日本機票全分析！幾錢先係入手價？

「$1,500來回東京平唔平呀？」、「$2,000大阪買唔買得過呀？」小編每日都收到呢一啲問題，所以就不如同大家黎個日本機票全分析，話俾你知日本機票幾錢先係入手價啦！如果反應好將會打埋其他國家，所以有無下次就靠大家啦！

注：以下所提及的價錢為來回連稅價錢，及未包廉航寄艙行李費，以淡季作標準。價錢及建議是小編個人之經驗，只作參考用途。

最低價：過去一年以來嘅最平價錢，可遇不可求。

入手價：搵機票個陣見到呢個價都叫做唔錯，買得過。

正常價：平時無優惠做緊嘅正常價錢。

東京：

 傳統航空公司黎講，老大哥國泰除左係Fanfares 會一個月見一次之外，價錢長期高企，若果係國泰忠實擁躉嘅話就要捱貴飛了；而ANA 及日航半年左右出一次早鳥優惠 (好過無啦！)，價錢大約$2,700至$3,000，有兩件23KG 行李，仲可以早去晚返，絕對抵買！

廉航方面，Jetstar 普遍係3間之中最平，但航班時間確實麻麻，只能午去早返，最近推出開航價最平試過來回$536，入手價預$1,200 左右；香草航空時間最靚，有凌晨機去晚機返，大約一個月出一次優惠，最大問題係寄艙行李收費，20 KG每程收$304，比其他貴百幾蚊，一般優惠價錢為$1,000至$1,300；HK Express 勝在優惠夠多，差唔多每兩星期一次，一日有三班航班，同時可以飛羽田，但想買靚時間平飛要起碼半年前買先有。

大阪：

同樣地大阪係國泰Fanfares 嘅出現率係一個月一次，價錢大約由$2,400至$2,800 不等；ANA 雖然有兩件23 KG行李，但係航班時間係午去早返，無左兩日。印度航空就…除非無哂其他選擇先考慮啦。

三間廉航之中，樂桃可以凌晨機去晚機返，玩盡每一日。而HK Express 暫時一日有三班機，可以早去晚返，呢兩間都經常有優惠，大約兩三星期一次，$1,500 左右即可入手，建議集中火力主攻呢兩間；而Jetstar 凌晨機去下午返，優惠比較少，一個月先有一次，而且航班暫時唔係日日有，入手價約$1,400。

名古屋/福岡：

名古屋/福岡比較起其他航點出現係國泰/港龍Fanfares 嘅次數仲低，要撞岩時間及航點難過登天，出發日子係Flexible就另計；ANA 飛名古屋時間太差，要午去早返同大阪一樣都好難落手買。

反而名古屋或福岡嘅話，長榮/華航轉機都可以考慮，尤其係Last minute 甚至連廉航都唔減價嘅時侯，轉機$2,400至$2,600 包行李絕對可以接受，仲可以一票兩地玩埋台北。

廉航HK Express 早去午返/午去晚返時間幾靚，而價錢比起國泰/港龍平一半，但通常出優惠平飛唔多，入手價小編認為係$1,600，比東京/大阪高一點。

沖繩：

除非有港龍情意結，如果唔係真係唔太抵；而港航每季有一Click 即享優惠，預早半年留意啦，價錢預計約$1,500至$1,700。如果係Last minute 出發嘅話，港航逢星期二晚有「話飛就飛」優惠，沖繩呢個航點經常出現。

廉航樂桃價錢絕對抵玩，大約每兩三星期出一次優惠，預早三個月睇定差唔多，雖則唔係日日有航班，但遇正優惠買到$1,000以下來回連稅無難度。

**結論**：

– 想平坐傳統航空有三個方法：

(1) 靠運博Fanfares，中獎率極低

(2) 提早半年捕實ANA/日航減價，唔使諗即買。

(3) 提早半年捕實港航「話飛就飛」優惠飛沖繩

– 唔怕核突時間或勁貴寄艙行李嘅話，就揀Jetstar 同香草，普遍較平，入手價為$1,200至$1,300。HK Express 近排每逢星期一晚都有減價，同埋記住得閒上佢官網Search 下，話唔定有驚喜，愈早捕實優惠會愈平。樂桃航空每兩三星期翻炒優惠，但想買靚時間必須要3個月前訂飛。仲有一個小Tips，樂桃通常出優惠會係連住出，即係出左香港出發優惠之後，隔一日會出日本出發優惠，如果分開兩程買，比起買香港來回再平約$100至$200 。(當然前提係兩程都要買到減價飛….)

– 最後當然唔少得札幌！直航機票就算有減價都貴過去歐洲，想平飛就唯有坐長榮/華航係台北轉機，或者坐廉航去東京/大阪轉內陸機。日本內陸廉航有Jetstar / 香草/ 樂桃，經常有減價。撞正優惠4程機加埋入手價預$2,500左右。

記住：買廉航一定要撞正有優惠先買！！同埋廉航可買單程，比較下唔同價錢，自制兩張單程夾埋來回可能仲平時間仲靚，甚至可以不同城市來回！

至於公眾假期旺季？唔洗諗架啦，9成9都無平。

(轉載自flyday)