量高質和牛set，平有平食，貴有貴食，最啱我呢Ｄ窮得黎又有返Ｄ要求嘅港女。
好似今日嘅lunch set咁，就好抵食。1600yen左右已經有。
 裡面都幾大，同埋睇佢地已經SET晒野就知佢地係專接待日本國內觀光團，環境光猛舒服。
野食黎嘢！ 呢個價錢係香港邊會食到和牛丫~仲要咁靚咁多油花，我冇記錯的話最頂級嘅位部都只係３千幾yen。
見到好多油花嘅和牛，唔敢相信呢個價錢就食到。非常新鮮，入口充滿油香，正。
記得唔好燒太熟，兩方反下就可以。
 仲有呢隻紅色嘅鹽係剛剛試油果度都有得賣！
一個完美嘅午餐～
食飽飽就去參拜喇， 係同一個巴士站搭返同一條路線就可以去到出雲大社，可妣選擇係正門前落車／下一個站出雲大社連絡所。
一落左車就見到呢條非常之長嘅參道，旁邊都有大量商店同餐廳！最遠有一個非常之大嘅石鳥居「宇迦橋大鳥居」～佢係日本第一大鳥居，真係歎為觀止。
出雲大社仲有３個鳥居，參拜人士會分別穿過木、鐵、銅造嘅烏居。
我未去出雲大社之前都唔知原來佢嘅地位咁祟高：日本舊歷嘅十月被稱為「神無月」，故名思意就神不在家嘅意思，咁Ｄ神去左邊？10月初秋當然齊齊去旅行，咁去邊？原來係去出雲會見日本神話中嘅萬神之母——伊弉冉神，所以只有全國只有出雲地區嘅舊歷十月仍然係「神在月」！
真係好威，連各國神明都聚集於此地。佢係日本地位非常崇高且最古老嘅神社，黎參拜嘅主要以日本人為主。
前面係Ｄ樹中間就係鐵鳥居！
 神社內又銅牛銅馬，通常一般神社嘅摸左都有好運嘅意思，但呢個就要小心喇‥‥‥
係好運，不過係「安產」生BB果種好運~~~哈哈哈~
 仲有代表住智慧～～
最後一個鳥居，係銅造嘅。通過呢四個鳥居代表淨化心靈，誠心參拜～
入面主要嘅參拜大國主神。之前有講過識拜一定揀10月先黎，因為所有神靈都會係出雲，所以係特別靈架！
本殿係唔可以入去架，據聞連皇室都唔比入架！
 出雲大社最出名嘅當然係全國最巨型嘅注連繩（我成日讀左做連注繩‥‥‥），以下呢個係拜殿嘅注連繩（分隔開聖潔同不淨之地嘅界結）。
我都覺得好奇怪，點解細條左咁多？（其實都已經好巨型），怪就怪自己冇睇清楚‥‥‥原來係社內總其有兩條，一條就位於拜殿(1.5噸)，一條就位於神樂殿。神樂殿果條係6噸‥‥‥我地竟然冇去到神樂殿，嗚哇‥‥‥‥
 寫出黎係想提提大家唔好好似我咁蠢(其實冇人會咁蠢囉)‥‥‥神樂殿其實係係左手邊，行幾十米就到‥‥‥可能係個天俾多次機會叫我再去睇下呢？
呢個行程其實主要係去出雲大社，因為想同朋友一齊求得好姻緣‥‥‥好多人都話呢度求姻緣係特別靈架，背後仲有一個有趣故事:
長話短說，傳說係大國主神 幫咗隻兔仔，隻兔仔幫番佢奪得美人歸， 勾玉象徵結緣，所以兔仔同勾玉都係呢度嘅主角。
求完之後一切都會好架喇！支簽又幾靚～記得呢度嘅參拜方法係「二拜、四拍手、一拜」～比一般神社多左一拍
YEAH! 出雲之旅我地終於到達其中一個重點地標！
 呢度周圍都有講述大國主神嘅傳說嘅雕像，有興趣可以睇下。可以話呢個大社真係係我見過咁多大社中個背景最有趣味。
 行返出去入口附近仲有個菖蒲園，小橋流水，好優美。
 去過咁多次日本嘅神社，真係唔係間間都咁有靈氣同正氣。有時我都係好睇神社嘅感覺而決定會唔會參拜，畢竟都係神，對於我呢Ｄ冇特別宗教信仰嘅人黎講，感覺係好重要，真係唔好咩神社都亂拜一通。
完成參拜之後，一出到門口第一眼就會見到係巴士站嘅Starbucks。
本身有儲開Starbucks嘅特別版杯， 出雲嘅Starbucks就出左以下呢種杯係限定版杯，係以瑪瑙為概念嘅手作杯，每一個嘅花紋都獨一無二，好靚呀！真係好想買晒三隻色返去‥‥‥最後都揀左白色。原本都想係呢一間和風Starbucks 坐陣，不過太多人喇‥‥‥
自己冇影相，可能參照網絡照片：
 其實Starbucks仲有勾玉造型嘅枱，不過當日又真係多人左少少，影唔到相。
走過參道， 會見到好多大大細細嘅商舖都係賣緊差唔多嘅嘢。
出雲嘅名產係瑪瑙，主要都係勾玉、兔仔同埋島根嘅吉祥物。野食方面，一定要試嘅係出雲嘅蕎麥麵。
呢間係Starbucks隔離入口嘅地方叫做ご縁横丁，入面有一間「まがたまや雲玉」，有大量勾玉賣，我行晒成條參道之後都係發現呢一間係最平最多款，仲有Ｄ好可愛可以用黎做擺設嘅勾玉，個款都係呢間先有。
今次買咗兔仔同勾玉嘅一個小擺設。
 日本嘅觀光點好多時候都有個問題‥‥‥就係果度出名Ｄ咩，就會成條街都係果一樣野‥‥‥
 所以其實都唔需要行晒成條街，因為間間都差唔多。
唯一呢間特別少少，就係有島根牛嘅Rice burger。如果早上出發可以黎呢度食早餐~
買完嘢就去食蕎麥麵，出雲嘅蕎麥麵係日本三大蕎麥麵之一，相當有特色。
佢係利用一個叫割子嘅容器盛載蕎麥麵， 平時嘅蕎麥麵係會將蕎麥麵放入鰹魚豉油嗰度浸兩浸再放入口，但係出雲蕎麥麵 係會將豉油同配料放入去。
我哋打算去平和そば度食，佢係出雲係非常有名氣。佢同參道係有距離架， 我哋行咗15分鐘先到但發現佢竟然關左！！！！！！！
雖然話就話收五點，但其實好多時呢Ｄ鋪賣完就關門㗎喇。 所以想去呢間老字號食嘅話就要一早到啦。
喺我哋非常非常之無助嘅時候，麵店嘅職員同我哋講已經關咗問我哋係咪想食， 之後佢就叫咗佢朋友車咗我哋去另一間都係食出雲蕎麥麵嘅舖頭，叫千鳥そば。真係好好彩呀‥‥‥
雖然係六月中去，但係果時天氣都已經開始熱。
佢哋一樣都係有割子蕎麥麵。
割子係以前日本江戶時代，風雅人士聚會時想將Ｄ蕎麥麵帶去戶外去吃，所以將蕎麥麵裝入「割子」呢個容器到（原來係野餐盒‥‥‥）。
賣相非常吸引 每一層都有不同嘅味道， 第一層係鵪鶉蛋加上蛋香非常之者同埋滑口。
第二層係用鰹魚片 味道較濃同鹹香， 仲加咗少少辣味 好特別。。
 第三層就係山藥， 即係生淮山， 生淮山就唔係個個鍾意食， 但係加咗醬油嘅生淮山， 就係可以接受嘅味道， 仲好有營養架
三層各有特色食完之後可以飲埋個湯，係由煮蕎麥麵嘅汁再加豉油，好香好有營養架～
食完野要去下一個景點，但拎住咁多野真係好唔方便？出雲會唔會有locker架？其實我開頭都以為只係JR同電鐵站先有，原來係正門前站同出雲大社連絡所站都可以搵到大量locker，我地喺參道shopping完就先放低嘢喺locker 再去下一個景點。
正門前站係Starbucks隔離，可以搵到呢個入口：
 行到最入落一層就會搵到locker架喇，不過呢個locker有限時，好似係去到5點左右。
遠少少嘅出雲大社連絡所站近住廁所就可以搵到呢一排好舊嘅locker。
至於下一個景點係邊度？黎到出雲呢個百神匯集嘅地方當然要去稻佐之濱。喺神無月各個神社都唔會有神， 因為佢哋匯集喺出雲大社，所以各路神仙都會先嚟到稻佐之濱上陸，亦係出雲迎神嘅地方。而稻佐之濱嘅夕陽景色亦都係好靚㗎，值得一到。黎返下一篇遊記先講啦～
參考網址：
島根ワイナリー
地址：島根縣出雲市大社町菱根 264-2
電話：0853-53-5577
開放時間：9:30am-5:00pm（試飲‧直售店於 6 月至 9 月期間開放至 6:00pm）
定休日：無
收費：免費

交通：於 JR 出雲市站或出雲大社乘搭巴士於「島根 Winery」站下車

バーベキューハウス シャトー弥山

　電話：0853-53-5577
　營業時間：10:30 ～ 18:30　；6月～9月至19:30
​
出雲大社
地址：鳥根縣出雲市大社町杵築東 195
電話：0853-53-3100
開放時間：出雲大社境內 6:00am-8:00pm／寶物殿 8:30am-4:30pm
定休日：全年無休
收費：出雲大社境內 自由參觀／寶物殿 成人 150 日圓、學生 100 日圓、小童 50 日圓
交通：畑電車大社線出雲大社前站徒走約 7 分鐘
​
そば庄たまき 出雲店
地址：島根県出雲市大社町杵築南840-1
電話：0853-31-4545
營業時間：9:00〜18:00；2月〜3月9:00〜17:00
交通：一畑電鉄出雲大社前駅歩行約7分鐘
​
千鳥そば
地址：島根県出雲市大社町杵築東655
電話：0853-53-0135
營業時間：11:00～16:30（定休：星期四）
交通：ＪＲ出雲市駅路線巴士25分（出雲大社巴士站）
一畑電車大社線 出雲大社前駅 歩行11分鐘
​
平和そば本店
地址：島根県出雲市大社町杵築西2034
電話：0853-53-3240
營業時間：11:00～17:00（定休：星期四）
交通：
出雲大社歩行15分鐘
一畑電車大社線 出雲大社前駅歩行15分鐘
出雲大社前駅步行15分鐘
Tabelog：
(Visited 233 times, 1 visits today)