趁連住7月1號有3曰假可以去個小旅行，自從上次東京之旅一直好想再一個人去，今次終於有機會，之前撲到單程超平機票就即刻扑左鎚。靜岡係一唔熱門嘅地方，位於日本中部同關東偏南位置，沿海有豐富海產，今次就係玩呢條海岸線喇！
晏就一點機，十點鐘起身到機場真係夠晒hea。
今日個天真係好靚！冇雲嘅天好似一幅水彩畫咁！
今日因為係一個女仔去，唔想拎咁大個喼，因為有D細站好多樓梯，又驚儲物櫃放唔到咁大個，所以去左Rent A Suitcase度租左個細喼。雖然係21吋但因為日本果邊都熱熱地，所以背心都夠位，最多帶定個旅行袋啦。Rent A Suitcase 係銅鑼灣，拎喼好方便，亦都會講解晒個喼點用，見到個靚靚Rimowa都好滿意，如果今次好用可以去歐洲買返個。
其實唔洗帶好多野，我慣左會係酒店洗衫。所以質晒D野其實仲有1/3位放戰利品。
係撞到朋友同一班機，好有緣！佢地經名古屋去大阪～我就去東京！分道揚鑣喇！
6點左右Land左，即刻用apps check下搭咩，係名古屋都可以用ICOCA，Charge左張卡之後就即刻衝左入閘，但太興奮唔記得補返搭特別車嘅飛，上左車又落返車去買，又趕，點知禁錯制，眼見仲有1分鐘就開車，唔理啦！應該買名鐵名古屋先啱，不過都係貴少少姐。
一個人旅行最好就係做左傻野都冇人知，哈哈～
好啦，終於去到名鐵名古屋，因為臨時改左到名古屋買便當唔係機場食，所以早左成個鐘。悠悠閒買JR東海道新幹線券，順便買埋便當。7點幾好多人都會買上車食。
我揀左呢個東海新幹線便當，好似係新出架，集齊左關西，靜岡，東海，關東嘅料理。
味道都ok，鰻魚特別好食，山葵蜆肉有驚喜，炸物唔洗諗都知唔會脆。
今日其實只求順順利利去到濱松，食個靚飯，行下街咁姐。搭3個站就到，真係極快，只係半個鐘鬆D就到濱松。
濱松係大站黎，係靜岡相對最旺嘅市黎，出名係樂器之都，特產係鰻魚，濱名湖係必去景點。
一落車就見到間酒店個招牌。
出左南口個閘唔洗30秒就到，隔離仲有間7仔，地下有間餐廳，方便到離晒譜。酒店check in係8樓，物品一應俱全，不過adaptor壞左問前台，佢地話冇，有少少失望…..
間房唔算大，但夠晒新淨簡潔，係我鍾意嘅style。重點係超平，2晚14400yen，即係約HKD450連稅包早餐，抵到爛。
有少少餓，出去搵野食，決定去食街有町樂街。梅雨季，出面落緊微雨，酒店有得借遮超方便。經過濱松JR大馬路一路直行見到松本清就轉入去。
因為今日係Happy Friday所以超多人，醒起呢度有靜岡唯一一間蟹道樂，諗住去食下，點知full晒……
咁冇計啦，都9點，唯有行下松本清，買左呢支shiseido保濕，當店no.1架∼around 1300 yen，港幣$100左右，抵買(之後返去用過亦覺得一流~一定會再黎補貨)。
其實成條街有好幾間shopping mall，好好行，係新濱松駅附近都有名店，JR站更加唔洗講，超大超好行。
見都夜喇，就返返酒店附近睇下有咩食，其實JR站隔離有間Bic Camera，閂九點，行到去已經閂左，咁近酒店，聽日一定要早Ｄ黎掃貨。
轉行返去JR站，見到一間壽司店寫住「沼津」？沼津魚市好出名，好多人都專程去食新鮮魚生，咁就衝左入去喇。其實後尾check返呢間野好多分店，但都係靜岡先有，而且魚獲係每日各地直送，當然梗有靜岡沼津魚市嘅魚獲啦！
Menu有晒圖，唔會唔識叫~
叫左1人前地魚刺身盛都係1380yen（～港幣$80幾，超抵呀！)，好平好好食，除左有當地嘅魚獲，仲叫左至愛真鯛同解下口癮嘅蟹棒。
如果係香港食呢兜野又點止$80，冇3舊水都唔洗落樓。
生白飯魚都係第一次食:D 以為會好腥，但加埋薑呀、蝦仔、蔥咁撈埋食又幾好食喎！
超新鮮，睇相睇質地就知。
Comment：呢間野地理位置一流，係正JR，仲開到好夜，見到好日本人都黎呢度吹水食壽司。不過靜岡唔算係遊客熱門地方，Waiter當然唔係好識講英文，不過有圖menu搭夠。壽司水準唔錯，尤其係地魚，真係好好食同好彈牙。加上超平價錢，係必食之選！
食完野去7仔睇下有咩甜品。有新野賣喎！
近排真係好hit 妖怪watch，連7仔都有好多佢地嘅野。
食完Dinner要食甜品，最愛食日本Haagen-Dazｓ，夠晒多款！
之後就返酒店敷下mask 訓覺。Day2會去睇鐘乳石同遊濱名湖食饅魚飯，雖然我唔係鰻魚迷，但正正因為唔係太鍾意食，唔係間間鰻魚飯會入得口，所以更期待濱松嘅鰻魚飯。
ホテルソリッソ浜松 Hotel Sorriso Hamamatsu
地址：静岡県浜松市中区砂山町322-7
電話：053-452-5000
交通：濱浜駅南口步行30秒
沼津 魚がし鮨 メイワン浜松店
地址：静岡県浜松市中区砂山町6-2 浜松ターミナルビルＪＲ東海浜松駅構内
電話：053-413-2111
營業時間：11:00～22:00
交通：浜松駅エキマチウエスト內
(Visited 125 times, 1 visits today)