2017年6月10日
一land左之後真係嚇死寶寶，點解廣島機場咁細架？話晒都算係呢區嘅主要機場，竟然同越南峴港機場差唔多大。因為比較細，佢地過關counter都唔多，要等一陣，而且行李上落相對冇一線機場咗快，55分land25分就上左巴士喇。想食野嘅話，都有餐廳仔，總之回程就唔洗咁早到。
出左去機場向右行就已經係巴士站，1號係去廣島巴士中心，2號係去廣島站新幹線口。我地要搭一畑巴士去松江，其實兩邊都可以，不過我地揀左新幹線果邊，可以順便換埋pass，車程45分鐘就到。
落車之後，首要任務就係放好行李，再去買定高速巴士車飛去松江。高速巴士飛算平但又通常都要幾千yen。不過今次竟然搵到一架超平巴士，一畑巴士。日本人搭去就要3900，但外國遊客就Discount，只需500yen，不可思議地平！
落車嘅地方
一落巴士向JR站行就會見到有coin locker，數量都幾多。
放好行李去廣島站北口果邊搵內搵スワロートラベル広島店，點知搵極都冇，原來要上一層兼仲係好個好隱閉嘅地方。
出示passport 佢就會幫你減埋到500yen，會俾張車飛同份問卷你，落車交返俾司機就得架喇。
搞晒所有野都差唔多5點，午餐都未食就要要食定晚餐，晚上要搭最夜果班巴士，3個鐘零15分鐘，要好好回血。我地揀左附近一間小壽司店，冇遊客，夠晒地道，comment仲唔錯。
行緊去嘅途中，係Lawson 見到之前有旅遊網站介紹嘅Godiva期間限定蛋糕，話好好食好推介，不過我就覺得朱古力味唔夠濃，蛋糕亦唔夠軟身，同普通朱古力蛋糕唔係好大分別。
呢間就係推介嘅小店，入到去都見到幾多當地人，遊客得我同朋友姐。佢地有D一家咁黎，有D飲酒傾計，氣氛好好。
最鐘意坐吧檯睇師傅握壽司，我地問佢地拎英文menu，不過侍應都唔係好識英文。反而店內年資最高嘅老師傅識講，西利西利。
我地叫左一個蜆肉味噌湯。同朋友一人一個set都係2000yen，再散叫左幾樣壽司。
個湯D蜆夠甜夠大隻，不錯。
壽司質素唔錯，但唯獨三文魚子不夠新鮮。
中拖羅我最愛，不會太油但入口又即溶。
呢個穴子認真唔錯，好好味。
呢度仲有喉黑添～真係估唔到。
喉黑唔係度度有，之前係金澤食過呢隻白身魚，係日本朋友介紹架，係高級白身魚，白身魚之中嘅拖羅，難怪比較少見，味道口感都一流，最難得係連皮食都唔覺得腥。因為太好食，未影相就吞左～
食飽飽就埋單，臨走師傅仲同我地講“謝謝”。
返返新幹線果邊行下街，裡面有名店街同ASSE，ASSE幾好行，好多女裝，男裝冇乜。
走左去書局睇，見到一大堆色情小說～好老實，我呢Ｄ偽偽文青真係好少行書局，只不過真係冇諗過會放係度。
仲有呢一隻係好多YOUTUBER都推介嘅早晨mask, 朝早敷60秒就可以靚住咁返工，隔離黃色果隻比較多人買，呢隻係新野。
地下超市睇下有咩陣間可以上車食，見到大量檸檬野……我知，檸檬係特產，我就麻麻地。見到附近仲有賣好多啫喱，啫喱大家食得多，酒做嘅食過未? 清酒白酒紅酒都有～包裝都幾得意，哈哈～但最後都係買左檸檬啫喱。
時間差唔多就要去拎返行李再去巴士站等車，拎鎖匙…..等等，乜唔係我朋友拎左咩? 兩個都冇拎喎‼日本達人不嬲冇我份，我最多都係日本柒人～大懵都唔係今日嘅事。我地冇拎鎖匙但一打開個locker ，行李仲係度！Thanks God!呢件個結果大概只會係日本發生。
拎埋行李行去Sheraton酒店前嘅27巴士站，個巴士站只係得一個牌……
對好名上車，以為三個鐘車程唔會有廁所，但原來有架，仲有得差電～一畑巴士又幾好喎～
朋友問我，架巴士咁少人(5隻手指數得晒)，點維皮，會唔會執架，會唔會唔再開呢條線同呢個優惠？ea….我都希望一畑繼續有呢個優惠，所有推介俾大家，大家由廣島去松江，出雲都係500蚊，記得搭一畑！(呢個係自願性廣告，免費)
好喇，我盡左力去介紹，希望下次仲有。講返個啫喱又幾得意，鹹鹹酸酸甜甜咁，仲有D檸檬皮添。部車行到咁上下，中間停左一個站，俾人買下野飲咁，個站個廁所仲好乾淨添～
雖然有廁所，但佢都有中途站俾你落車買下野飲，伸展下筋骨。
11點幾就到左松江站，我地間酒店叫Green Rich Hotel，行過去都係一分鐘左右，超近地鐵站。
呢間係幾平嘅，但感覺唔算太乾淨，因為好多水漬呀，浴室又霉又舊，通風亦幾差，應該係幾舊酒店翻新成商務酒店，非常唔推介，附近嘅Dormy Inn 應該會好好多。
聽日嘅行程係去出雲，會去ウィンリィ，出雲大社同埋燈塔。但一諗起要係呢間幾伏嘅酒店度stay２晚真係唔係好想‥‥‥
(Visited 61 times, 1 visits today)