第二日嘅行程其實一D都唔密，但係就非常多意外。首先會去東海最大的鐘乳石洞，會去浜松最著名嘅地方－浜名湖，如果有時間會參觀埋音樂博物館，同埋食浜松特產－鰻魚！最後就返返浜松站附近行街shopping。
一早係酒店食早餐，400幾蚊包早餐都算係咁，應該有嘅都有，味道都唔錯。
肉丸唔錯幾好味~
日式早餐一定會有嘅野都有齊。
竟然有納豆‥‥‥真係估佢唔到。
平時冇食早餐習慣，食少少浪住個肚出門口。
之後出發去龍之岩洞，行行下拎相機。咦？本passport呢？？？搵勻個袋都冇唯有返酒店再搵，都係冇。莫非跌左？唔係要報失掛…..咪好煩？諗下最後一次拎passport出黎時係….check in! 問下reception先，遠遠行過去見到佢地收埋左的我本野…..有少少嬲，passport咁緊要，點解唔送返上房俾我喎！
終於可以出發去竜ヶ岩洞，因為睇相都覺得幾靚加上未見過鍾乳石就去望下。一朝早搭巴士，其實好方便，演松站出面15號巴士站搭奧山行就ok。
浜松站真係好多野食^^呢間好似唔錯咁～
點知去到剛好開走左，因為班次都唔算密，買下野飲下又玩下手機就有下一班，要搭成差唔多一個鐘車先到。
呢班車真係有超級多個站‥‥‥
成架車得我一個’O’
搭左成個鐘，幾時到架究竟‥‥‥
搭左成50幾個站終於到喇，差唔多成個鐘車程，聽住歌D時間過得快少少。
行8分鐘左右就到，走果時記住預埋行出黎嘅時間。 一落車向右望會見到好大個牌，向果邊行入去就得喇～
行入去時見到周圍嘅景都好靚。
見到好多日本人都會黎揸車黎，外藉遊客反而冇乜。同時我真係慎重考慮緊究竟我係唔係要考返個車牌自駕遊用呢？
門口有講解地形同埋石嘅結構，就算係中文我都係唔會睇得明。
入場費$1000yen其實都幾抵@@
入口隔離係有餐廳架。肚餓可以食左野先。
入門口已經feel到裡面比出面涼好多，原來裡面只有18度。
龍巖洞係東海地區最大嘅鐘乳石洞，係2億5千年前的秩夫古生長層上面，係1981年被人發現，有成1000米長架～都要預返一半個鐘至９個字參觀時間。
門口有個有好多蝙蝠嘅館，唔知係唔係原本好多，但趕晒佢地出黎住，哈哈～
其實佢地都幾可愛丫。
入去嚕！
有好多奇形怪狀嘅鍾乳石，有筍形，有D有條紋，有D柱狀，又有D個面好滑，望落去好似有層膠係面咁，半透明架。摸下個質地又好硬，都幾得意。
三體羅漢。呢度每一舊特別形態嘅石都會有名架~
有一個鐘，個個黎都會打一下～
似唔似係一個人係水中？
當初發掘同開鑿時都好艱辛，睇下個位幾窄‥‥‥
呢舊又幾似鱷魚喎！
裡面好濕滑，有Ｄ路段又好斜，有好多水池呀、流水(同滴水)，如果要去最好著波鞋，同要小心行啦～不過目到有個日本女仔竟然著高跟鞋‥‥‥真係神級。
似唔似觀音菩薩呢？
呢度Ｄ水池Ｄ水真係超級清。
越行得入越多野睇架～
呢個黃金之大滝就係落差30米嘅地下瀑布喇，加埋燈光真係好靚好壯觀架。可惜裡面好黑好難影得靚。
仲有比較出名嘅係鳳凰之間同黃金之富士
好近咁到忍唔住摸下，真係好得意～
我覺得唔似富士‥‥‥反而叫黃金會比較貼切D，哈哈哈～
仲有唔同質地山嘅石～呢個似唔似西柚皮～@@
其實裡面有好多位都係取景好地方～加埋燈光可以影得好靚。
水神樣都好靚呢。
最後出口度有一間迷你展館、紀念品店同食堂。
展館展示左洞內不同的石。
紀念品店有天惠之泉嘅泉水，各種礦石，水晶以致金箔護膚品都有得賣。
有唔少原石～價錢都幾平～
係我最鐘意嘅愚人金，有聚財功效呢～
仲有切片！太靚喇！買左一塊當裝飾！
係遠州窯產物，呢個設計幾特別，好想買呀！不過我次次旅行都買太多同類野‥‥‥今次忍下手！
天惠之泉樽裝水～話飲左對身體好喎～
呢度估唔到都有金箔野賣喎～金箔護膚品不嬲都好好用，令皮膚會明亮Ｄ。不過呢個牌子未聽過，都係去金澤先買。
要留意返回程巴士起碼20分鐘一班，剛剛走左架，唯有等一等。
班次真係好疏架‥‥‥我就黎等到花兒也謝了‥‥‥早知食少少野先黎等巴士。
附近竟然有個位有好多花～
下一站係去濱名湖，但真係非常非常黑仔！中途好多阻滯‥‥‥我只係想食個鰻魚飯姐‥‥‥點解都咁難T^T
有用資料網址：
竜ヶ岩洞
地址：日本〒431-2221 静岡県浜松市北区引佐町田畑１９３ 竜ケ岩洞
電話：53-543-0108
費用：成人1000日圓 小童600日圓
交通：
-
靜岡駅外大型巴士站乘遠鉄巴士 「45．奥山（静岡県）行」竜ケ岩洞入口下車
-
步行7分鐘 至 竜ケ岩洞
(Visited 102 times, 1 visits today)