話咁快呢個七日嘅關東自由行差唔多完喇，呢一日半夜我哋係要搭返夜行巴士直接去到羽田機場，所以最終有一整日時間畀我哋喺橫濱度玩，梗係要玩盡佢啦。
今日嘅行程我哋先會去到中華街同埋元町，再去山手西洋館同埋新橫濱嘅拉麵博物館。首先朝早我地住酒店嘅右邊直行就可以經過馬車道，馬車道附近兩傍嘅街道都係有好多西式嘅建築，可以話見證住當時華洋匯集嘅橫濱嘅繁盛景象。之所以馬車道個名嘅由來都係因為喺幕府末年開港時，連接關內同櫻木町嘅道路，馬車道大街附近除咗有好多有個性同嘅商舖之外仲有好多老字號嘅餐飲店，同我哋前一日去嘅港區未來21嗰對比好強烈。
有酒店步行10分鐘就到コーヒーの大学院。聽個名係咪覺得好搞笑呢？其實呢度嘅早餐喺呢一區係幾有名氣㗎。
入到去嘅時候可以見到好似昭和時代嘅舊式咖啡店，連擺設、水吧、燈，沖咖啡嘅器具等等全部都充滿咗舊日嘅西式情懷，每一樣嘢都會令你覺得好似返咗去昔日嘅咖啡店咁。
呢度嘅早餐有set，大概1000yen樓下，lunch就千幾yen左右，價錢都ok。
早餐主要都係食麵包、三文治、多士等等。我同朋友都點咗呢兩色嘅早餐，呢度話就話叫咖啡之大學院，但我哋就冇試咖啡，鍾意飲咖啡讀者可以講返畀我聽究竟係好唔好飲。
由早餐店行去中華街都好近大概十分鐘。長期住喺日本嘅香港朋友同我講話佢哋好掛住中菜嘅時候就會嚟橫濱中華街，飲茶食中菜，但係呢度啲中菜真係唔平㗎。又去東京working holiday嘅人都知道呢一區嘅租屋費用係特別低，而且附近因為有好多唐人嘅關係，喺呢邊如果遇上一個同樣中國籍、或者台灣直嘅華人老闆，成日都聽到一D超好待遇嘅故事。
呢一度有好多仿中式嘅建築，比起大陸更加有嗰種中國感覺，旨在嚟到呢度感受下個係外國嘅同鄉居住嘅地方嘅氣氛。
仲有好多唐裝添，喺街見到好多著旗袍嘅女仔唔知佢哋係日本人定係呢度餐館嘅侍應呢？
呢一間嘅生煎包好出名㗎好多日本人嚟到中華街都喺度大排長龍。
這間熊貓外型嘅鋪頭吸引咗好多人去影相呀。
有中式前有西式，元町商店街係一個超級西洋情懷嘅地方，同中華街嘅距離，只係隔咗一條河嘅距離，行5分鐘就到喇。
其實元町商店街同山手西洋館都好有歷史意義。因為以前江戶時代，美國人逼日本人係橫濱開港，劃分出稅關以南是外國人居住區，亦即係依家元町商店街至山手西洋館一帶。
見到呢個大大個牌就代表過左呢條河就係元町商店街。
好多時啲人行完中華街就會去元町，呢一區好多嘢買㗎又有賣時裝、high tea嘅地方同埋家品店等等，呢度我最欣賞嘅呢就係佢嘅家品店，啲嘢令到你好想搬買曬返去。
呢度有幾間舖位出名嘅舖頭大家都可以行下嘅，包括係Ｓtar jewelry專賣珠寶，近澤蕾絲專係賣喱士製品，mihama元町本店專係賣鞋嘅，至於我推介嘅家品店，你地就慢慢搵下啦因為實在太多而且間間都各有特色。
但呢度嘅時裝呢我就唔係好建議，因為真係好多時候的款式都係上咗年紀嘅，所以如果20幾歲嘅人去嘅話就未必搵到心水。
最搞笑係呢度好多大特價，例如日本女生人手一個嘅Samantha Thavasa，定時定候會有店員將大一車過季包包、銀包等拎出黎，之後就會吸引一大班女人黎搶‥‥‥
呢度Ｄ家品店好多復古款，好易搵到心水。
近澤蕾絲係喱士控必去嘅地方必去嘅地方，裏面啲嘢都幾靚㗎，除咗喱士嘅商品仲有銀包，袋等等。
喺呢一區都有好幾間間西洋館㗎，又有法國餐廳、hightea嘅餐廳，不過我哋就冇去。
所有位於山手區嘅西式官邸我哋都稱為山手西洋館，係橫濱開港之後嘅外國人居所，所以呢邊點解特別多西餐。現存可參觀嘅山手西洋館嘅的主要有七間，元町嘅有幾間英國館，但係我就對外交官之家最有興趣，因為佢係最靚架。
由元町嘅商店街最尾端行去大概需要十分鐘，其實唔算內大就要行車路中間亦都經過一啲西洋風格嘅畫廊。
見到一個庭園嘅入口，沿著路上去六月嘅時候可以見到好多繡球花。
同埋西式嘅官邸呢間Bluff 18同樣係七間西洋館之一，依家已經改造成展覽區同埋畫廊喇。
英國花園之後行幾級樓梯就到外交官之家。
呢間外交官之家真係相當有氣派，淨係個花園就已經靚成咁。
呢度仲有個玫瑰花園添。
雖然烈日當空但係我哋都影咗好多相。入場費大概千二蚊就可以睇返當時嘅生活。
我最鍾意呢一間房，呢間應該係當時嘅小偏廳。
重現好多當時嘅家具。
參觀完之後可以喺呢度嘅cafe食返件cake。
呢度嘅選擇唔多亦都唔係話相當精緻，我覺得最好係可以喺呢個咁洋式建築內食tea，食嘢環境氣氛都好緊要㗎。
其實事實係行上黎果時已經要好辛苦咁行斜路，熱到標晒汗，要飲返杯野抖抖。
呢件蛋糕都幾好味，如果有興趣就可以去出面嘅庭園度食。
行上嚟嗰陣時行到好甘，落去就好少少。最近嘅地鐵站叫做石川町，都要行十分鐘㗎，夏天去係非常痛苦。
橫濱呢邊嘅地區畀我哋想像中行得快，喺元町嗰邊我哋都冇乜點shopping。所以之後我哋為咗買Pablo就返去東京原宿。
反正都黎左又有時間，就去咗我想去好耐嘅明治神宮，計埋呢一次明治神宮日本三大神宮，包括伊勢神宮同埋平安神宮我都已經去過喇。
入口已經見到勁巨型嘅木造鳥居，唔講唔知原來呢度係日本最高嘅木造鳥居，原材料係來自台灣阿里山上嘅神木。
不過佢嗰陣時做緊復修，所以好多建築都俾野包住睇唔到。
我好鍾意明治神宮裏面嘅兩棵大樹，好圓好大棵，好似喺卡通入面嘅大樹，第一次覺得原來樹係可以咁可愛。
呢兩棵綁住繩嘅大樹叫夫婦楠，好多人都會黎祈求保祐夫妻圓滿與全家平安，求姻緣戀愛運等都好靈，係有神明住係上面嘅「神木」，唔可以亂掂架～
超巨型！！！
爆多繪馬‥‥‥
呢度Ｄ御守種類好多架，木頭鈴鐺御守最特別，佢係用以從掉下的木頭做成的。
神樂殿係結婚嘅地方，如果想要御朱印嘅話都係喺入面買嘅。
冇好仔細咁行，比我想像中冇咁好行，我比較鐘意伊勢神宮多D。
呢間係涉谷最新開嘅Pablo，裏面有得坐同埋食限定野食，仲有雪糕三文治等等嘅set，呢度嘅價錢都幾抵架。
超多其他款~做下午茶簡直一流~
我哋去到嘅時候佢係做緊呢個宇治抹茶嘅芝士撻同埋白桃芝士撻。我最鍾意就係呢個Mini版芝士撻，細個易入口，唔會好似成個咁漏，咁當然如果一班人食嘅話買大個係抵食好多，又開心D嘅。
去原宿我一定要去嘅地方就係最鍾意嘅luke’s lobster食龍蝦包。呢日都唔算多人，唔洗點排隊，原因？冇曬龍蝦包！！！！嗚呀，我千辛萬苦黎到竟然冇晒！！！得返蟹肉包。
我哋要搭夜行巴士嘅關係，我驚到時起咗身又會肚餓，所以決定都係買定兩個留番到時肚餓再食。
差唔多傍晚，我哋就返返去橫濱，但我哋今次去嘅地方係新橫濱，根據我去咁多次日本嗰啲新乜乜，好似新大阪、新橫濱、新青森站附近都係冇乜野睇。
呢度唯一一個比較值得去嘅地方就係新橫濱拉麵博物館。叫就叫做博物館，但其實佢唔係介紹拉麵為主。由新橫濱JR站步行5分鐘左右就可以到達新橫演拉麵博物館。
可以見到一個大大個識郁嘅拉麵裝飾，連出面啲燈都係拉麵碗嘅造型。
要比入場費嘅，只係310 yen姐。
唔知做乜入到去第一眼見到竟然係呢間九唔搭八嘅玩具店。
之後就出發去食拉麵啦由高處望落嚟呢就可以見到成個拉麵博物館都係充滿著昭和氣氛，而且呢周圍仲有好多御神籤，又有啲占卜咁樣，真係無處不在……好多燈籠，店員又會喺出邊度叫下咁樣，都幾有氣氛。
如果有追開呢個Blog個嘅讀者應該都知我唔係好鍾意食拉麵嘅，我亦都好少介紹拉麵館，但係呢間博物館就一定要嚟。因為呢度有10幾間全國有名嘅拉麵店，北至北海道南至九州沖繩等等都有，總之有選擇困難症嘅朋友呢真係要小心。
今次我哋就揀咗呢一間熊本嘅拉麵店，買食券都係喺出面部機度買，同一般拉麵店一樣，亦都可以額外再加配料。
呢一個充滿九州風味嘅豬骨濃湯拉麵真係不錯。湯底好濃郁，麵又軟硬適中(偏軟)，仲有好多Kumamon陪住我食添^0^
亦都可以選擇喺出面呢個common area嗰度食。
食完拉麵之後其實呢度仲有鋪頭可以買拉麵嘅。
呢一日嘅行程就完結我哋就要早啲返酒店，我哋當然係要將我哋呢一次行程所有相片整理一下，製造屬於我哋旅程嘅小禮物—自家製明信片，閨蜜旅行就係咁樣㗎啦。酒店附近有好多間便利店㗎嘛，其實好似只係得七仔有)，教學就可以睇呢一篇。
Hotel Edit Yokohama嘅位置係幾錯幾好嘅，超近凌晨機場巴士嘅巴士站，佢係位於櫻木町站，我哋搭三點幾嘅巴士基本上係同我地班機剛剛好。
呢個7號嘅巴士站真係要影一影畀大家睇，因為我哋咁樣咁耐車淨係得我哋兩個，可能真係少人去橫濱搭夜行巴士而且櫻木町站附近住嘅就更加少，不過唔使擔心，呢個真係巴士站黎嘅，真係去到羽田空港。
呢個旅程真係好開心可以去到我最心愛嘅輕井澤，亦都可以去到日光嘅頂級溫泉旅館，D野食係我食過咁多間質素最數一數二嘅，再返嚟我以前去過嘅橫濱，發掘更多新景點。鐘意度假Feel嘅朋友可以去輕井澤，如果鍾意睇日本文化浸下溫泉嘅可以去日光，近近哋行悶東京嘅可以去橫濱，總括嚟講呢一次行程係好好玩，而且食到好多好西，完。
實用資訊：
機場夜行巴士（往羽田機場）：http://hnd-bus.hk/route/nightmorningbus.html#minatomirai
コーヒーの大学院 (咖啡大學院)
網站：http://www.tabiulala.com/yokohama/spot034/index.html
地址：神奈川県横浜市中区相生町1-18
電話：+81 045-641-7750
營業時間：9:00〜20:30(L.O.) (星期六10:30〜20:30)
交通：港未來線「日本大通り」駅步行3分鐘、JR「関内」駅歩3分鐘行
網站：http://www.tabiulala.com/yokohama/spot034/index.html
地址：神奈川県横浜市中区相生町1-18
電話：+81 045-641-7750
營業時間：9:00〜20:30(L.O.) (星期六10:30〜20:30)
交通：港未來線「日本大通り」駅步行3分鐘、JR「関内」駅歩3分鐘行
-
港未來線的“元町、中華街站”步行0分鐘
-
JR“石川町站”徒步5分鐘
-
JR、市營地鐵“關內站”徒步7分鐘
-
港未來線 元町‧中華街站 元町口歩0分鐘
-
JR京濱東北線 石川町站元町口歩行2行分鐘
-
櫻木町站搭乘巴士15分鐘
外交官の家（外交官之家）
官網：http://www.hama-midorinokyokai.or.jp/yamate-seiyoukan/gaikoukan/
地址：神奈川縣横濱市中區山手町16
電話：+81 045-662-8819
營業時間：09:30~17:00
交通：JR根岸線「石川町」站歩行7分鍾
官網：http://www.hama-midorinokyokai.or.jp/yamate-seiyoukan/gaikoukan/
地址：神奈川縣横濱市中區山手町16
電話：+81 045-662-8819
營業時間：09:30~17:00
交通：JR根岸線「石川町」站歩行7分鍾
明治神宮
官網：http://www.meijijingu.or.jp/english/index.html
地址：東京都渋谷区代々木神園町１−１
電話：+81 03-3379-5511
營業時間：明治神宮隨日升而出日落而息因此每月開放時間不同，請至官網查詢。
交通：
官網：http://www.meijijingu.or.jp/english/index.html
地址：東京都渋谷区代々木神園町１−１
電話：+81 03-3379-5511
營業時間：明治神宮隨日升而出日落而息因此每月開放時間不同，請至官網查詢。
交通：
-
從JR「原宿站」步行1分鐘、從「代代木站」步行5分鐘
-
從東京Metro地鐵千代田線·副都心線「明治神宮前〈原宿〉站」步行1分鐘
-
從小田急線「參拜橋站」步行5分鐘
Pablo 表参道店（Pablo Omotesando）
網站：http://www.pablo3.com/
地址：東京都渋谷区神宮前1-14-21
電話：+81 03-3478-0826
營業時間：10:00~21:00
交通：JR原宿站步行2分鐘
網站：http://www.pablo3.com/
地址：東京都渋谷区神宮前1-14-21
電話：+81 03-3478-0826
營業時間：10:00~21:00
交通：JR原宿站步行2分鐘
Luke’s Lobster
網址：http://lukeslobster.jp
地址：東京都渋谷区神宮前6-7-1
電話：+81 3-5778-3747
營業時間：11:00am-8:00pm
交通：
網址：http://lukeslobster.jp
地址：東京都渋谷区神宮前6-7-1
電話：+81 3-5778-3747
營業時間：11:00am-8:00pm
交通：
-
JR原宿步行7分鐘
-
東京metro地鐵明治神宮駅徒步5分鐘可到達
新横浜ラーメン博物館 (新橫濱拉麵博物館)
網址：http://raumen.co.jp
地址：神奈川県横浜市港北区新横浜2-14-21
電話：+81 45-471-0503
營業時間：11:00-22:00（星期一至五）｜11:00-22:30（期六）｜10:30–22:00（星期日）
交通：
網址：http://raumen.co.jp
地址：神奈川県横浜市港北区新横浜2-14-21
電話：+81 45-471-0503
營業時間：11:00-22:00（星期一至五）｜11:00-22:30（期六）｜10:30–22:00（星期日）
交通：
-
新横浜駅（JR東海道新幹線・JR横浜線・横浜市営地下鉄）歩行5分鐘
-
横浜市営地下鉄8號出口歩行1分鐘
(Visited 119 times, 1 visits today)