下一站係去館山寺溫泉果邊遊濱名湖同食鰻魚飯，，上左車之後原來打算係浜松北高落車，但其實呢架巴士有成50幾個站……結果就係一個好似樣嘅站度落錯車了。唔緊要，只係等多20分鐘姐…..之後終於又上到車，今次睇清楚先落車。
明明諗住2點食，搞搞下差唔多3點，已經好餓了T^T
落左車後好困惑，到要係邊轉車，結果原站等，咦，唔對路! 等極D車都係去濱松站。
（太可惡，我一定要影低你個衰樣）
咁一定係對面線啦。再問下司機，司機話要過對面線向右行。過對面之後，搵到個一樣名嘅巴士站。但冇我架30號。好啦，問路人甲乙丙，個個都話唔知，唔係唔知就溝通唔到/帶我去另一個一樣名號巴士站，但都係冇我條線。
呢個完全唔係囉救命呀
點解唔用google translation 同google map？呢度係—冇—訊—號—的。呢度亦冇的士……莫非真係去唔到…..嗚
正常人可能會返濱松站。但我唔會放棄。
搞搞下差唔多4點，好彩皇天不負有心人。俾我見到原來回程巴士浜松北高下一站個站名，結果搵到去程嘅上一個巴士站，要行５分鐘，唯有係咁啦。
終於俾我諗到方法！
咁上左車後，下一站就係浜松北高。原來佢係一個極隱閉嘅巴士站……原來，同一個站名同一間巴士公司可以有幾個巴士站，經一事，蔡一智…….
終於去到館山寺，已經4點了，雖然好肚饑，但對面就係去大草山嘅纜車，拿拿林去睇埋先食野。山上可以飽覽濱名湖，仲係戀人聖地黎。要留意最後回程係17：30。
大草山位於館山寺溫泉街對岸，隔住個浜名湖，海拔113公尺。從山頂嘅瞭望台可以盡收浜名湖美景及館山寺溫泉街嘅景色架，天氣好果時仲可以好清楚咁睇到富士山。
鐘意睇景嘅朋友一定要到！大草山展望台嘅風景。原來真係好靚架，不過梅雨季，日日都天陰，今日冇落雨算好好架喇，個湖面都俾Ｄ風同天色搞到黑蚊蚊，有少少失望。
個湖真係超級大，其實呢度只不過係冰山一角，湖名湖真係大得好誇張的，你話佢係海我都信。
點解我去親果Ｄ地方都係戀人聖地‥‥‥
樓下有一間特產店，裡面賣嘅野好多都係音樂盒，亦有濱松手信。
估唔到咁可愛嘅兔仔擺設都係音樂盒黎，仲有香草香味。
大部份手信都係音樂盒黎，而且呢度仲有得教你整音樂盒，如果一家人都幾啱玩。
原定去山下纜車站隔離個音樂盒博物館，不過佢5點半就閂，依家都差唔多5點了，去食野先∼
隔離有個遊覽船乘船場架，好多人都會去買蝦條餵海鷗，餵海鷗係季節限定架～
行下行下，見到有間專賣玻璃製品，有得學係玻璃製品上刻花紋，又有得穿玻璃珠，大人細路都啱玩。
開始肚餓喇！下一站真係要去食野喇！會介紹濱名湖名產鰻魚飯～
一個人去旅行嘅缺點完完全全係呢一篇度表現左出黎。搭成個鐘車悶啦、蕩失路啦好無助啦、同當地人語言不通啦‥‥‥不過，一個人嘅旅行係好需要勇氣同小聰明，好彩，我都蠢唔晒，最後都搵到路～
有用資料網址：
館山寺空中纜車(かんざんじロープウェイ)
地點：静岡県浜松市西区舘山寺町1891
電話：053-487-2121
營業時間：09:00館山寺站出發~16:30大草山站出發
所需時間：4分鐘
費用：來回800日圓
交通：
由浜松站出發：
-
北口公車總站1號車站搭乘往「舘山寺溫泉」的巴士
-
在「濱名湖PALPAL」下車後步行1分鐘
由竜ヶ岩洞出發：
-
乘「４５(奥山−浜松駅)・浜松駅行 」 於 浜松北高站下車
-
轉乘 往舘山寺温泉的遠鉄巴士 「３０(浜松駅−団地中央−舘山寺営業所)・舘山寺営業所」
-
於舘山寺温泉站下車
ショップ＆おしゃれ工房ルーベラ
地址：静岡県浜松市西区舘山寺町1891
電話：053-487-0030
營業時間：9:30～18:00 （不定休）
交通：JR浜松駅北口1號巴士站乘「舘山寺温泉」行巴士到「浜名湖パルパル」 站下車徒歩約1分
(Visited 89 times, 1 visits today)