Stay咗輕井澤3日終於要走喇，之前嗰兩日都係勁shopping，行到有啲攰，最後一日都瞓晏啲先起身。原本嘅行程就食完早餐就行下輕井澤站附近嘅叫矢崎公園就出發㗎啦，我哋決定呢就先衝去outlet，買返之前有啲想買但係唔捨得買嘅野。
我哋發現某啲牌子有更加多個discount，我哋瘋狂掃咗幾個袋，咁當然啦買自己野嘅時候都要買番啲嘢畀男朋友至得嘅，呔呀袖口鈕皮帶呢啲唔洗太準確尺寸嘢都可以瘋狂咁買。總之最後一日買得比之前仲多，呢個outlet真係好邪惡呀！！！
Shopping完啦先至食Brunch，車站附近都幾多餐廳㗎，我哋揀咗間日式餐廳食咗個好普通嘅飯就算啦，呢間就唔推介呢大家，我發現喺輕井澤嘅日式野食高質素都麻麻，唔知係我唔好彩定係真係好差啦。
輕井澤站出面嘅矢崎公園環境都幾靚㗎，最適合我哋戰鬥完又有時間嘅，喺度Hea一陣，其實佢仲有cafe嘅，有時間不妨坐低慢慢飲杯咖啡先走。
最後我哋返返JR站pack返好D戰利品入行李就搭車去伊香保。伊香保雖然同輕井澤幾近呀但係就要轉兩次車，先搭一個站去高崎再轉搭6個站去涉川之後出站再轉乘3號巴士，大概20分鐘一班。我哋一點鐘出發大概就兩點半到，我話好近但係都花個幾鐘係因為站與站之間嘅班次隔得比較疏，喺高崎就已經要等成三十分鐘先有另一個班次去涉川，大家最好check清楚時間先。
我哋今次揀嘅溫泉旅館叫做お宿玉樹，未出發之前我哋都比較過其他幾間旅館，呢間唔算平，我哋訂嘅信樂燒半露天付洋室平均每個人都要二萬四千幾yen，佢喺Tripadvisor涉川市之中排第四，係我哋由福一、千明仁泉亭、如心の里ひびキ野中千挑萬選出黎
伊香保出名有兩種溫泉一種叫做黃金之湯、一種叫白銀之湯，各有唔同嘅功效。並唔係間間旅館都有齊呢兩隻溫泉浸，comment比較好嘅旅館之中只係得松本樓同埋お宿玉樹有齊。お宿玉樹佢好近巴士站，伊香保溫泉區係依山而建好多超斜斜路，所以近巴士站都幾緊要（雖然之後一日發現呢個Concern有少少無謂）。嘢食方面佢都唔錯，採用群馬縣嘅高級食材，房間種類又多，和式洋式都有。
我哋落咗車之後要行一段斜路先到，好彩係落斜，而且佢比起其他旅館近巴士站，最近嘅巴士站唔使一分鐘就到啦。
Check in先。其實睇相都知呢個溫泉區樓房密度幾高而且好多斜路，旅館嘅外觀設計受限制，幾普通，但係入到去就幾有驚喜，好似呢度地下大堂有個小庭園都幾靚，而且因為依山而建嘅關係房同餐廳嘅景觀都係非常開揚。
原本我哋睇中嘅房間就係杠、檔同桂，有一個小小嘅露天溫泉，同埋一個小庭園床又係洋式，真係好靚好靚。
不過呢一間旅館真係幾搶手，我哋已經好早book㗎喇但係都冇呢三隻房，最後揀咗信樂燒半露天付洋室，個人都幾滿意嗰間隔同設計，相對我哋之前鍾意嗰兩隻睇相感覺上冇咁光猛。淨係講緊旅館都仲可以打一大段嘢就知我幾挑剔～所以推介得都唔會死錯人。哈哈哈哈！
呢間就係我哋嘅房間，我哋先喺房度浸咗先，休息下之後早啲食晚餐晚上再去大浴場浸。
房內有蘭花～不過個景就一般般。
就咁望個天花好似住緊獨立屋咁。
房內都有Ｄ菓子俾你送茶。
真係覺得今次冇揀錯，其實群緊縣仲有草津溫泉、水上溫泉鄉等等，點解揀伊香保？係貪佢景點夠多，夠時間可以去埋大家都成日聽嘅榛名山，附近又有石段街同牧場等等，都幾多景點。
同一般嘅溫泉旅館一樣，呢度都係有一間土產店，啲嘢都幾精緻多款。
呢一間旅館嘅嘢食係我去過嘅旅館中嘅頭三甲，唔係講緊佢嘅食材有幾高級，而係各種呈現出嚟嘅味道、外觀同埋食材本身嘅新鮮程度都屬於高水準之作。
前菜有酒，有魚子豆腐羹。
仲有一D漬物同蝦料理。圖中有一隻叫做茗荷壽司都係第一次食。
呢一種類型嘅燒魚，岩魚呀香魚呀我一向都好鍾意食㗎。
呢個係湯黎，係蔬菜類，冇影到裡面。
蒸蛋唔算特別但係好食。
仲有呢一個刺身有中拖羅大拖羅非常非常好食。
食到呢到，朋友已經飽左，叫我食埋佢果份‥‥‥
大拖wor‥‥‥咁嘥？？
中間嚟咗呢一個酸酸地嘅蔬菜，擺盤好靚，又可以起到中和番冇咁滯嘅作用。呢一樣非常欣賞，好多旅館就係狂塞飽你等你食完可以做豬‥‥‥唔係好多旅館可以做到咁貼心。
另外佢地標榜嘅上州牛，加埋蛋漿入口好滑好味。
仲有白飯任裝～
最後仲有呢一個柚子味雪葩，唯一一間住過嘅旅館甜品有雪葩‥‥‥
唔好睇佢好似份量好少咁，朋友食到一半已經飽到食唔落，我相信男士都會覺得好足夠。
晚上我哋都去大浴場浸咗，呢間旅館唔算多人，我哋去到都只係得兩個人就浸緊。
圖片來自官網：
再介紹返黃金白同銀之湯嘅分別。黃金之湯係呢度古老嘅泉水，係硫酸鹽泉，對舒緩神經痛、關節痛、五十肩等等都有好好嘅功效。白銀之湯係近年之湧現嘅泉水，係矽酸川，無顏色，對回復疲勞同皮膚都好好架。
兩種溫泉分為男、女大浴場，早晚對調。想浸曬兩種嘅朋友，可以喺八點鐘前後各浸一次。
浸完之後呢就去咗玩按摩椅，我最鍾意有按摩椅嘅旅館，浸完溫泉再按摩真係好好瞓架，大加分。
我哋係呢度過左好輕鬆好relax嘅一晚，好滿意，絕對會再黎。
下一日嘅行程會去行伊香保石段街同埋綠色牧場，下晝就會返返去橫濱。
伊香保温泉巴士周遊券：http://kan-etsu.net/publics/index/31/#page31
矢崎公園（矢ケ崎公園）
地址：長野県北佐久郡軽井沢町長倉
電話：+81 0267-45-8111
交通：輕井澤站步行5分鐘
伊香保温泉 お宿 玉樹
地址：群馬県渋川市伊香保町伊香保87-2
電話：+81 0279-72-2232
交通：出左JR站搭三號巴士總站就可以到伊香保温泉，不過記得唔好係「伊香保溫泉站」落車，要去「伊香保温泉バスターミナル」（BUS TERMINAL），亦都最近お宿玉樹，最快20分鐘就到。Bus terminal站落左車係落斜嘅斜路，如果係伊香保溫泉站就係上斜而且要行一段路，亦都較近石段街。如果住如心の里 ひびき野同松本樓，就要係伊香保溫泉站落車喇。
(Visited 454 times, 1 visits today)