2017年9月23日&24日

莎朗去旅行好少走回頭路，所以行李都儘量輕便。
回程路一定要揀可以直達機場嘅地方住，以一程車為最佳，減少交通上失誤嘅機會。宇多津係有機場巴士可以直接到高松機場。
喺google map 睇埋宇多津， 之前都有教過大家睇google map最緊要係搵橙色嘅area呀即係代表有嘢食有嘢買。 咁就俾我發現原來宇多津嗰度有間 Aeon Mall係開到晚上十點鐘 ，而且附近都幾多嘢食又有燒肉又有超市又海鮮，最緊要係呢佢有間好近海邊嘅cafe係可以睇到瀨戶大橋， 咁可以善用晚上同聽朝嘅時間喇。
到達宇多津站之後步行10分鐘就到達Utatsu Grand Hotel， 呢間酒店平到極點。
酒店Lobby 呃得下人㗎都。
Check in左送左張入浴券。呢個並唔係酒店嘅入浴券，而係附近嘅一個類似浸溫泉，類似係SPA嘅地方，叫「癒しの里 さらい」，都幾肯定唔會有遊客到。係有好多唔同泉水、岩盤浴、MASSAGE嘅地方，採用嘅係都谷温泉嘅泉水。呢張入浴券都值1300yen架。
官網睇就幾靚嘅，但真心遠。其實佢係坂出果邊，搭車就8分鐘到，行就冇咩可能架喇（要45分鐘)。仲要來回，所以我放棄左。
 (圖片自官網)

呢個格局真係有少少舊。
睇得出有少少舊嘅 而且地氈呀祥閣啲位就唔係好乾淨但係知床鋪、浴缸都打理得唔錯， 門口位都有幾大地方畀你放行李。4600yen一晚仲包早餐，真係唔可以要求太多。
Check in完都只係 五點零鐘，有時間周圍行下。呢間酒店都幾多CROSS PROMOTION。
附近都係住宅區， 就算見到都商場店鋪都係有停車場而且係一座座咁樣。
呢間超市真係好正，除咗有買新鮮嘅魚之外仲有附近縣出產嘅水果。D野係勁平！
有我心愛嘅從松茸。好有衝動買返香港‥‥‥印象中都係千幾yen左右。
好似香印提子，呢度都賣得好平(平過機場)。
估下咁大箱長野縣產嘅黃金桃幾多錢？只係2000yen， 喺香港呢個價錢只係可以買到兩個。
仲有好多特價魚生, 呢D一入黑就有Discount，好平。如果住酒店又唔想出街食慳慳哋，其實超市多都好多選擇，又有壽司又有刺身，亦都有熟食。
決定左聽日要再黎買野~~
 去醫肚先。
呢晚係呢個旅程最後一晚，決定要食好啲。呢間餐廳算係比較高級，主食牛肉，亦有shabushabu，個價錢都好reasonable，都有幾多捧場客，Tabelog啲comment都唔錯。
 入到去時佢地問我有冇訂位，冇喎！佢地唔識講英文，我亦都係日語有限公司，正常我好失望想走嘅時候，個部長走出黎用英文同我講話有位。拿拿拿！！部長做得好，依家我幫你介紹你間餐廳～～～
我當然好想食燒肉，但係呢啲set全部都係For二至三人，如果一個人食就要散叫。
最後我決定點霜降和牛嘅shabu shabu，呢個係上級和牛。 仲有啲配菜、冬菇豆腐等等，仲追加左個烏冬，咁樣都已經好飽喇。
 雖然唔係頂級，但油花非常均勻，真係唔錯。有機會一定要再黎試下D燒肉。
 和牛淥到粉紅色就OK架喇，如果唔係就會食唔到油香。
所有美食經我烹調，賣相都係黑暗料理。哈哈哈哈XD，但真心好食又飽飽，好似食左３千幾YEN姐。
 附近唔可以話好多野食，但係係有ge，呢間食西餐係AEON MALL附近，網上COMMENT都OK。
食飽飽就要Shopping，可能呢度已經係呢一區最主要嘅消閑娛樂購物場地，所以呢度都泊咗好多車。好大座Aeon Mall，附近亦都有戲院、餐廳，當然多人啦。
入面都有好大間超市裏面都有香印提子呢度嘅提子價錢都幾平嘅，同啱啱嗰家超市差唔多。最好嘅係呢度都有啲細細盒一盒嘅提子畀你買返去。
日本真係正，中秋節有勁多水果盤賣（下圖左邊），全部都係高級水果。香港？係0呀。香港超市可唔可以學下人地點做生意架‥‥‥
呢度仲有日本人氣嘅提子新星New Pione， 岡山縣出產嘅品質係最好嘅， 佢係由巨峰同香印生出嚟嘅， 一般甜度係15至20，佢係去到23㗎 ，甜到爆呀。 我嚟之前就喺度諗，呢度咁近岡山應該可以買到啲好靚嘅水果嘅，估唔到真係有。
旅程最後一日先俾我見到D咁嘅野，我又山窮水盡，即係叫我得個恨字姐。
呢度亦有啲服裝店、鞋店、手袋，仲有家品雜貨店，鋪頭唔多，但對我黎講，好易搵到心水野。
好似呢間鞋店真係平到極點， 咁平就唔好要求佢係make in japan㗎啦，個quality control又做得好好，著落去都好舒服而且個款式係唔錯架， 亦有波鞋、靴、 平底鞋等等。
 玩具都有得賣，我嘅童年。
鍾意寵物嘅朋友一定會好鍾意裡面唯一一間寵物店 ，有好多好靚嘅貓帶狗帶、零食等等寵物用品。
 呢度D貓帶狗帶款式都係新Ｄ，有包裹式（冇影），等你嘅寶貝冇咁辛苦。
 超普通款嘅服裝店，呢間唔掂。
二樓除咗有Daiso 外同呢間賣casual wear 時服裝店外， 仲有大量嘅美甲店、massage、facial等等。
 有Massage同美容店，好少係日本試當地服務，可惜聽日就要走，冇咩時間試。
最抵係呢度呢做植眼睫毛，香港平平地做個日式植眼睫毛都要成800至1000蚊， 呢度圍返港紙都係500蚊有找，平成一半。
行到我唔想走， 想去atm撳錢再買過，但發現原來呢度嘅7-11呢係唔會好似東京大阪嘅旅遊區咁可以禁到錢， 有時候唔知點解張卡會無啦啦碌唔到(明明有好多quota)， 所以覺得嚟四國呢最麻煩就係呢一點， 對旅客嘅支援發展得未係太成熟。
 上圖左手邊其實係Aeon Mall出面嘅餐廳，有拉麵、燒肉同埋壽司。

行到攰啦。咁係時候要返酒店瞓，第二朝早就出發去食個靚早餐。雖然酒店包左早餐，不過我想留出去搵下有啲咩好嘢食。
朝早沿住酒店右邊方向直行去海邊， 中途經過呢個四國健康村， 裏面有劇演、有風呂、有餐廳、有訓覺嘅地方，仲有太空艙， 呢度亦有一泊二食嘅遍路招待，只係3000yen姐，都算唔錯。
附近仍然有好多烏冬店。
行咗十分鐘就到呢個戀人嘅聖地宇多津臨海公園。
 依家就係係地圖上頂端嘅三角形地方。
沿路都見到好多西或嘅結婚場所，唔係好理解，其實一路由高松嗰邊間到呢度附近都見到有幾多結婚有關嘅店鋪，例如戒指、婚紗等等，唔知佢哋係細個城市好年輕化所以充滿結婚嘅氛圍定純粹我咁啱見到。
行咗十分鐘就到呢個戀人嘅聖地宇多津臨海公園， 呢度亦都係小朋友嘅遊樂場， 今日星期日好多家長都帶小朋友過嚟。
近海邊有一間cafe，附近可以見到瀨戶內海同瀨戶大橋。
可惜呢日嚟到嘅時候都幾多雲同埋能見度好低。
呢間cafe叫做Burger Cafe Pon Pon， 話佢係絕景cafe都唔過份， 食住burger同薯條嘆住咖啡望住瀨戶內海嘅景色，如果係夕陽嘅話更加靚，野食都OK。
 出面個景真係180度海景，如果天氣好，一定仲靚。
 好嘆呀！！！呢日唔趕景點，好悠閒地食個靚早餐，係香港人少有嘅幸福。
同餐廳見到幾堆日本人，幾個friend咁食住野傾下偈，戀人就見唔到。
都有肉汁又多料。
出面都有出售呢度嘅特產、蔬果等，格格不入怪怪地。
陣陣海風真係爽。
瀨戶大橋係世界最長嘅鐵公路兩用橋樑，亦都係橫跨日本本州至四國間之瀨戶內海上總共十座橋嘅總稱，世界級工程，好值得一睇。
可惜呢日真係睇得唔清楚‥‥‥唔通連個天都想我黎多次？
 再唔捨得都要走喇。
臨去機場之前梗係要去返琴日嘅超市買生果走啦。係我影得衰，呢度D提子係好靚嘅，只係手機唔知做咩影出黎黃黃地。
後尾先知，機場都有好大盒嘅香印賣，只不過我覺得佢比起超市同Aeon見到嘅都冇咁新鮮同埋平，所以要買就要係度買。
 呢盒我都入左手。
Hong Kong Express下晝班機大概係三點鐘， 要去宇多津南口嗰邊搭 空港limousine巴士， 車程大概係一個鐘左右。所以，12點已經要到宇多津南口。
去機場嘅巴士站唔係喺正南口出面，仲要行一段路。
南口門口有指示，向右邊行兩分鐘就到。
 機場巴士巴士站。
機場巴士都唔係好準時到。
Hong Kong Express改咗時間呀， 去到機場先知原來要delay一個鐘。
有咁多時間，嘆個冷烏冬先， 我始終覺得凍食嘅烏冬係最好食。
食埋我琴晚係Aeon 買嘅一盒香印提子。
 二樓有間coffee shop係有３D拉花咖啡。
呢度都有幾間特產店，啲手信真係唔係好特別， 所以我呢個都冇影相畀大家睇 。 喺呢度主要都係買烏冬同埋 相關嘅產品 ，反而見到呢隻非常可愛嘅曲奇餅， 貓奴一定要買 ， 可以勾住喺咖啡杯度㗎。
入咗去之後就可以見到有間Duty Free， 同樣係細細間。只係有啲好大路嘅嘢買，如果要shopping嘅真係唔好諗住四國可以買靚衫。
今次四國旅程正式完結，搭呢一班機雖然delay左，但我哋可以睇到一個好靚嘅空中嘅夕陽景色，算係因禍得福啦。
 拜拜四國。
去完唔夠半年又再去高松！3日兩夜小島暴走之旅！想知就要睇埋我下次個旅程嘅遊記喇。
另外，睇晒我呢篇遊記嘅額外俾多個好正嘅網址你: http://www.jr-eki.com/。
四國玩法真係好多，自駕又得、鐵道遊又得。呢個網除左有推介四國嘅觀光列車，亦都有唔同嘅日歸Plan。當中最推薦嘅一定係觀光列車「四国まんなか千年ものがたり」，可以直達大步危。呢個由JR四國營運嘅網站亦都同當地酒店合作，推出Discount，選用網上嘅plan都可以有得平。
行程路線及交通資料參考：
如無法瀏覽以下地圖請按此。
​

 

(Visited 385 times, 1 visits today)