東京近郊平玩Tandem跳傘！—埼玉縣

提到東京，絕大部份人的印象都是濕平同食好西。鐘意刺激的朋友，係咪無野好玩？咁又未必！ Sky Diving可以話鐘意刺激嘅朋友人生必做嘅事，唔洗特登飛去澳洲、關島、新西蘭‥‥‥係距離東京隔離就可以玩到同新西蘭一樣嘅Tandem跳傘。識計數嘅都知，係日本玩淨係機票都慳唔少。不過要留意返嘅係，由於跳傘涉及唔少指令同關鍵動作，所以大前提係要識日文。

跳傘一般都要去到無雷公咁遠的地方，好多時仲因為天氣唔穩定而要取消。呢間東京Skydiving Club位於東京市中心（池袋）一個半小時車程的地方，正正就係「小江戶」埼玉縣川越市附近的本田機場。呢度嘅好處就係夠晒方便，距離川越市都只係45分鐘車程（30分鐘巴士同15分專車接送）。就算臨時取消都可以去小江戶行下街體驗日本風情或者直接去池袋shopping。

係日本嘅起跳高度可以達到3,600米（平流層），同Queenstown跳傘的中等一樣，共約32000日元。（Queenstown約HKD$1900、日本約HKD$2400），可以追加相機（8000日元）or攝影師（16000日元）。如果去Queenstown玩嘅話，包埋攝影師都要成HK$2900，東京Skydiving Club都只係約HK$3500左右，相差唔遠，已經包埋意外保險。