呢一隻即食麵，我係冒住有機會俾人去日本掃晒嘅風險推介！
之前係民宿度住，有其他旅客煮過呢隻驚為天人嘅即食麵「日本7-11金の限定日本全國名店拉麵一風堂札幌濃厚味噌泡麵」，個個聞到陣味都話好想食。你知啦～當時人講到幾好味幾勁咁樣都唔夠試一試咁真，加上有可能因為佢嘅描述對佢嘅期望過大，明明好食都變到麻麻地‥‥‥
但係試左一啖之後！！真係會上癮，味噌味好濃好有層次，麵算係粗麵黎，好彈牙有咬口。通常去日本都係住酒店，最多都係沖個杯麵，點會煮黎食？可能因為咁，所以一路都無咩人發現呢隻麵原來咁好味。7-11 cross over得又點會係普通野？其實佢大有來頭：
被日本網友票選為北海道top3拉麵店之「すみれ」係連鎖式經營，全國都有分店。係日本無人不知，濃厚有層次的味道正正係北海道的經典拉麵味道。すみれ嘅招牌係味噌拉麵，所以佢地亦Cross over左7-11出售呢隻佢地味道嘅拉麵。平時係札幌食一碗賣870日圓，但係7-11呢隻連稅都係170yen姐，完全還原返佢地招牌拉麵嘅味道！
咁有來頭，個煮法都寫到好清楚，真係煮3分30秒就好喇！跟足佢寫嘅時間同用水份量咁煮，就可以食到佢最佳味道。推介過其他朋友買黎煮，全部一致好評，絕對值得你買返香港。我敢講就算做手信都唔會失禮。
裡面係麵條一包、粉末一包同液體一包。煮三分半鐘就有得食。Cover仲有叉燒同蔥，加埋就一流喇！
去7-11見到千祈唔好猶豫，唔係間間７仔都有得賣，好睇緣份。
同一系列都有crossover一風堂出白丸，但小編就未試過，試過嘅友人就話依班班。
拿～戴返個頭盔先呀，個個人口味唔一樣架！
(Visited 269 times, 1 visits today)