2017年9月23日。
第二朝check out時間係十點鐘，參加左10點45分由阿波池田站出發去祖谷嘅local tour， 所以早少少八點零鐘食完個早餐就要出發。

呢度嘅早餐同一般嘅溫泉旅館嘅早餐都係差唔多，所以冇影相。都係中西合璧咁樣， 有沙律有果汁咁，又有燒魚同日式前菜，燒魚係一夜乾嚟， 保留在魚肉嘅彈性， 同時亦都勾起咗以前喺日本生活時候嘅回憶， 果時唔捨得買鮮魚食，因為覺得太貴。有次喺超市見到一夜乾（日本鹹魚）又可以保存得耐而且大量買就有得平，所以我哋就買咗好多返去，煲湯又得，再煎嚟食都得， 兩三條已經夠食足一個星期，係回憶嘅一部分。

食完飯之後就由溫泉旅館嘅司機揸shuttle bus 送我去JR琴平站。 不得不讚嘅就係雖然琴平花壇 嘅位置係遠少少但係來回都有shuttle bus接送非常方便，又唔使拎住個行李行嚟行去。

喺搭車嘅途中呢經過鞘橋， 呢一條橋係咪好有傳統風味呢？估佢唔到原來就係日本三大奇橋之一（另外兩條就係錦帶橋同埋猿橋）。

琴平呢度係值得再次遊覽嘅地方下次嚟嘅話我一定會住返琴平花壇同埋行下金刀比羅宮。
喺JR門口嘅時候竟然見到呢個參拜登山巴士嘅牌，即係如果下次再嚟嘅時候我可以搭呢架巴士站唔需要行咁長嘅樓梯，Yeah!

之前有岡山出發到琴平嘅時候搭唔到特急南風嘅麵包超人列車， 見到月台上面有擺放著呢種車嘅印鑑同埋佢嘅DM都覺得好得意。
特急南風號到達琴平站，估唔到佢竟然係我之前想搭嘅麵包超人列車。 雖然我就唔係麵包超人嘅粉絲，但係可以搭到呢咁可愛嘅卡通列車個人都會特別開心，呢一點我覺得日本人係非常識做觀光生意。
我搪嘅係9點55分嘅 特急南風號，只係需要搭一個站就可以去到阿波池田站。
好快就到達阿波池田站啦，阿波池田站係一個好細嘅站，一出門口就可以見到我哋local tour嘅集合點。
 好多人等緊嘅就係登記位。記得要提早至少15分鐘到。
如果有大行李嘅朋友通常有兩個處理方案，即日來回嘅話，可以將行李放喺JR站。因為雖然附近有觀光中心，但嗰邊係唔可以放行李嘅。呢個站嘅Locker一眼睇晒，得幾格。所以要留意返要早啲到霸Locker ，同埋太大型行李我相信應該放唔到係呢個站架喇。
如果想喺local tour完咗之後入住當地嘅酒店，可以選擇將行李運直接運送到入住嘅旅館。詳情可以向集合點嘅導遊查詢，佢哋會教你㗎啦。要記住旅遊巴士係唔可以放行李，只係可以放多啲隨身嘅物品即係背囊、手提包等等。
放完行李之後就去返集合點嗰度登記返你個名同埋預先畀咗錢先， 今次嘅費用係7510yen。已經包左中午嘅lunch。要留意返，有部分嘅景點係要自費入場嘅。
對面就係商店街。
之後會派一個貼紙等痴係身上，跟住number上車，千祈千祈唔好亂坐。之前就係有香港人亂坐7左，搞到D日本人炸型。
10點45分正式出發，今次我哋呢一團人， 大概有一半係香港人一半係日本人。參加呢啲local tour好處就係就係將好散嘅景點Group 埋同一日就去晒。
加上喺呢啲山路道自駕亦都唔係一件好容易嘅事。我呢D手腳唔協調成世都唔應該揸車嘅人最啱Local Tour。
咁當然如果你係需要花時間影靚相嘅攝影愛好者嘅話，呢Ｄ Local Tour就可能未必適合。
返嚟香港之後唔少朋友都有問我點解可以一日之內去晒大部份祖谷個景點呢？就係呢一個定期觀光團喇。 提提大家呢個定期觀光團只係限3月至11月期間嘅星期六、星期日同埋公眾假期先會有嘅， 部分月份例如5月、8月、10月同11月旅遊嘅旺季就係每日都會有嘅。
詳情可以參考四國交通官網。上網予約定又得(按此)，又唔洗俾錢住。
要講下唯一失望嘅地方係，架車根本唔係DM中咁可愛。
上咗車之後頭 40分鐘都係行山路，出發去第一個嘅景點小便小僧。 之前我以為係全程日文，原來導遊都會講少量英文介紹景點，又唔至於聽唔明。
要搭成40分鐘車都係幾痛苦，尤其是我一個人去，隔離係日本大叔，唯有訓覺。
終於到達第一個景點 ，「小便小僧」—要落左車後由停車場行一段路仔去睇嘅。
就咁睇相可能會覺得小便小僧嗰度會唔會好危險咁，其實佢係位於一條車路上嘅旁邊一塊凸出嘅岩石，附近係有圍欄嘅。 據聞以前係因為以前當地嘅小朋友鬥膽量喺呢一舊岩石上小便， 之後就由德島縣嘅雕刻家製造左呢個塑像喺小便岩上。
日本人真係咩都可以求一餐。
下面就係V型嘅大峽谷，中間留住翠綠色嘅祖谷溪 。我都好鐘意影相架，為左影相可以去到幾盡？我克服畏高竟然企左上欄桿為咗可以影到更加多嘅高角度嘅照片， 即係連自己都佩服自己。 不過千祈唔好跨過欄桿，因為真係幾危險㗎。
導遊姐姐真係好好人，佢見我一個女仔，所以主動走黎幫我影相，真係好滾動。
呢個景點完左之後已經差唔多到12點，準備去食lunch。沿途見到個V型峽谷真係好勁，好深！係吉野川用上2億年以上嘅時間沖蝕而成，共長約8公里。
中午黎到附近嘅酒度食Lunch，我哋就去食午餐—祖谷嘅蕎麥麵。我都幾鍾意食蕎麥麵嘅所以都幾期待。
我哋去到呢個食飯嘅地方就係「新祖谷溫泉ホテルかずら橋」， 一入門口已經見到有一團團人喺 宴會廳， 好明顯呢度都係專做旅行團生意嘅。 根據我去過咁多次日本嘅經驗， 黎到好山好水嘅地方必食嘅嘢， 就係蒟蒻、味噌、蔬菜、豆腐、蕎麥麵、香魚， 之前去過山梨縣、山形縣、長野縣、日光等山區都係食呢D。
呢一啲白色似魷魚刺身嘅野， 其實佢係蒟蒻刺身嚟㗎， 點味噌食係非常之唔錯㗎， 我覺得喺癲覆咗我對蒟蒻嘅識知。完全！！完全係好食！。
呢度出名嘅係蕎麥麵，開頭嘅時候我以為只係食蕎麥麵， 估唔到個午餐係大份到咁樣。
呢一個lunch set都值3500yen㗎， 所以團費7500yen係抵嘅都。
另外仲有一啲野菜、豆腐煲、豬肉丸、 燒香魚等， 味道都ok嘅。 我最鍾意呢度嘅香魚，除咗本身對香魚情有獨鐘之外，呢度嘅香魚呢係等你食到咁上下，熱辣辣咁上嚟嘅， 我隔離嗰個日本人都食到jap jap聲。
食完嘢之仲有少少時間就喺酒店度行下。Lobby附近就有間小賣店專賣呢度嘅特產， 唔少團友已經好心急咁買咗少少嘢返去 。其實之後會經過道之駅俾你大家購物，可以唔使咁急住買嘅。
呢個moment我好想大叫冷靜D呀各位！！
好得意嘅包裝嘅糖。
 覺得好食可以買返去嘅都‥‥‥
呢一度呢發現有樣嘢係幾流行嘅，就係喺地圖到標示你來自邊個國家，我喺幾個景點都見到有。 自從Hong Kong Express開通咗高松之後，呢度真係多咗好多香港嘅遊客。
我都為我呢個網站插左旗喇。
講返呢度嘅交通呀， 如果唔想參加local tour 嘅朋友。其實呢度都有巴士嘅，不過啲班次真係幾疏， 以呢間酒店附近嘅巴士站為例，要計準時間有難度嘅。
 我都算係捱得可以11號巴士，又會check時間表‥‥‥但係呢個班次真係疏到我唔想考慮。
我今次就唔會入住祖谷嘅溫泉旅館（鬼叫我窮。）但我睇過附近有好幾間溫泉都各有特色。
呢一間旅館仲有個天空露天風呂， 都有唔少報導介紹呢度嘅溫泉， 話呢一個係得德島縣嘅絕景溫泉之一嚟㗎喎～
食完一餐豐富嘅鄉土料理午餐之後就出發去かずら橋， 又名藤蔓橋/葛橋/蔓橋。
藤蔓橋係我成個行程之中最期待嘅景點，有網友之前都有睇過我介紹藤蔓橋呢個絕景，其實呢個blog係收藏咗好多我好想去嘅地方， 藤蔓橋就係其中一個啦。
落到車之後，團友都好興奮咁衝過去。 正常就要畀過橋費550yen，呢個團已經包咗啦。
藤蔓橋 係日本三大奇橋之一， 喺平安時代平氏同源氏都係非常之大一家族，後來源平大戰作戰役之後， 平氏落難帶同只有五歲嘅安德天皇嚟到呢個祕境。 當時佢哋用一啲有良好韌性嘅獼猴桃樹枝嚟搭建咗呢條藤蔓橋，方便過路之餘可以逃避敵人嘅追捕。
不嬲呢D三大乜乜物物係有好多版本嘅如果以錦帶橋、藤蔓橋、神橋做標準，我已經達陣喇！！
去到嘅時候 其實真係有好多人去參觀，係好難影到好靚嘅景色。
好多人都係為左過橋果種刺激嘅感覺， 一路行嘅時候，佢係會搖下搖下。橋面嘅部分係有一吋半至兩吋嘅空隙，好似我呢啲咁細粒嘅紙片人，其實一差錯腳就已經成個可以穿落橋….
我就有冒死咁左手相機、右手手機咁黎過橋，一邊拍片一邊影相，不過全程都係驚到亂咁講野。費事獻醜喇！
沿途嘅每一個人都係緊握住左右嘅扶手慢慢咁過橋，喺呢個咁驚嘅情況之下好難欣賞橋下嘅美景…..
我就有阻止大家咁慢慢行，橋下面嘅景色係非常之靚，啲水好清澈，呈現綠藍色。 其實呢條橋已經比我想像中冇咁Chok(搖)， 早年經過修葺， 主要受力部分呢已經係改由鋼纜， 其他部分都係用樹枝包住個鋼纜，如果唔係都好難承受咁龐大嘅遊客量。
雖然行嗰陣真係一步一驚心，但係佢每兩三年就會換一次材料，其實都好安全。
行完藤蔓橋之後近入口嘅地方會見到另一座橋，係上面可以見到影到藤蔓橋嘅景色，橋下藍綠色嘅溪流真係好靚呀。
  
 有一樣嘢都係上網查資料先至知道，原來日本各地都有藤蔓橋。
單喺祖谷嗰度，東祖谷方嗰邊亦都有另外兩條嘅蔓橋，分別係男橋同女橋。 另外喺池田町嗰度亦都有一條仿製祖谷呢一條嘅藤蔓橋， 不過所有同埋橋都唔夠呢一條咁出名。
 好搞笑。
下一站到達嘅就係平家屋敷，好少聽到嘅景點。
呢度係曾經喺安德皇帝嘅御醫嘅居所，平家滅亡之後佢就喺祖谷定居， 而且利用咗深山裏面非常的豐富嘅藥草為當地嘅村民治病， 受到村民嘅敬重，後代亦都為當地服務過，祖屋就留傳咗落嚟後後代捐俾當年政府當係古蹟畀遊客參觀。
呢個茅草屋頂嘅記錄咗大量嗰個時代嘅生活物件同埋同平家有關嘅歷史文物等等。
正常對日本歷史冇深入研究同埋興趣嘅朋友諗都唔會去呢個景點，我諗如果唔係因為觀光團我都唔會去。
我覺得呢一個景點最可愛嘅就係有兩隻小狗看門口。
之後景點就係道之駅大步危， 裏面有妖怪屋敷石之博物館同埋購物嘅地方， 上個景點有團友遲咗上車呀所以呢個景點得返好少時間，都睇唔到啲乜嘢。
最搞笑嘅就係有啲妖怪行嚟行去可以同佢木影相，相信小朋友會好開心。
 呢度仲多野買啦～
妖怪屋敷同石之博物館係需要自費入場嘅，時間好少，所有團友都冇入場。
露台嗰邊可以欣賞景色同浸足湯。
下一個景點就係去大步危乘搭觀光船！
係我其中一個好期待嘅景點之一。
船飛要1080yen，團費已經包埋㗎喇，船程約三十分鐘。 上船之前先影一張大合照。
下面就係上船同影大合照嘅位置。
 穿上救生衣先上船， 其實成程船都非常安全又冇大浪，只係有部分地方個水流有少少急。 Ｄ水真係超級清架～
春天遊覽嘅時候可以見到好多鯉魚旗掛咗喺河中間， 秋天可以見到沿岸上面 嘅紅葉。雖然今次係夏末嚟到呀，如果好彩嘅話呢都可以見到小動物。 沿途兩岸怪石嶙峋， 好多不同嘅紋理同埋形狀， 岩質喺船度比較難睇清楚， 好似話呢度好出名嘅係含礫片岩，然而我不知道什麼是含礫片岩，哈哈。
 據聞Ｄ岩石係幾似某D動物，有名架。不過全程日文介紹，唔識聽。
我從來未見過咁多魚聚集喺一齊，同一個方向郁都唔郁， 有咁清嘅水先去見到咁多魚。
呢度仲有好多土產係可以買㗎。仲多過之前嘅道之駅，如果要買手信，呢度係最好嘅地方。
呢度仲有餐廳，喺非常之好嘅中途站。

話咁快就結束咗半日嘅行程啦， 宣傳海報就話大概4點25分到返阿波池田站，今次我地左早少少到。想住一晚嘅朋友可以預先用Email同當地溝通左先，可以車你去順路嘅旅館度放低你。

後日我就要返高松，所以我要去嘅地方係要有機場巴士直達到嘅地方。

如果唔係星期日要返香港嘅話呢我應該會選擇今晚Stay喺琴平，因為琴平有車直接去高松機場， 而且朝早亦可以行金刀比羅嘅參道， 不過可惜呀呢幾日係撞曬日本嗰邊嘅假期，琴平花壇嗰邊只係得琴晚係有房，之後都冇單人住宿plan。
所以成日都提大家買機票之前一定要諗好大概嘅行程( 我承認今次機票係買得好急嘅) 同check清楚唔好撞日本人嘅假期，又好似呢啲咁嘅觀光團，如果唔check清楚佢係咪每日都有或者佢係指定時間先至有，就可能會花好多時間去咁散嘅景點。
呢一晚我就決定左去宇多津，未聽過？我都未聽過。呢D一定係比較Local D嘅地方黎，我只係想輕輕鬆鬆過埋呢一日姐。
宇多津都有機場巴士可以直接到高松機場。附近當然仲有好多其他選擇啦，有坂出同丸龜。當中得丸龜比較熱鬧， 但係發現丸龜嘅酒店都比較貴同好full，而且Ｄ酒店係好唔近車站。
好彩趕到4點20分往岡山方向嘅果班特急南風號，比自己原定時間早左成40幾分鐘到酒店～
上唔到呢班車就要係搭ＪＲ土讃線・琴平行去琴平度轉車ＪＲ土讃線・高松行。
宇多津絕對唔係旅遊區，但莎朗都好滿意！想知宇多津有咩食有咩買留意我下一篇遊記啦～
西祖谷定期觀光團
開團時間：
  • 三月第三個星期六—11月30日凡六、日及公眾假期
  • 五、八、十、十一月每日運行
集合地點：阿波池田站
集合時間：10:45
景點：
JR阿波池田站⇒小便岩：断崖絶壁祖谷渓谷(下車観光「小便小僧」)⇒郷土料理午餐⇒かずら橋（藤蔓橋）⇒平家屋敷⇒道の駅大歩危（購物，內有妖怪屋敷需自費）⇒大歩危峡(遊覽船觀光)⇒JR阿波池站
行程路線及交通資料參考：
如無法瀏覽以下地圖請按此。
​
​​SMXLL

(Visited 535 times, 1 visits today)