日本水果之王．人氣水果介紹

去日本旅行梗係一定要帶水果刀啦，因為日本水果出名夠晒甜丫嘛！日本水果雖然種類唔夠香港進口多，不過質素就係世界級一等一。而且著重品質嘅日本人亦善於改良水果，唔同產地亦有唔同特點，等TraveLa介紹一下近年嘅水果之王同人氣新品種啦！

蘋果－青森縣土岐蘋果（トキりごん）、星之金貨（星の金貨）

唔少人都知道青森縣出名出產蘋果，全國高達一半嘅蘋果都係由青森出產，青森縣蘋果種類都多達50種，當中又以王林、富士最為人熟悉。近年王林×富士生左個仔被喻為蘋果界新星，叫做土岐蘋果（トキ)，有齊王林×富士蘋果嘅特色，青黃色嘅果皮略帶紅色條紋，一般糖度可達13-15度，甜度仲高過富士蘋果，但外皮又夠薄，冇果蠟，洗一洗就食得，係每年蘋果季節必食品種，好受歡迎架！

另外星之金貨（星の金貨）都係蘋果界果王之一，係由富士×青蘋3號（父）培植而成，係罕有新品種黎！果皮呈現金黃色，口感蓬鬆似水晶梨多過蘋果，糖度在15～16％左右，酸度在0.3％左右，比富士蘋果更甜。皮極薄，同樣唔批就食得。產量少，係係日本婚禮喜慶典禮上都會出現嘅頂級水果。

水晶梨－鳥取縣王秋梨
二十世紀越大越怕‥‥‥呢個名真係好令人聯想起一首歌，好前衛。雖然烏取縣其唔係出產最多梨嘅城市，不過全日本約一半產量嘅梨王－二十世紀梨都係來自鳥取縣。近年最新培植而成王秋梨是經二十世紀梨同慈梨改良而成，抗蟲害，容易栽培而且產量較高。呈蘋果狀、果肉為乳白色，皮薄核小，口感特色兼具二十世紀梨的細緻與清脆，多汁爽口，糖度平均達13~14%，比原有的二十世紀梨更甜，更少酸味，係目前食過最爽甜嘅水晶梨！

啤梨－山形縣極光啤梨（オーロラ洋梨）
全國有超過六成嘅啤梨都係黎自山形縣，有高纖水果之王嘅啤梨本身係修身之選，本身纖維高嘅啤梨經日本人用心培植後，極光啤梨會青色會轉為完全成熟的黃色，完熟的極光啤梨口感似忌廉咁Rich，而且糖含量驚人達13～15度，話係啤梨之王絕不為過。

甜柿－熊本縣太秋柿
講到柿，不得不提好出名嘅富有柿同次郎柿。富有柿較圓身，口感清脆香甜，甜度較高，介於13~16度，汁多與否要看成熟度，越熟水份越多。次郎柿呈四方形，皮略帶澀味，清脆清甜，甜度介於12~15度，都係有名嘅柿。講到近年備受追捧的柿就莫過於－太秋柿。佢係由由富有柿、次郎柿、晚御所柿、花御所柿結合而成，主要產地係日本九州熊本縣，而熊本縣嘅太秋柿產量佔全日本的50%。溫室種植嘅太秋柿皮薄肉厚、冇果核，果肉濃郁甘甜多汁，甜度達17-20度左右，冇食開柿嘅朋友試過之後都包你愛上。

士多啤梨－德島縣櫻花水蜜桃士多啤梨（さくらももいちご）、静岡縣桃薫（とうくん）、熊本縣淡雪（あわゆき）
好多香港朋友係日本士多啤梨迷，去日本旅行必買士多啤梨。其實日本全國也有出產士多啤梨，以東京以北、栃木縣的產量最多，而就算品 種 一 樣，size唔同，價錢都唔同，最大係EX（45克）、最細係S（8克），愈大愈貴。

紅色士多啤梨界近年又有新野，黎自德島縣嘅櫻花水蜜桃士多啤梨，係由桃樹跟士多啤梨接枝而成，外表色澤鮮紅，入口有香甜的桃味，肉嫩多汁，尖部份糖度達16度～18度、中部約11度～12度。

黑同白中間都有灰啦，近年新出界乎紅同白之間嘅桃薫士多啤梨，糖度達15度，比白士多啤梨更罕有，產量亦只係一般士多啤梨嘅1/3。散發桃嘅香甜味，到底是草莓，定係桃？好暈呀！

 係2013登録嘅新品種白士多啤梨淡雪比初戀之香甜度更高，糖度達14度以上，食落有少少菠蘿味。日本士多啤梨越出越多款越甜，小編都分唔到邊個先係王者喇！

提子－

石川縣浪漫紅寶石提子Ruby Roman（ルビーロマン）、

岡山縣．亞歷山大麝香提子Muscat of Alexandria（マスカット・オブ・アレキサンドリア）、

岡山縣晴王青提子‵Shine Muscat（シャインマスカット）

日本嘅提子之王就係人人都識嘅巨峰提子，又大粒又飽滿多汁嘅巨峰人見人愛，一度令港人趨之若鶩。但識食之人都表示，巨峰只係入門級，要係頂級就莫過於紅寶石提子。近年由石川縣花14年培植研發出嘅新品種－浪漫紅寶石提子號稱係提子中嘅王子，色澤紅艷似紅寶石，甜度達18度以上，容易剝皮，提子直徑更加係巨峰提子兩倍！因為呢種提子只係石川縣種植同銷售，產量極為稀少，所以勁貴（曾創拍賣價100萬日元)‥‥‥

 日本巨峰提子產量越來越少，所以唔少農民都轉種青提子。由岡山縣出產嘅亞歷山大麝香提子被稱為「水果女王」，係全日本佔有90%以上市場佔有率。獨特果香係佢成為頂級水果嘅原因，不單止可以就咁食，仲可用黎釀酒同甜品。

而新品種晴王青提子幾乎無核，口感清爽，果皮絕無一絲苦澀味，甜度有20度，係是極稀有的提子品種，係日本近年人氣急升嘅新品種，用黎送禮亦大方得體。

哈密瓜－靜岡縣皇冠哈蜜瓜（クラウンメロン）、北海道夕張蜜瓜（夕張メロン）
日本人用心經營的特點係小編最欣賞，網紋細密分佈平均似浮雕一樣嘅蜜瓜係中國真係好難搵到。日本蜜瓜一般糖度達14度~20度，瓜王產地首推靜岡同北海道嘅夕張。靜岡縣產嘅皇冠哈蜜瓜係日本皇室御品，有水果中嘅「勞斯萊斯」之稱，每一個所含甜度都達16~20度以上，香氣濃郁，瓜皮特薄果肉滑溜，纖維極高。

同靜岡皇冠哈蜜瓜齊名嘅北海道夕張蜜瓜近年名氣響噹噹，同樣以一樹一瓜栽培，果肉金黃色，肉質細緻，清甜多汁，果香撲鼻，食到瓜皮部分都一樣香甜，糖度高達20%～23%，更贏得「日本第一初夏水果」嘅美譽，難怪年年拍賣價都係天價黎。

水蜜桃－山梨縣大糖領桃、山梨縣黃金桃、岡山縣清水白桃

日本水蜜桃可以話係全世界最好食嘅，有分紅、白、黃三種水蜜桃。山梨縣素有「日本水蜜桃之鄉」美譽，產量佔全國30%，當中又以春日居、大藤同大糖嶺最出名，各有千秋。數甜度的話，大糖領標榜糖度達13.5度以上，係超甜嘅水蜜桃！桃香四溢而且色澤粉嫩甜美多汁。係日本嘅產量較為稀少，而且有甜度保證，可以真正稱之為最高級嘅桃。

黃金桃係山梨產量極稀少又珍貴嘅品種，產量只佔有日本國內水蜜桃嘅2％，糖度約12～16度。淡黃色果皮非常薄，果肉厚實且多汁，香氣濃郁遠超一般桃！係一試難忘嘅頂級梨。

每一粒白桃都須要用袋一個一個咁包著栽培先可以成為白嫩嘅白桃。白鳳白桃一向都係白桃界嘅寵兒，雖然糖度約１２度，非常甜，但後起之秀「桃之女王」清水白桃亦都不輸蝕，糖度約12～15度，外皮白中帶著少少黃色嘅清水白桃，果肉非常軟熟，加上獨特桃味同其極短嘅當造期(每年只有七月尾至八月頭兩個星期)，矜貴又昂貴，比一般桃貴近一倍。

奇異果－福岡縣彩紅奇異果（レインボーレッド キウイフルーツ）
可能比較少人會留意到日本奇異果，好多人都好怕酸！話明日本出名水果甜，唔食酸嘅朋友一定要試下日本奇異果！日本奇異果以愛媛縣同福岡出產最多。來自福崗嘅彩紅奇異果係小編食過最好食嘅奇異果！果肉中間部份係黃最中央係紅色，果肉帶有特殊香氣，口感幾似金奇異果，但甜度更高，平均糖度達17度，絕無一般奇異果酸澀感，係極稀少的高甜度奇異果。

日本水果一般以甜度見稱，所以絕大部份頂級水果都係非常甜，糖度太高嘅水果唔太適合部份疾病如糖尿病人食用，大家要留意喇！其實種種水果都各有千秋，有D品種重果香、有人鐘意另類口感。一般黎講超市真係貴好多，如果想買平少少可以去市場度買架！