返到靜岡，呢一晚會係伊豆急下田嘅溫泉旅館度嘆下下，因為熱海班JR好煩，一係就2個鐘10分鐘左右，一係就要搭多半個鐘，仲要轉車時間趕，為左趕呢班車，要速食lunch，一個鐘內買晒飛同拎行李兼等位食野。
揀左呢間黎自東京嘅pasta餐廳「洋麵屋 五右衛門」，點知又要等位，好彩上菜時間好快～去日本嘅朋友，識食梗係要食下意粉，因為日本意粉係用佢地當地原材料整，好多時都特別香！而且又會有D估你唔到嘅材料喎！
 呢間「洋麵屋 五右衛門」更加係標榜用日式材料同烹調方法，係日本相當具規模嘅意粉專門店！而且食物高質素，所以分店遍佈全國架！呢個普普通通嘅卡邦尼我至今仲懷念緊。如果大家有時間試下，可以去車站度食，其實靜岡站唔少餐廳質素都好好！
食完去熱海轉車，好多車飛好亂呀，原來3張係要一set 一set咁出閘入閘，真係大鄉里出城咁！冇計啦～平時去旅行係用開Pass，入閘唔洗買飛咁制就咁拎俾人睇就得，今次呢邊東海道係冇Pass的，全程都要買飛令到自己買飛快左好多！哈哈！其實都唔係咁難姐～
係熱海要轉車。呢度好多樓梯，我好慶幸自己拎左咁細個喼‥‥‥
  2個鐘真係過得好快，去到南伊豆，原來呢班車係super view，即係車尾度有全景座位，可以睇到伊豆海景！哎呀！蠢左！如果一早卜定係可以坐到270度全景位架‥‥‥
 隔離有班車都係伊豆限定，全黑色，配合返伊豆急下田嘅黑船！好有型呀！有少少明點D鐵道迷咁鐘意日本鐵道。可惜佢好快開走！

去到伊豆急下田站，今晚果間溫泉旅館—下田大和館會有shuttle bus接送，係出口右手面就係，每半個鐘一班。附近仲有locke~不過Size幾細下喎！
距離車站5分鐘車程嘅下田大和館係東京電視台節目嚴選嘅名宿之一，所以好期待今次入住。

去到旅館前見到一大片海灘已經覺得好正，入到去service極好，請你坐低係有海景嘅lobby，有茶有果子俾你嘆住check in，雖然英文唔算好，但都溝通到。有外國遊客，但主要係日本人。

 酒店分為５層，除左有頂層溫泉，仲有SPA，同地下直通沙灘！一定過滿足你３個願望
lobby附近有得揀浴衣，好多花款，款式都好靚，條腰帶仲靚，唔係求求其其冇pattern果種，打得靚係好似正式著果D有個靚靚花紋蝴蝶結，呢點真係好少旅館做到咁細緻。

浴衣好多唔同Pattern，仲有埋唔同size，我呢D著親Free size都會kick親嘅女仔真係覺得佢地好貼心！
 16：10到左酒店，check in要揀食飯時間，18：00/18：30兩個時間都好早，聽朝早餐時間都好早08:00/08:30。
正當我仲猶豫緊我聽朝素顏食早餐會唔會嚇死人嘅時間，一下開到門～真係開心爆！
我book嘅係有房內有private bath嘅房，仲睇到海景，around 27000左右，1個人嘅special package黎，唔知關唔關事，間房感覺內唔算好大，但訓多2個人都仲得！
間房真係好得呀！
間房真係好得呀ｘ２
有室內同室外淋浴！非常體貼～
 好乾淨企理
呢個格局好特別，只係試過呢一間溫泉旅館先係咁。
 因為伊豆太陽充足，就算熱夏嫌熱唔浸溫泉，呢2張太陽椅＋出面個海都夠你玩兩日。
上次試過食飽抖唔夠走去浸搞到我之後幾日都消化不良，今次幾大都浸左先。
個景觀非常好，仲好靜有海浪聲～
太陽時呢邊都幾熱下，不過有陣陣海風加上旁傍晚，初夏浸果時又唔覺得好熱喎。一邊望住個海浸一邊曬下太陽真係好爽！
 大家有冇見到出面有間小屋？其實佢就係要黎做SPA的。
你以為咁樣就好正咁你就大錯特錯喇！因為最正係佢個SPA VILLA，絕景VILLA就是這樣練成的。如果係book我個package可以半價book spa。唔知其他package有冇，但係個景咁靚值得豪下。
成間旅館非常霸氣。
非常貼心地有埋泳池同小童池！一家大細都啱玩。
到18：30食飯時間，去5樓餐廳食。自從上次去過伊豆後一直對呢邊嘅海鮮、刺身念念不忘。今晚Dinner主要係食炭火燒海鮮，用真炭燒可以將海鮮嘅精華逼晒出黎～我真係期待左好耐架！
 食個飯都有海景。
前菜好精緻！

一黎左除左前菜，就係刺身了，真係好好食，起碼出面魚市場食都冇咁彈牙，食過呢度嘅魚先知咩叫彈牙！

之後就係大大盆海鮮炭火燒喇，有金目鯛、帶子、鮑魚、蝦、蔬菜，仲有一塊5花腩。
 侍應幫手燒帶子同鮑魚，燒到半熟，手勢好好。
其他就要自己燒喇。
仲有沙律～呢隻都幾特別！
食晒已經好飽喇，當我以為冇喇掛，waiter同我講 we will serve the main course.

仲有？但係真係食唔落。不過當佢送到黎時，咦，金目鯛煮嘅湯黎架喎，仲加埋飯做湯飯，waiter話係傳統美食黎。

咁係咁咦食兩啖試下味啦，唔試由只可，一試就成碗食晒，易入口，又鮮味，又有咬口，結果食完都再添。
甜品同水果任食，仲有朱古力噴泉。
呢個一人Package真係幾抵下，有新鮮手板咁大隻嘅新鮮鮑魚典典下咁俾你燒～又有高級魚！
食到咁飽，返飯睇下露台出面，有海浪聲，又有海風涼浸浸。環境太舒服，瞓左陣11點半去左大浴場度浸，可能太夜，一個人都冇，包場浸。大浴場個海景都好唔錯。
（官方照片）
旅館亦都間小小的土產店，好體貼咁有賣杯麵～唔知係咪知道我地呢D觀光客唔慣咁早食晚飯呢？不過咁飽‥‥‥好難會肚餓架喎！
 溫泉旅館有齊化妝水，lotion，cream，仲有按摩椅。如果太早食飯晚上會肚餓，可以係自動售賣機買野食，有熱食亦有雪條雪糕野飲等等，見到雪糕果個Moment我已經瘋狂愛上左呢間野！因為我最鐘意浸完就食雪條！
買左支雪條返房一邊賜星一邊嘆～浸完一定好好瞓。之後一日會出發去橫濱，想去好耐架喇。原本東京未去勻晒，依家終於去得7788就可以向橫濱出發！
 
五右衛門 アスティ静岡店
網址：http://www.yomenya-goemon.com/
地址：静岡県静岡市葵区黒金町47番地アスティ静岡西館
電話：054-266-5267
營業時間：11：00～22：00（L.O.21：30）不定休
交通：JR静岡駅內
Tabelog食評：http://tabelog.com/shizuoka/A2201/A220101/22026926/
下田大和館
網址：http://www.shimoda-yamatokan.co.jp/
地址：静岡県下田市吉佐美2048
電話：0558-22-1000
交通：1. 東京乘特急超景踊子號約2小時45分到伊豆急下田
　　　2. 靜岡乘東海道新幹線到熱海再轉乘特急超景踊子號約2小時到伊豆急下田
由伊豆急下田轉乘旅館Shuttle bus
是次房費：1泊2食27,540円 露天風呂付海側10畳和室(約港幣$1790)

 

(Visited 207 times, 1 visits today)