一早7點起身仲早過平時返工，冇計啦，因為去日本平嘅巴士班次好疏，極速pack好行李再係JR站keep好行李就去等巴士。好彩平時有冇食開早餐，唔係買埋真係趕唔切。
可能大家都好好奇點解我要去日本平？好出名架咩？首先日本平係係入選日本觀光地百選第一名嘅名勝地。而且今次行程重點係被列入國家重要文化財產之一嘅久能山東照宮，可能唔少人都聽過日光東照宮，同樣係祭祀德川家康，究竟有咩分別呢？‥‥‥
日本平景色

 久能山東照宮
靜岡站巴士有齊好多唔同巴士去不同地方，連去東京同大阪嘅高速巴士都有。
平時班次真係好鬼疏，但網友又話星期六日好多人‥‥‥真係好難取捨
第一次搭要留意返日本平有2條線，唔係去rope way station果條係去唔到久能山東照宮的，係要行20Mins
8點正準時上到車，要成1個鐘到終點站。但google map check過果邊係山嘅行車路黎，唔太建議咁搭。
第一班車全車得4個人-_____-
瞓左陣就到喇，一落車真係忍啊住講左句: 說好的富士山呢？
是咁的，日本平出名睇到駿河灣同富士山，但今日不幸地天陰陰，仲因為太早，山上有一陣仙氣，周圍白朦朦，乜都睇唔到，唔好話景，行遠少少都會沒入白霧中。
黎嘅主要都唔係外國遊客，係日本人。不過我諗佢地都唔係好care，富士山成日都見到啦。
因為去到9點連鋪頭都未開，上網Check過開9點半，去完返黎應該可以買下手信喇！
咁就直接搭纜車去久能山駅。
都唔平架要成1000yen來回，每15分鐘一班。
其實真係唔係好明點解日本周圍都有情人鎖‥‥‥
一朝早去山上自然成為各種昆蟲嘅大餐，不過好彩我D血好難飲，D肉又唔好食，所以向來D昆蟲都當我透明，不過係咁飛黎飛去都幾煩。
德川家康曾經統一全日本，死後被尊為江戶幕府嘅守護神東照大權現，供奉之神社稱為東照宮。全國各地都有好多東照宮架，今年即將踏入死後400年，所以各地東照宮都紛紛推出好多不同類型嘅紀念品，德川家康迷真係唔好錯過！（不太熟悉日本歷史，如有錯漏，請指正）
呢部車個殼勁新，入面都幾好坐。
 ​
因為真係太太太太太早喇，完全睇唔到景呀！下次plan行程真係要考慮埋呢個因素。
 車站已沒入霧中。
 原來係可以睇到駿河灣海岸靚景‥‥‥Ｔ︿Ｔ
一落車跟住人群行，得一條路架咋，就到大名鼎鼎嘅日本國寶級神社—久能山東照宮。
日光東照宮係就係好靚，不過睇建築其實更重要嘅係歷史同起源‥‥‥之所以俾人稱之為國寶，係因為德川家用左當代最新建築法去起，美輪美奐，加上佢仲係日本現存最古老嘅東照宮，已經被列入國家重要文化財，所以真係好值得一睇。
入場費都只係500yen
入口竟然有巫女，第一次係神社見到。
順帶一提，有儲開御朱印嘅朋友一定一定一定要黎下呢度嘅御朱印帳，因為真係超級靚！
唉，提起就傷心，話說去左咁多次日本先第一次收集御朱印。我帶左好耐之前自己買果本御朱印帳，但原來呢度果D靚好多，好想買但又唔想浪費…….飲恨。
放低左之後，佢地要花時間寫，所以會俾個籌你返黎拎。
有兩種飛，一種係淨去東照宮，另一隻包埋博物館。
成個久能山東照宮地圖就係咁，因為依山而建，所以都幾多樓梯。
呢個神社嘅入口真係靚呀！
去過日光嘅東照宮一定會覺得呢度冇咁浮華，但我覺得呢種美先恰到好處。
謀殺菲林
 手水舍，呢個就解樸好多，日光東照宮果個好浮誇架。
 一個個石燈籠督睇得出呢度先代久遠。神社都將近400年，開始進行維修。
 日光東照宮都有一個豪華版嘅鼓樓！
 特別喜歡影御神酒。一排排又唔同花紋，好靚。
 原本呢度有個五重塔架，不過明治時代神佛分離令所以引發廢佛毀釋運動而拆左，原有藥師佛同其他佛像都轉移至到其他地方。
 呢度嘅唐門亦都好靚架！
呢度係德川家起的，自然有好多相關嘅野‥‥‥
高達都可以理解，但呢隻妖怪又係咩一回事？？‥‥‥
 正式進入神殿，已經感受到世人對呢個神社絕對係非常努力咁維護。
 提提大家唐門係俾神進入，所以一般人只可由呢邊進入神社。
雖然經過400年，依家顏色鮮豔。雕刻同木工都係一流，不過可惜就係如果早上去嘅話，因為光線問題好難影得靚，實景係令你忍唔住狂影百幾張。
 呢度嘅御守都係我目前去嘅所有神社中最靚架。神社去得太多，依家都好少買御守喇，不過破例係呢度買左一個走。
經過石之間同本殿，出發去神殿。呢度真係一個好適合神明居住嘅地方，環山，綠油油一片，成個人行完之後心鏡都覺得平和同舒服。
周圍都係參天古木，不得不提嘅係附近有一棵神木據聞係搖錢樹，可以去抱下又，可能令你發達呢～
呢度原本是德川家康指定落葬嘅地方，但因為有唔少爭議，所以移去日光東照宮。呢度只剩下家康公衣冠塚同愛馬嘅墳墓。
不過點解唔將佢一前搬去日光東照宮陪下佢呢？
沿路又去返神殿‥‥‥我又忍唔住狂影。
好值得一到。
德川家博物個館亦展示好多歷代將軍嘅盔夾，好靚，選有萬年時計展示，不過館內唔俾影相的。
東照宮都有少少紀念品賣架！
呢個係四百年限定版黎，又型又靚！買左～～
包裝精美。
仲有刻紀念幣嘅Coins機。
 有儲開coins嘅我一定唔會放過，又細又方便又有有有意義嘅紀念品，我每一次同其他人去旅行，凡係有coin賣嘅地方，我都會刻上同人嘅名同埋日期，一人一個。
臨走記得拎返御朱印帳。呢個係我儲嘅第一個御朱印^^
回程時天氣已經好左好多喇！至少D霧都冇咁大。
可以去土產店買下野，好多相關商品。
呢個金箔羊羹真係好靚呀！不過香港冇日本抹茶送羊羹‥‥‥會好甜‥‥‥所以冇買到。
呢隻豬仔玩開Line嘅朋友可能都會見過，係靜岡好出名，因為係靜岡卡通，好多地方都有賣佢嘅野架。
呢度其實有餐廳，不過要12點先開，但回程班車係11點幾….仲未開呀‥‥‥
出面有D得坐下，都有幾檔攤檔的。
開始肚餓買少少野食，駿河蝦團子∼味道ok，但嬸嬸請我食嘅天婦羅仲好味。
蝦味雪糕，雖然喜歡食蝦，但真係好怪嘅組合……
遠遠有個塔就行去睇下，原來裡面係一個公園仔，亦係久能山頂。
呢度係山頂黎架～
原來呢度先係望富士山嘅方，雖然已經散晒D霧，不過天氣問題依然咩都睇唔到，少少失望啦。
雖然公園細細，但有好多繡球花，好靚呀∼
 行下行下竟然咁快行左2個半鐘，差唔多11點48分回程。補充一下，其實最好星期六，日黎，班次密好多，不過有D位會塞車，同都幾多人。回程巴士都係同一個位等。
其實鐘意行山嘅朋友可以唔洗好似我咁搭返巴士走，可以試可由神社行千幾級樓梯去返，沿途景色都好靚架，當日都見到唔少人專程咁樣行上山（不過上山太辛苦^^”）。
今晚會係伊豆急下田嘅溫泉旅館度嘆下，揀嘅呢一間旅館係日本電視節目精選嘅名宿，差唔多成二千蚊一晚好鬼貴！留意我下一篇遊記啦！^^
日本平ロープウェイ
網站： http://www.shizutetsu.co.jp/park/
址地：静岡県静岡市清水区草薙597-8
電話：054-334-2026
費用：來回 ：1,100円 ；單程 ：600円
ロープウェイ往復+東照宮拝観+東照宮博物館入館　3点セット券：1,750円
交通：由静岡駅(北口)5號巴士站乘静岡日本平線(新静岡−日本平ロープウェイ)，於日本平ロープウ下車。
久能山東照宮
網站： http://www.toshogu.or.jp/
址地：静岡県静岡市駿河区根古屋390
電話：054-237-2438
入場費：大人　社殿500円　博物館400円　共通800円；小人　社殿200円　博物館150円　共通300円
開放時間：4/1～9/30　　9：00～17：00；10/1～3/31    9：00～16：00
交通：由日本平乘空中索道約５分鐘

 

(Visited 89 times, 1 visits today)