喺呢間真工業風嘅民宿渡過咗一晚。第二朝起身， 其實佢都唔係咁恐怖㗎啫， 起碼我望出去都可以望到有海景呀而且呢個海景只係400幾蚊。
日頭睇係堅幾有STYLE架wor。
以為住係呢度冇啖好食？ 咁就大錯特錯啦， 樓下其實係有兩間餐廳一早就開。
一間係食burger嘅，網上comment都唔錯。
另外一間就係嘆咖啡。見到附近有居呢都過黎呢度買咖啡，可能係好野黎。
近排染咗咖啡癮嘅我就試下呢間咁有格調嘅coffee shop。
咖啡有唔同產地，咖啡師會向你介紹。不過我唔識架，求其揀左。
一杯簡單嘅咖啡再加一片麵包、少量沙律，自選兩款餡料。
其實幸福真係好簡單，可以悠閒地食一個早餐，唔洗趕頭趕命，望住出面個海。
雖然呢日係陰天，但呢個早餐令我心情提升咗唔少。
行十步都冇就係玉野魚市場。呢個市場真係超細架！入面有幾個小攤販賣當日新鮮食材。
唔好睇佢好似細細地咁，但其實都有少少特色野架。凡星期六、日，佢地都會舉行「勝手にご飯会」，只要買當日嘅魚，就可以用$100加個湯同飯俾你食。
好多人都會選擇買以下呢Ｄ刺身，之後配個飯即食，好爽架！有時仲有會茶漬飯、七輪燒等等。
真係好鐘意呢Ｄ咁Local嘅體驗，可惜今次就唔到星期六、日行程。只係去到呢個逢星期五、六、日舉行嘅朝市，唯有下次有機會再黎。
呢度樣樣野都幾平。如果有興趣都可以買啲刺身返上去民宿度食。
就係呢間喇，有飯有湯可以買。
拎住行李行去JR宇野站， 沿途有經過我上一篇講到附近嘅另一間民宿同埋見到D西式嘅建築。
呢間民宿都幾受歡迎。
去到宇野站真係幾驚喜，好少見到咁偏嘅地方車站會咁靚咁有特色。可能因為好多人都會由呢邊出發去藝術祭，所以連個車站都充滿藝術感。
車站附近有車直接到岡山站，唔知要幾耐呢？
由宇野去倉敷，搭JR嘅話就要經岡山嘅但係都要成個幾鐘。而且我今次用唔著pass ，會比較貴，所以我就選擇喺由宇野出發去茶屋町，再轉搭巴士去倉敷。
呢一個方法係普通嘅乘換案內、路線情報網站係搵唔到嘅。
其實好多時旅行當地有更方便嘅交通工具方便當地人， 冇理由當地人都要去倉敷都要特登咁樣兜嚟兜去咁唔make sense。建議大家plan行程嘅時候可以睇下當地巴士， 唔好下下依賴JR。
到左茶屋町，一出站就見到有巴士站。呢個係下電巴士嘅茶屋町．倉敷成人病センター線。
雖然巴士都幾多個站，不過由於都算係頭幾個站上車，冇咩人，好多位坐，拎行李都冇問題。要留意返班次唔算好密。一個鐘一兩班左右，最好較準時間。
巴士車程20分鐘左右。加埋JR成程都係47分鐘就到倉敷站南口。
比起JR唔同班次一般都要成個幾鐘起真係差太多。
去到倉敷站觀光案內所有大量locker， 當然JR站亦都有啦。咁睇你鍾意用邊個啦，我就鍾意攞下啲旅遊情報睇， 呢個冇wi-fi嘅旅程梗係要攞埋地圖啦。
JR站不嬲大Locker都唔算多。但呢邊都幾多，除左呢一排，另一邊仲有好多。但要留意返時間，係關門前返黎拎。
落咗車冇耐就已經見到有毛毛雨，都幾麻煩，拿拿林買咗把遮先，睇下先去outlet再美觀到時會唔會停雨啦。
要買遮，去呢間$100店。
唔係白桃季節真係咩都冇。
改變行程去左outlet先。呢個就係JR站，行去北口就係outlet。
倉敷站話大唔大，佢係由幾個shopping mall組成連接著，冇咩野值得買。北口就係三井outlet park 倉敷，南口就係美觀地區方向。行過去outlet嘅途中呢會見到一個好大嘅鐘樓，佢係指定時間就會有音樂表演。
中間會經過呢個商場Ario，入面有food court架～
係food court度食咗一間連鎖店叫nana’s green tea，幾推介畀大家。呢間連鎖店有細細碗嘅飯連湯、茶漬飯，亦都有綠茶甜品等等， 以lunch計唔使一千yen， 啱曬啲準備血拼/shopping完又有罪咎感嘅人，哈哈哈哈哈哈哈哈。
性價比係高嘅。
食飽飽向outlet出發！
連條天橋都靚過人。
呢個就係入口喇。呢棵樹真係好靚好有標誌性！
三井outlet park倉敷比起我去過嘅outlet唔算大，但其實已經係中國地區最大的。去outlet嘅重點唔係大細，係好唔好買。
平野，但冇入手價值。
同上。
作戰過程兩個零鐘左右我已經行曬所有鋪頭，咁當然有啲Skip 左。我覺得呢度嘅舖頭數量一嚟唔夠多、款式唔夠靚、價錢都唔夠平。女人野方面，最平嘅牌子係Michael Kors，半價再有30%off。
男裝方面真係不堪入目呀， 之前仙台嘅outlet嘅男裝嘅真係又平又靚， 而輕井澤嘅Outlet女裝嘅都係一流嘅， 雖然話呢個係中國地區最大嘅outlet啦，但我覺得佢有D流囉。 好彩行呢個Outlet 只係順便經過行下，唔係主力shopping，如果唔係話都會幾失望。
咁亦都有朋友同我講話佢喺度買嘢買到爆晒喼啦。其實我都要帶返頭盔，fashion呢啲野，真係見仁見智。
今次作戰嘅收穫係1個袋、1件男裝衫、1條裙同埋2件女裝上衣。
呢個outlet最大優點係超近倉敷站，shopping完真係超方便，可以將啲戰利品存放返喺觀光中心之後再繼續去對面嘅美觀地區。
行經廣場嘅時候咁啱見到之前講嘅鐘樓有音樂表演，原來佢係會將佢打開中間升起，D公仔就會轉嚟轉去，都幾得意。
經過倉敷JR站去南面嘅出口，直行大概十五分鐘左右就到達美觀地區。右手邊天橋落去轉右，沿途只係一條大直路，亦都有好多指示牌需唔需要擔心會蕩失路。
啱啱去outlet嗰陣時已經落緊毛毛雨架喇。後尾行去美觀地區時仲越落越大‥‥‥
我就冇由正面入口行去美觀地區，由側邊嘅小巷進入。其實美觀地區係一個好大嘅area，被稱之為日本第一水街，其實沿途都會有大量嘅舖頭，唔止係大家見到好熟識嗰個運河左右先有舖頭嘅。
沿途已經見到好多幾有特色嘅鋪頭。
包括呢一間做藍染嘅，佢嘅scarf真係幾靚架，不過堅貴。岡山最出名嘅野就係帆布、牛仔（藍染），所以唔難發現好多呢Ｄ商店。
林源十郎商店裏面嘅都有好多得意嘅雜貨， 裏面係唔可以影相。
都幾多嘢睇㗎，樓上樓下都有cafe。
最頂樓有間cafe係戶外嘅，如果唔係今日落雨嘅話呢我都好想去食個tea。
莎朗去旅行，通常都會有一系列嘅商店名單已經係要必行嘅。呢間「苑工房」係我名單以外嘅推介，俾同我一樣鍾意手作飾物嘅朋友。
店主用唔同季節嘅花朵、樹葉、樹枝、果子等等去製作一系列飾物，例如頸鏈、耳環、扣針、等等， 全部都係真嘅植物黎嘅。
我記得之前見過有人製作呢類型嘅飾物，一樣係用唔同嘅植物製造成唔同嘅主題，有啲係比較啱冬天佩戴嘅襟針，有啲係夏日感覺嘅花朵頸鍊耳環，全部都好靚。
堅大雨，但仍然都幾多遊人。
大原美術館係日本第一座展示西洋美術同近代美術嘅美術館。莫內、畢加索、葛雷柯嘅畫作都有，係走希臘風嘅建築。之所以有世界級嘅畫作展覽，好大原因係因為當時倉敷市係二次世界大戰末時，冇被美軍轟炸。
館內係唔可以拍攝架～
行完大原美術館呢邊，可以見到呢間叫CAFE EL GRECO嘅 cafe。佢位於大原美術館旁邊，好多人參觀完美術館之後都會嚟飲杯咖啡。 如果係夏天嘅時候佢就會佈滿「蔦」呢一種植物，係非常之靚嘅，不過依家嚟嘅時候都差唔多搭入秋天，呢邊已經幾涼下天氣，我諗大概18到20度左右， 就睇唔到相一樣嘅靚靚效果。
睇得出係一間歷史悠久嘅咖啡廳而且呢佢都亦都經常被旅遊雜誌推介。 因為今朝飲左咖啡喇，所以飲果汁就算喇， 另外點左長崎蛋糕。
古怪嘅組合。
呢度嘅蛋糕都算唔錯嘅， 食完蛋糕之後 就周圍行下啦。
呢間專賣牛仔布野嘅商店位於星野仙一紀念館附近，其實旁邊嘅「倉敷デニムストリート」(倉敷丹寧街），係有丹寧雪糕食(藍色嘅雪糕)同包賣（天然顏色），不過我哋去到嘅時候已經賣曬喇。
P.S. ＂丹寧＂＝牛仔。
(下圖轉自網絡)
行行下就會見到一好多商店都買一隻日式嘅傳統甜點叫做むらすゞめ，一間叫做橘香堂既可以體驗製作呢個傳統嘅甜點。佢係用燒好嘅外皮包住凍嘅紅豆餡， 原諒我對紅豆有偏見，唔可以同大家解釋呢樣嘢好唔好食。
元祖 廣榮堂係到除左有賣むらすゞめ、亦有賣吉備團子（又名桃太郎團子）。係當地出及的老店黎，土產款式都幾多。岡山係桃太郎故事嘅發源地，所以亦都係一般遊客必買土產之一，可以即場係裡面嘅試咗先買。
其實呢邊可以買嘅野都幾多嘅，又唔一定要買呢Ｄ返去。就算最後想買返，去JR站都一定有得買返。
之後就行去Ivy Square ，其實佢係一間 建於1889年嘅酒店， 非常歷史悠久。我都有見到網上有好多人遊倉敷會選擇喺嗰度stay， 而裏面亦有間餐廳有提供西式同埋日本嘅菜式，大概價錢係 3000 yen左右，以酒店黎計都幾抵食嘅。
值得一提嘅就係原來倉敷有好多法式嘅餐廳(唔係好正宗嗰種)， 網上comment比較好嘅餐廳叫做N’s 食彩 Swan， 大概二2000yen就可以食到法式料理，其實比起剛剛嗰間酒店價錢更加抵， 原本打算呢一兩間都可以試下，但我得一個胃，食唔到咁多嘢。 唯有下次再嚟，相信有好多機會嘅。
Ivy square 裏面有一個好大型嘅展覽區展示岡山嘅特產同埋工藝等。
Ｄ野都幾特別。以一個著名景點黎計，美觀所賣嘅野算係好多元化。
呢個行程最滿意嘅手信係喺「GOHOBI」度買嘅。
呢Ｄ係由岡山或者其他著名出產嘅水果嘅地區，出產嘅水果製作而成嘅膠原蛋白果凍。被日本女性雜誌選為最想收到嘅手信之一。
佢嘅基本食法係食之前放入冰格度，雪到好硬， 佢拎出嚟嘅時候就會有少少回軟返，到時就唧出嚟一條咁食，室溫下就回復液體狀。
亦可以加入氣泡水、清酒、燒酒等等，就會變成水果味嘅飲品，呢個食法真係夠晒創意。
仲得試味㗎，好多唔同嘅口味,例如岡山白桃、亞歷山大麝香提子、 檸檬味、菠蘿味、仲有一啲溝咗玫瑰味。
一筒呢一啲大概七百幾Yen左右有12支， 唔算平。 不過當試完之後就覺得佢真係幾好味喎。 我就買咗好多畀同事， 佢哋試咗之後都好開心，comment好好。
莎朗從來都唔會Hea 買手信嘅，好多大都會買果D一大包嘅炸野。其實香港周圍都有得買，對我黎講就失去左買手信嘅意義喇， 一係就唔好買，一買就買好啲。
倉敷最靚嘅景色係喺倉敷川呢邊， 右邊嗰間 觀光案內中心 嗰邊影過去，就係倉敷 最標誌性 嘅景色。
另外倉敷必食嘅係有鄰庵嘅生蛋飯同埋嘅微笑布甸， 返到去嘅時候已經閂門喇，真係好飲恨，雖然今次我食唔到，講唔到comment畀大家聽啦，但係呢一間喺公認好食同得意嘅， 朋友comment一致讚好。
(以下圖片自網絡)
其實我真係唔應該行outlet先，可惜嗰陣時落雨。如果冇雨應該行咗呢邊食曬呢邊啲好西先。
入口嘅貓屋敷， 貓奴一定要去，入面有大量可愛嘅貓商品。
行完倉敷都已經差唔多六點鐘，開始入黑喇。 我今晚嘅酒店就係位於琴平，即係金刀比羅嗰邊。係一間高級溫泉旅館。因為第二日我係需要去一站之隔嘅阿波池田站嗰度參加祖谷嘅local tour。
原本諗住四點半走㗎但係都冇可能，行行下行到五點幾。 返到車站，拎埋行李真係有D急。如果真係想Hea浸溫泉的話，唔係好似我咁為左去祖谷，建議留多D時間係倉敷，又或者早少少由宇野出發。
時間都幾問水，好彩行經JR站時已經買定車飛 ，由倉敷出發去琴平 大約需要1.5小時左右(連等車時間)。 17：41分由 JR倉敷搭去岡山，之後再轉特急南風號去琴平，19：19就到。
我真係太了解自己喇。原本過左Shuttle bus時間係要book接送，原定plan A係6點鐘到，我自己book定7點2，因為真心覺得自己行會行耐左！冇計啦，美觀真係太多野睇喇。
到去琴平站，已經見到有架車同司機等緊我一個，咁好service，真係貴一貴都值！
下一篇遊記會講我入住「琴平花壇」嘅感受，同埋佢有咩咁優點缺點。
參考資料：
景點、路線大全，按右上方放大就可以看到所有景點了！
手機瀏覽景點及交通地圖請按此
（用呢個比之前要打一大堆資料方便得多～）
(Visited 319 times, 1 visits today)