琴晚食完一餐非常豐富的晚餐，原本行程今日係要去星野小區嗰邊食早餐嘅，畀啲心理準備大家行去車站嘅圖中呢會經過非常多美食，會受到好強烈嘅引誘。
首先第一間經過嘅舖頭係Sawaya果醬店，上一篇都介紹過佢係使用當地所產嘅水果製作，長野縣嘅水果不嬲出名種類多而且好好味，我忍唔住都買咗幾樽，士多啤梨、白桃係我至愛，返到屋企食嘅時候其實食左一個禮拜左右已經食曬兩樽嘢，因為信實在太好食呀～所以千叮萬囑一定要買呀。
有Blogger話係果醬界LV，真係冇講錯，佢又真係我食過嘅果醬中數一數二，我會覺得佢似Hermes多D。
再經過其中一間好想食嘅餐廳—腸詰屋嘅時候已經忍唔住，呢間餐廳有咩咁出名？
佢係有用咗淺野屋嘅麵包同埋輕井澤好出名嘅腸黎製作嘅早餐，就咁行經外面見到佢充滿西式嘅外觀入到許亦都見到一邊賣香腸芝士，另一邊係買嘢食嘅counter，感覺就好似去咗外國嘅早餐店咁。
唔怕醜嘅話呢就可以過埋隔離嗰度賣大parmaham、salami等等火腿嘅counter到試食，哈哈，我呢啲唔怕醜又唔知醜嘅人當然就沖咗埋去啦，真心覺得好食嘅，但係要雪櫃冰住？咁我陣間要行街點算呢？
 
我同朋友冇食早餐嘅習慣所以只係叫咗一個好細嘅早餐set，有果醬同埋一個香草腸包，可以外加一杯果汁。如果覺得唔夠喉，可以點個大Set。
 條腸真係好好好好好好食，個包仲要好鬆軟，又香，去輕井澤一定要黎呢間食早餐，保證好食。
 喺呢一間早餐店食完之後過咗去附近嘅一間賣芝士嘅鋪頭，呢間野我係喺當地嘅旅遊書度見到有介紹。
佢係有蛋糕賣嘅，原來我只係諗住去睇下Ｄ蛋糕。
但估唔到Ｄ芝士真係驚為天人呀，其實我係唔係好食芝士嘅，但係Blue cheese我就食嘅，咁我又好混吉咁走去試下人地D芝士，呢間鋪頭嘅blue cheese真係勁好食，好食到想買返到香港，但係根本冇可能要冷藏到T___T
佢實在太大舊嘢，就算我呢喺酒店度食幾日都食唔曬。
原來佢仲得過獎‥‥‥唔怪得啦！
仲有其他芝士，都係好香，不過我就唔太鐘意食喇。
所以下次呢我會喺附近輕井澤租一啲木屋別墅，買支靚酒再買埋呢度Ｄ芝士加埋下面個Crackers，一邊食住咁渡假就一流喇。
由酒店行去輕井澤車站原本就十五分鐘但係我哋行咗個幾鐘，終於到左輕井澤南口。
有一架去星野小區嘅shuttle bus係黃綠色嘅，班次都算多，15至20分鐘一班，車程約十幾分鐘，因為有睇地圖嘅都會知星野距離中輕井澤站係幾遠，都可以搭地JR轉巴士不過呢一個方法係最方便最平，可想而知呢架車都幾多人搭幾逼下。
中輕井澤都有車架，其實最好就行完星野小區後就去中輕井澤食個飯～有時間可以去星野小區浸個溫泉走～
黎到呢區你會發現好多大嬸同婆婆級嘅女人打扮到好靚咁出現。雖然話日本男人比較大男人，但老一輩嘅日本人好多時佢地會俾好多家用又或者係全份糧俾老婆‥‥‥久而久之‥‥‥你懂的。
我哋落咗車嘅第一站就係去高原教會同石之教堂，呢兩間教堂都係好多情侶嚮往結婚嘅教堂，非常之熱門。
要行一段斜路‥‥‥都幾辛苦。
其實高原教堂前身係星野遊學堂建於1921年喺第二次世界大戰之後改建為依家嘅高原教會。
淨係影入面都好靚㗎。
好彩嘅就可以好似我哋咁見到嗰日見到兩對情侶喺度結婚，好浪漫呀‥‥‥嗰度嘅環境鳥語花香而且高原教堂又真係幾靚，我都影咗好多相。
 要黎輕井澤又未諗過結婚嘅男友千奇唔好帶女朋友黎呢邊‥‥‥周圍都係教堂，點頂？
行去石之教堂嘅時候，發生左件好搞笑嘅事，正常行完高原教會都會去石之教堂。
走果時前面有好多人，咁我地就跟住佢地個方向行去啦，點知行行下越黎越唔對路，點解同地圖唔同嘅？
原來最前面嗰幾個人，係就係去石之教堂，但佢地行錯路，之後一大班唔識嘅人都冇睇地圖就跟住佢地一齊行錯路，真係好搞笑。
見到咁多石造嘅野就知就到石之教堂啦。
好靚呀～牆連地下都有弧度～這就是美感。
石之教堂係我最嚮往嘅地方，因為佢將思想家內村鑑三嘅思想透過石光水綠色樹木五大基本呢自然界要素融入設計當中，以天然教堂為設計理念，所有嘅設計都係同大自然融為一體。咁嘅建築師當然唔少來頭啦，佢係由自然建築第一之稱嘅美國設計師KendrickKellogg建造，呢一個亦都係佢喺亞洲唯一嘅建築物。
真係好失望呀因為當日有人結婚所以就包咗教堂而且唔可以入去影相，連門口都唔可以行近所以係我影相呢個位就已經封左。好難先至可以影到一部份嘅門口，影唔到佢全景，我連相都冇心機影就走咗…..嗚….冇辦法啦唯有下次再嚟啦。
之後我仲同男朋友講我入唔到去個教堂好失望呀，你哋估下佢點答我？
佢話下次喺度同我結婚喎，我諗佢真係完全低估咗book呢間教堂結婚同埋向我求婚嘅難度。
之後我哋步行去Harunire Terrace，嗰邊佢嚟教堂都幾近有好多意大利餐廳。
適逢佢地有慶典，有七彩嘅遮做裝飾，好靚呀！
 呢度都幾多餐廳、cafe同bar，但就唔算係shopping嘅地方，只係有D小店，一個鐘內都可以行晒，有時間嘅坐下飲杯野傾下計會更好。
 我最欣賞嘅係當地嘅小店，本身我係好唔鍾意千篇一律嘅嘢，而佢地賣特色嘅產品，例如呢一間專係賣石做嘅飾品嘅舖頭，同另一間賣純木手作嘅鋪頭，喺出面都幾難搵到啲咁可愛咁靚嘅作品。
 呢間專賣銀飾的～
  呢度都有cake shop，咁西式嘅地方點會唔少得cheese cake?
呢度經常出現嘅芝士餅。
雖然教堂係星野溫泉附近裏面，但係都要行一段路㗎，行左咁耐我哋都肚餓之後就去附近嘅村民食堂。
唔知點解呢間村民食堂都幾多人推介，連旅遊書、當地雜誌都有介紹。可能係眾多西餐中嘅一間和食餐廳，價格又吸引，個環境又真係幾靚，所以推介？

佢係用木同玻璃嘅建築嚟嘅，附近又有好多好青綠嘅樹木。

佢地帶埋狗仔一齊黎～
好老實，嘢食就唔算突出中規中矩，勝在價錢算親民，其實門口有間coffee shop㗎，我反而覺得係嗰度飲杯嘢可能更加舒服。
 呢隻波波壽司係幾可愛嘅，所以朋友都忍唔住點左～
我就點左冷麵，因為出面真係太太太太熱，由今朝長袖變左背心。
 不過不失啦，我覺得應該有更好嘅選擇。
去開輕井澤又有時間的話，好建議去下白絲瀑布，不過今次我地逗留日數少，又落雨，去唔到嚕。
我哋仲淨返大半晝嘅時間可以行埋舊輕井澤銀座。行星野小區比我地預期中快，而琴日落雨令到我地改左行程，去左Outlet先，所以下午仲有好多時間。
我地係村民食堂附近個巴士站等車，都係等返果部Shuttle bus。
實用資訊：
星野Shuttle bus巴士時間表：http://www.hoshino-area.jp/shuttlebus
Karuizawa Sawaya 澤屋 新輕井澤店
網站：http://www.sawaya-jam.com
地址：長野県北佐久郡軽井沢町軽井沢東1178
電話：81 267-42-8260
營業時間：9:30～18:30（夏期延長）
​
腸詰屋軽井沢1号店（腸詰屋輕井澤1号店）
網站：http://www.gunraku.co.jp
地址：長野県北佐久郡軽井沢東19-5
電話：+81 267-42-3791
營業時間：１０：００～１８：００（週三休）
​
 Atelier de Fromage輕井澤芝士熟成所（アトリエ・ド・フロマージュ 軽井沢チーズ熟成所）
網站：http://www.a-fromage.co.jp
地址：長野県北佐久郡軽井沢町東18-9
電話：+81 267-42-7394
營業時間：【平日】10：00～18：00（7/15起六、日至18：30）(無定休)
​
 輕井澤高原教會（軽井沢高原教会）
網站：https://www.karuizawachurch.org
地址：長野県軽井沢町星野
電話： +81 0267-45-3333
營業時間 ： 07:00~18:00    ※舉辦婚禮時謝絕參觀（全年無休）
交通：由JR「輕井澤」站搭乘免費接駁巴士或的士,約需15分鐘。
​
石之教會 內村鑑三紀念堂 （軽井沢 石の教会 内村鑑三記念堂）
http://www.stonechurch.jp/
地址：長野県軽井沢町星野
電話：+81-267-45-2288
交通：由JR「輕井澤」站搭乘免費接駁巴士或的士,約需15分鐘。
​
榆樹街小鎮Harunire Terrace（ハルニレテラス）
網站：http://www.hoshino-area.jp/shop
地址：長野県軽井沢町星野
營業時間:
餐廳—上午 11:00 到晚上 10:00（最後點餐時間：晚上 9:00）
商店—上午 10:00 到晚上 6:00
​
我蘭憧
地址：榆樹街小鎮內
營業時間：7月平日10:00〜18:007月土日祝、8月全日9:00〜19:00

 

(Visited 118 times, 1 visits today)